ବିଦ୍ୟୁତ ସଂସ୍ପର୍ଶରେ ଆସି ୮ କାଉଡିଆ ମୃତ

ପାଟନା: ଶ୍ରାବଣ ମାସରେ ପାଣିଭାର ନେଇ ଯାଉଥିବା କାଉଡିଆ ଦୁର୍ଘଟଣାଗ୍ରସ୍ତ ହେବା ଏବଂ ଏଥିରେ ସେମାନଙ୍କ ଜୀବନହାନି ହେଉଥିବା ଖବର ଦେଶର ବିଭିନ୍ନ ପ୍ରାନ୍ତରୁ ଆସିବାରେ ଲାଗିଛି । ଏସବୁ ମଧ୍ୟରେ ବିହାର ରାଜ୍ୟ ବୈଶାଲି ଜିଲା ହାଜିପୁରରେ ପାଣି ନେଇ ଆସିବା ବେଳେ ବିଦ୍ୟୁତ୍ ସଂଶ୍ପର୍ସରେ ଆସି ୮ କାଉଡିଆ ମୃତ୍ୟୁବରଣ କରିଛନ୍ତି । ଡିଜେ ଗାଡ଼ି ବିଦ୍ୟୁତ୍ ସଂସ୍ପର୍ଶରେ ଆସିଯିବାରୁ ଏହି ଅଘଟଣ ଘଟିଛି । ସେହିପରି ଏହି ଘଟଣାରେ ୬ରୁ ଅଧିକ କାଉଡିଆ ଗୁରୁତର ଅବସ୍ଥାରେ ମେଡିକାଲରେ ଭର୍ତ୍ତି ହୋଇଛନ୍ତି ।  ତେବେ ମୃତାହତ କାଉଡିଆନେ ଗୋଟିଏ ଗାଁର ଓ ସେମାନଙ୍କ ବୟସ ୧୫ରୁ ୨୦ ବର୍ଷ ମଧ୍ୟରେ ବୋଲି ଜଣାଯାଇଛି । ଗତରାତିରେ କାଉଡ଼ିଆମାନେ ପାଣି ଉଠାଇବା ନିମନ୍ତେ ଘରୁ ବାହାରିଥିବା ବେଳେ ପହଲେଜା ଘାଟ ଅଭିମୁଖେ ଯାଉଥିଲେ । ଏହି ସମୟରେ କାଉଡ଼ିଆମାନେ ଡିଜେ ବଜାଇ ତାହାର ତାଳେ ତାଳେ ଆଗେଇ ଚାଲିଥିଲେ । କିନ୍ତୁ ଦୁର୍ଭାଗ୍ୟବଶତଃ ଡିଜେ ଗାଡ଼ିଟି ଏକ ବିଦ୍ୟୁତ୍ ତାର ସଂସ୍ପର୍ଶରେ ଆସି ଯାଇଥିଲା । ଘଟଣାସ୍ଥଳରେ ୧୪ରୁ ଅଧିକ କାଉଡ଼ିଆ ଗୁରୁତର ହୋଇ ଯାଇଥିଲେ । ତୁରନ୍ତ ସମସ୍ତଙ୍କୁ ସ୍ଥାନୀୟ ଲୋକେ ମେଡିକାଲରେ ଭର୍ତ୍ତି କରିଥିଲେ । ସେଠାରେ ଡାକ୍ତର ଏମାନଙ୍କ ମଧ୍ୟରୁ ୮ଜଣଙ୍କୁ ମୃତ ବୋଲି ଘୋଷଣା କରିଥିଲେ । ଘଟଣା ପ୍ରଚାରିତ ହେବା ପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳି ଯାଇଛି । ପୁଲିସ୍ ଘଟଣାର ତଦନ୍ତ ଆରମ୍ଭ କରିଛି ।