ମିଳୁନି କାଠଯୋଡିକୁ ଡେଇଁଥିବା ଯୁବକଙ୍କ ପତ୍ତା; ଚାରି ଦିନରେ ୩ ନିଖୋଜ

କଟକ: ପୁଣି ଜଣେ ଯୁବକ କାଠଯୋଡିକୁ ଡେଇଁ ନିଖୋଜ ହୋଇଛନ୍ତି । ବହୁ ଖୋଜାଖୋଜି ପରେ ମଧ୍ୟ ତାଙ୍କର ପତ୍ତା ଏଯାଁ ମିଳିପାରିନାହିଁ । ନିଖୋଜ ଯୁବକ ଜଣକ ଖାନନଗର ଆଠଘରିଆ ସାହିର ମନୋଜ ବେହେରା(୪୫) । ଉଭୟ ଅଗ୍ନିଶମ ବିଭାଗ ଓ ଓଡ୍ରାଫ ପକ୍ଷରୁ ଖୋଜାଖୋଜି କରାଯାଉଥିଲେ ହେଁଏଯାଏଁ ତାଙ୍କର କୈାଣସି ପତ୍ତା ମିଳିନାହିଁ । ପ୍ରକାଶ ଯେ, ମନୋଜ ତାଙ୍କ ମା’ଙ୍କ ସହିତ ଗୋପାଳପୁରରେ ଭଡାରେ ରହୁଥିଲେ । କୈାଣସି କାରଣରୁ କିଛି ମାସ ହେବ ତାଙ୍କର ପତ୍ନୀ ପିଲାମାନଙ୍କୁ ନେଇ ବାପ ଘରକୁ ଚାଲିଯାଇଛନ୍ତି । ଗତ କାଲି ରାତିରେ ମନୋଜ ଓ ତାଙ୍କ ମା’ଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା । ମନୋଜ ବ୍ଲେଡ୍‌ରେ ନିଜ ହାତ କାଟି ଦେଇଥିଲେ । ପରିବାର ଲୋକେ ମନୋଜକୁ ନେଇ ବଡ ଡାକ୍ତରଖାନାରେ ଚିକିତ୍ସା କରାଇଥିଲେ । ଗତକାଲି ସକାଳେ ସେ ମେଡିକାଲରୁ ଘରକୁ ଫେରିଥିଲା । ତେବେ ରାତିରେ ଏକ ଅଟୋରିକ୍ସାରେ ମନୋଜ ତା ମା’କୁ ନେଇ ସମ୍ରାଟ ସିନେମା ହଲ ପାଖକୁ ଆସିଥିଲା । ଫେରିଲା ବେଳକୁ କାଠଯୋଡି ନଦୀ ପୋଲ ଉପରେ ଅଟୋ ରଖିବାକୁ ମନୋଜ ଚାଳକକୁ କହିଥିଲା । ଅଟୋ ରହିବା ମାତ୍ରେ ମନୋଜ ପୋଲ ଉପରୁ ନଦୀକୁ ଡେଇଁ ପଡିଥିଲା । ଗତ ଚାରି ଦିନ ମଧ୍ୟରେ କାଠଯୋଡି ନଦୀକୁ ଡେଇଁ ୩ ଜଣ ନିଖୋଜ ହୋଇଯାଇଛନ୍ତି । ଗତ ବୁଧବାର ଭୋର ସମୟରେ ଦରଘାବଜାର ଅଂଚଳର ମମତା ସାହୁ ନାମ୍ନୀ ଜଣେ ଶିକ୍ଷୟିତ୍ରୀ ନେତାଜୀ ସୁବାସ ସେତୁ ଉପରେ ସ୍କୁଟି ଓ ଚପଲ ରଖି ନିଖୋଜ ହୋଇଯାଇଥିଲେ । ସେ ନଦୀକୁ ଡେଇଁ ଆତ୍ମହତ୍ୟା କରିଥିବାର ସନ୍ଦେହ କରାଯାଉଛି । ସେହିପରି ଗୁରୁବାର ସକାଳେ ତୁଷାର ଭଟ୍ଟ ନାମକ ଗୁଜୁରାଟୀ ବ୍ୟବସାୟୀ ସେତୁ ଉପରେ କାର ଓ ଚପଲ ଛାଡି ଦେଇ କେଉଁଆଡେ ନିଖୋଜ ହୋଇଯାଇଥିଲେ । ସେ ନଦୀ ଗର୍ଭକୁ ଡେଇଁ ଆତ୍ମହତ୍ୟା କରିଥିବାର ସନ୍ଦେହ କରାଯାଉଛି । ତେବେ ନିଖୋଜ ହୋଇଥିବା ଏହି ତିନି ଜଣଙ୍କ ମଧ୍ୟରୁ କେହି ଜଣେ ହେଲେ ଉଦ୍ଧାର ହୋଇପାରିନଥିବା ଜଣାପଡିଛି ।