ଗୁଆହାଟୀ: ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ ଶୁକ୍ରବାର ଆସାମର ବଦଳୁଥିବା ଜନସଂଖ୍ୟା ପାଇଁ କଂଗ୍ରେସକୁ ଦାୟୀ କରିଛନ୍ତି। ଗୃହମନ୍ତ୍ରୀ କହିଛନ୍ତି, “ମୁଁ ରାହୁଲ ଗାନ୍ଧୀଙ୍କୁ ପଚାରିବାକୁ ଚାହୁଁଛି ଯେ ତାଙ୍କ ଦଳ ବନ୍ଧୁକ, ଗୁଳି, ସଂଘର୍ଷ ଏବଂ ଯୁବକଙ୍କ ମୃତ୍ୟୁ ବ୍ୟତୀତ ଆସାମକୁ କ’ଣ ଦେଇଛି?’ ଶାହଙ୍କ କହିବାନୁସାରେ କଂଗ୍ରେସ ଶାସନ ସମୟରେ, ଆସାମରେ ଅନୁପ୍ରବେଶକାରୀଙ୍କ ସଂଖ୍ୟା ୬୪ ଲକ୍ଷକୁ ବୃଦ୍ଧି ପାଇଛି ଏବଂ ଏହି ଅନୁପ୍ରବେଶକାରୀମାନେ ଏବେ ପ୍ରାୟ ୭ଟି ଜିଲ୍ଳାରେ ସଂଖ୍ୟାଗରିଷ୍ଠ ହୋଇଯାଇଛନ୍ତି। ଏହି ଅବସରରେ ଶାହ ରାହୁଲ ଗାନ୍ଧୀଙ୍କୁ ଉତ୍ତର-ପୂର୍ବକୁ ଅପମାନିତ କରିବାର ମଧ୍ୟ ଅଭିଯୋଗ କରିଛନ୍ତି। ଆସାମର ଦିବ୍ରୁଗଡ଼ର ଖାନିକର ପରେଡ୍ ଗ୍ରାଉଣ୍ଡରେ ଏକ ସାଧାରଣ ସଭାକୁ ସମ୍ବୋଧିତ କରି ଶାହ କହିଛନ୍ତି ଯେ ଗଣତନ୍ତ୍ର ଦିବସରେ, ବିଦେଶୀ ଅତିଥିଙ୍କ ସମେତ ସମସ୍ତ ବିଶିଷ୍ଟ ବ୍ୟକ୍ତି ସମ୍ମାନର ପ୍ରତୀକ ଭାବରେ ଉତ୍ତର-ପୂର୍ବ ସ୍କାର୍ଫ ପିନ୍ଧିଥିଲେ, କିନ୍ତୁ ରାହୁଲ ଗାନ୍ଧୀ ଏକମାତ୍ର ବ୍ୟକ୍ତି ଯିଏକି ଏହାକୁ ପରିଧାନ କରିବାକୁ ମନା କରିଥିଲେ।
ରାହୁଲ ଗାନ୍ଧୀ ଯାହା ଇଚ୍ଛା ତାହା କରିପାରିବେ, କିନ୍ତୁ ଯେପର୍ଯ୍ୟନ୍ତ ବିଜେପି କ୍ଷମତାରେ ଅଛି, ଆମ ଦଳ ଉତ୍ତର-ପୂର୍ବର ସଂସ୍କୃତି ପ୍ରତି କୌଣସି ଅସମ୍ମାନକୁ ସହ୍ୟ କରିବ ନାହିଁ। ଗୃହମନ୍ତ୍ରୀ କହିଛନ୍ତି, ଆସାମରେ ଅନୁପ୍ରବେଶକାରୀଙ୍କୁ ବସବାସ କରିବାରୁ ରୋକିବା ଦିଗରେ ମିସିଂ ସମ୍ପ୍ରଦାୟର ଗୁରୁତ୍ୱପୂର୍ଣ୍ଣ ଭୂମିକା ରହିଛି। ଅନୁପ୍ରବେଶ ରୋକିବା ପାଇଁ ମିସିଂ ସମ୍ପ୍ରଦାୟର ଦାୟିତ୍ୱ ସତ କିନ୍ତୁ ଏଥିପାଇଁ କାହାକୁ ଅସ୍ତ୍ର ଉଠାଇବା ଆବଶ୍ୟକ ନାହିଁ। ସେହିପରି ଦିବ୍ରୁଗଡ଼ ଏବଂ ଧେମାଜିକୁ ସଂଯୋଗ କରୁଥିବା ବ୍ରହ୍ମପୁତ୍ର ନଦୀ ଉପରେ ବୋଗିବିଲ୍ ସେତୁ ବିଷୟରେ ଶାହ କହିଛନ୍ତି ଯେ ଏହା ସମଗ୍ର ବିଶ୍ୱ ପାଇଁ ଭାରତର ପ୍ରଗତିକୁ ପ୍ରତୀକ କରୁଛି। ଭାରତରେ ବହୁତ କମ୍ ଲୋକ ଜାଣନ୍ତି ଯେ ବୋଗିବିଲ୍ ସେତୁ ମିସିଂ ସମ୍ପ୍ରଦାୟର ମୋର ଭାଇ ଏବଂ ଭଉଣୀମାନଙ୍କ କଠିନ ପରିଶ୍ରମ ଏବଂ ଝାଳରେ ନିର୍ମିତ ହୋଇଥିଲା। ଆଜି, ଏହି ସେତୁ ଦେଶ ଏବଂ ବିଶ୍ୱ ସ୍ତରରେ ଏକ ନୂତନ ଭାରତର ଦୃଷ୍ଟିକୋଣର ଏକ ଶକ୍ତିଶାଳୀ ପ୍ରତିନିଧିତ୍ୱ ପାଲଟିଛି। ଶାହ କହିଛନ୍ତି, ଆସାମରୁ ରାଜ୍ୟସଭା ସାଂସଦ ଥିବା ମନମୋହନ ସିଂହ ୧୦ ବର୍ଷ ପାଇଁ ପ୍ରଧାନମନ୍ତ୍ରୀ ରହିଥିଲେ, କିନ୍ତୁ ଏହି ସେତୁ ଅସମ୍ପୂର୍ଣ୍ଣ ରହିଗଲା। ଆସାମବାସୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଉପରେ ବିଶ୍ୱାସ ପ୍ରକଟ କଲେ ଯାହାଫଳରେ ଏହି ସେତୁ ମାତ୍ର ଚାରି ବର୍ଷ ମଧ୍ୟରେ ସମାପ୍ତ ହୋଇପାରିଥିଲା। ସେହିପରି ଆସାମ୍ ଚା’ ଏବେ କୌଣସି ଶୁଳ୍କ ବିନା ୟୁରୋପୀୟ ଦେଶଗୁଡ଼ିକୁ ରପ୍ତାନି କରାଯିବ ବୋଲି ମଧ୍ୟ ସେ କହିଛନ୍ତି। ରାଜ୍ୟରେ ଜନସଂଖ୍ୟାଗତ ଧାରା ବଦଳାଇବା ପାଇଁ ମୋଦି ସରକାର କାମ କରୁଛନ୍ତି ବୋଲି ଶାହ କହିଛନ୍ତି।
