ତେଲେଙ୍ଗାନା: ସାଉଦି ଆରବର ମକ୍କା-ମଦିନା ରାଜପଥରେ ଘଟିଥିବା ଭୟଙ୍କର ବସ୍ ଦୁର୍ଘଟଣା ଘଟଣାରେ ତେଲେଙ୍ଗାନା ସରକାରଙ୍କ ବଡ ଘୋଷଣା । ବସ୍ ଦୁର୍ଘଟଣାରେ ମୃତ୍ୟୁବରଣ କରିଥିବା ୪୫ ଭାରତୀୟଙ୍କ ସାଉଦ ଆରବରେ ହେବ ଅନ୍ତିମ ସଂସ୍କାର । ୪୫ ଜଣ ଭାରତୀୟଙ୍କ ମୃତଦେହକୁ ସାଉଦି ଆରବରେ ସେମାନଙ୍କ ଧାର୍ମିକ ରୀତିନୀତି ଅନୁଯାୟୀ କବର ଦିଆଯିବ । ଏହି ନିଷ୍ପତ୍ତି ସାଉଦି ଆରବ ଆଇନ ଏବଂ ହଜ୍ ତଥା ଉମରା ମନ୍ତ୍ରଣାଳୟର ନିୟମ ଅନୁଯାୟୀ ନିଆଯାଇଛି। ନିୟମ ଅନୁଯାୟୀ, ଯାତ୍ରା ଆରମ୍ଭ କରିବା ପୂର୍ବରୁ ଏକ ଘୋଷଣାପତ୍ରରେ ସ୍ୱାକ୍ଷର କରୁଥିବା ତୀର୍ଥଯାତ୍ରୀଙ୍କୁ ସାଉଦି ମାଟିରେ ମୃତ୍ୟୁବରଣ କଲେ ସାଉଦି ଆରବରେ କବର ଦିଆଯାଇଥାଏ। ସେଥିପାଇଁ ସଂଖ୍ୟାଲଘୁ କଲ୍ୟାଣ ମନ୍ତ୍ରୀ ମହମ୍ମଦ ଆଝାରୁଦ୍ଦିନଙ୍କ ନେତୃତ୍ୱରେ ତେଲେଙ୍ଗାନା ସରକାରଙ୍କ ଏକ ଦଳ ଅନ୍ତିମ ସଂସ୍କାର ବ୍ୟବସ୍ଥା ସମେତ ରିଲିଫ୍ କାର୍ଯ୍ୟର ସମନ୍ୱୟ ପାଇଁ ସାଉଦି ଆରବରେ ପହଞ୍ଚିଛି।
ମୃତ ଭାରତୀୟଙ୍କ ପ୍ରାୟ ୫୦ ଜଣ ସମ୍ପର୍କୀୟ ଶେଷକୃତ୍ୟ ପାଇଁ ଉପସାଗରୀୟ ଦେଶକୁ ଯିବେ ବୋଲି ମଙ୍ଗଳବାର ଦିନ ତେଲେଙ୍ଗାନାର ଜଣେ ବରିଷ୍ଠ ଅଧିକାରୀ କହିଛନ୍ତି। ସୂଚନାଯୋଗ୍ୟ, ଭାରତୀୟ ସମୟ ଅନୁସାରେ ରବିବାର ରାତି ପ୍ରାୟ ୧:୩୦ ସମୟରେ ମଦିନାଠାରୁ ପ୍ରାୟ ୨୫ କିଲୋମିଟର ଦୂରରେ ମୁହରସ ନିକଟରେ ଏହି ଦୁର୍ଘଟଣା ଘଟିଥିଲା। ଏହି ଦୁର୍ଘଟଣାରେ ୪୨ ଜଣଙ୍କ ମୃତ୍ୟୁ ଘଟିଥିଲା । ସେମାନଙ୍କ ମଧ୍ୟରୁ ଅଧିକାଂଶ ତେଲେଙ୍ଗାନାର ଥିଲେ । ଏହି ଘଟଣା ସମ୍ପର୍କରେ ସୂଚନା ଦେଇ ହାଇଦ୍ରାବାଦ ପୋଲିସ କମିଶନର ଭି.ସି. ସଜ୍ଜନାର ସୋମବାର ଦିନ ମୃତ୍ୟୁ ସଂଖ୍ୟା ୪୫ ବୋଲି କହିଥିଲେ । ଏହି ସମୟରେ ତେଲେଙ୍ଗାନା ସରକାର ସାଉଦିଅ ଆରବରେ ଧାର୍ମିକ ପରମ୍ପରା ଅନୁଯାୟୀ ମୃତକଙ୍କ ଶବଦାହ କରିବାକୁ ନିଷ୍ପତ୍ତି ନେଇଛନ୍ତି ଏବଂ ପ୍ରତ୍ୟେକ ମୃତକଙ୍କ ପରିବାରକୁ ୫ ଲକ୍ଷ ଟଙ୍କା ଅନୁକମ୍ପା ରାଶି ପ୍ରଦାନ କରିଛନ୍ତି ।
