ହୁତୁହୁତୁ ହୋଇ ଜଳିଗଲା ୫ଟି ହାଇୱା ଟ୍ରକ

ଚଣ୍ଡିଖୋଲ: ପେଟ୍ରୋଲ ପମ୍ପ ନିକଟରେ ହୁତୁହୁତୁ ହୋଇ ଜଳିଗଲା ୫ଟି ହାଇୱା ଟ୍ରକ । ଏନଏଚ୍‌ ନଂ ୫୩ ଚଣ୍ଡିଖୋଲ-ପାରାଦ୍ୱୀପ ଜାତୀୟ ରାଜପଥର କଉଡ଼କଲ ଛକ ନିକଟରେ ଏହି ଦୁର୍ଘଟଣା ଘଟିଛି । ଗତକାଲି ବିଳମ୍ବିତ ରାତିରେ କଉଡ଼କଲ ଛକ ନିକଟରେ ଏକ ପେଟ୍ରୋଲ ପମ୍ପ ନିକଟରେ ଛିଡ଼ା ହୋଇଥିବା ଟ୍ରକରେ କୌଣସି କାରଣରୁ ନିଆଁ ଲାଗି ଯାଇଥିଲା । ଯାହା ଫଳରେ ସେଠି ଛିଡ଼ା ହୋଇଥିବା ଆଉ କିଛି ଟ୍ରକକୁ ନିଆଁ ବ୍ୟାପି ଯାଇଥିଲା । ନିଆଁର ପ୍ରକୋପ ଏତେ ଥିଲା ଯେ, ଅନ୍ୟ ଟ୍ରକକୁ ନିଆଁ ବ୍ୟାପି ଯାଇଥିଲା । ଯାହା ଫଳରେ ୫ଟି ହାଇୱା ଟ୍ରକ ସହ ପାଖରେ ଥିବା ଏକ କ୍ୟାବିନରେ ମଧ୍ୟ ନିଆଁ ଲାଗି ହୁତୁହୁତୁ ହୋଇ ଜଳୁଥିଲା । ଘଟଣା ସ୍ଥଳରେ ଅଗ୍ନିଶମ ବାହିନୀ ପହଞ୍ଚି ବହୁ ସମୟର ଚେଷ୍ଟା ପରେ ନିଆଁକୁ ଆୟତ୍ତ କରିଥିଲା । ୫ଟି ହାଇୱା ସହ ଗୋଟିଏ ଦୋକାନ ଜଳି ଯାଇଛି । ତେବେ ଅଗ୍ନିକାଣ୍ଡର କାରଣ ଅସ୍ପଷ୍ଟ ରହିଛି । ପାଖରେ ପେଟ୍ରୋଲ୍ ପମ୍ପ ରହିଥିବାରୁ ସମସ୍ତେ ଏକ ବଡ଼ ଅଘଟଣରୁ ଅଳ୍ପକେ ବର୍ତ୍ତି ଯାଇଛନ୍ତି ।