୨ ବସ୍ ମୁହାଁମୁହିଁ ଧକ୍କା: ଜଣେ ମୃତ

ହରିୟାଣା: ହରିୟାଣାର ଚରଖି ଦାଦରୀରେ ମର୍ମନ୍ତୁଦ ସଡକ ଦୁର୍ଘଟଣା । ଏକ ରୋଡୱେଜ୍ ବସ୍ ଏବଂ ଏକ ସ୍କୁଲ ବସ୍ ମୁହାଁମୁହିଁ ଧକ୍କା ହୋଇଛି। ଏହି ଦୁର୍ଘଟଣାରେ ଜଣେ ୧୧ଶ ଶ୍ରେଣୀ ଛାତ୍ରଙ୍କ ମୃତ୍ୟୁ ଘଟିଛି ଏବଂ ୧୮ ଜଣ ପିଲା ଆହତ ହୋଇଛନ୍ତି। ଦୁର୍ଘଟଣାଟି ଦାଦରୀ ବିରୋହର ରୋଡରେ ଘଟିଥିଲା। ଦୁର୍ଘଟଣା ଏତେ ଗୁରୁତର ଥିଲା ଯେ ସ୍କୁଲ ବସ୍ ସମ୍ପୂର୍ଣ୍ଣ ନଷ୍ଟ ହୋଇଯାଇଥିଲା। ଆହତମାନଙ୍କୁ ଚିକିତ୍ସା ପାଇଁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି। ସୂଚନା ଅନୁଯାୟୀ, ହରିୟାଣା ରୋଡୱେଜ୍ ବସ୍ ଦାଦରୀ-ବିରୋହର ରୋଡ ଦେଇ ଯାଉଥିଲା। ସେହି ସମୟରେ, ଏକ ଘରୋଇ ସ୍କୁଲ ବସ୍ ଅନ୍ୟ ପାର୍ଶ୍ୱରୁ ପିଲାମାନଙ୍କୁ ସ୍କୁଲକୁ ନେଇ ଆସୁଥିଲା। ହଠାତ୍ ଉଭୟ ଗାଡ଼ି ମୁହାଁମୁହିଁ ଧକ୍କା ହୋଇଥିଲା। ଧକ୍କା ଏତେ ଜୋରରେ ଥିଲା ଯେ ଧକ୍କାର ପ୍ରଚଣ୍ଡ ଶବ୍ଦରେ ଆଖପାଖ ଅଞ୍ଚଳର ଲୋକମାନେ ଭୟଭୀତ ହୋଇଯାଇଥିଲେ। ସ୍ଥାନୀୟ ଲୋକଙ୍କ ଦ୍ୱାରା ଖବର ପାଇଁ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।