ନୂଆଦିଲ୍ଲୀ: ନାଗପୁରରେ ଥିବା କେନ୍ଦ୍ରମନ୍ତ୍ରୀ ନୀତିନ ଗଡକରୀଙ୍କ ଘରକୁ ବୋମା ମାଡ଼ ଧମକ ମିଳିଛି। ପୋଲିସ କଣ୍ଟ୍ରୋଲ ରୁମକୁ ଏହି ଧମକପୂର୍ଣ୍ଣ କଲ୍ ଆସିଥିଲା। ଏହି କଲ୍ ପରେ ପୋଲିସ ବିଭାଗରେ ହଇଚଇ ସୃଷ୍ଟି ହୋଇଥିଲା। ଅଭିଯୁକ୍ତଙ୍କୁ କିଛି ସମୟ ମଧ୍ୟରେ ଗିରଫ କରାଯାଇଥିଲା। ମିଳିଥିବା ସୂଚନା ଅନୁଯାୟୀ, ରବିବାର ସକାଳ ୮:୪୬ ସମୟରେ ପୋଲିସ କଣ୍ଟ୍ରୋଲ ନମ୍ବର ୧୧୨ରେ ଗଡକରୀଙ୍କ ଘରକୁ ବୋମାରେ ଉଡ଼ାଇ ଦେବା ପାଇଁ ଧମକ ମିଳିଥିଲା। ଧମକପୂର୍ଣ୍ଣ ଫୋନ୍ ପାଇବା ପରେ ପୋଲିସ ସ୍ଥାନୀୟ ପୋଲିସ ଷ୍ଟେସନକୁ ଏ ବିଷୟରେ ଜଣାଇଥିଲା। କଣ୍ଟ୍ରୋଲ ରୁମକୁ କଲ୍ ପାଇବା ପରେ, ପ୍ରତାପ ନଗର ପୋଲିସ ଅଜ୍ଞାତ ବ୍ୟକ୍ତିଙ୍କ ବିରୁଦ୍ଧରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା।
ପୋଲିସ ଏବଂ ଡଗ୍ ସ୍କ୍ୱାଡ୍ ଦଳ ଗଡକରୀଙ୍କ ଘରେ ମଧ୍ୟ ତଲାସୀ ଅଭିଯାନ ଚଳାଇଛଥିଲା। କିଛି ଘଣ୍ଟା ପରେ, ପୋଲିସ ଗଡକରୀଙ୍କ ଘରକୁ ବୋମା ମାଡ଼ କରିବାକୁ ଧମକ ଦେଇଥିବା ଅଭିଯୁକ୍ତକୁ ଗିରଫ କରିଥିଲା। ଗିରଫ ଅଭିଯୁକ୍ତର ନାମ ଉମେଶ ବିଷ୍ଣୁ ରାଉତ। ଉମେଶ ବିଷ୍ଣୁ ରାଉତ ମେଡିକାଲ ଛକରେ ଥିବା ଏକ ଦେଶୀ ମଦ ଦୋକାନରେ କାମ କରନ୍ତି। ପୋଲିସ ତାଙ୍କୁ ନାଗପୁରର ବୀମା ଦାୱାଖାନା ନିକଟରୁ ଗିରଫ କରିଥିଲା। କେନ୍ଦ୍ରମନ୍ତ୍ରୀ ନୀତିନ ଗଡକରୀ ନାଗପୁରରେ ଉପସ୍ଥିତ ଅଛନ୍ତି। ପୋଲିସ ଦଳ ଏବେ ଗିରଫ ଅଭିଯୁକ୍ତଙ୍କୁ ଧମକ ପଛର ଉଦ୍ଦେଶ୍ୟ ଜାଣିବା ପାଇଁ ପଚରାଉଚରା କରୁଛି।
