ନୂଆଦିଲ୍ଲୀ: ଭାରତୀୟ ସେନା ପାକିସ୍ତାନ ଏବଂ ପାକ୍ ଅଧିକୃତ କାଶ୍ମୀରରେ ୨୫ ମିନିଟର ଅପରେସନରେ ଜୈଶ-ଏ-ମହମ୍ମଦର ପ୍ରତିଷ୍ଠାତା ମାସୁଦ ଆଝାରଙ୍କ ପରିବାରର ୧୪ ଜଣଙ୍କୁ ହତ୍ୟା କରାଯାଇଛି ବୋଲି ଏକ ସୋର୍ସ ରୁ ଜଣାପଡିଛି । ଅପରେସନ ସିନ୍ଦୁରରେ ନିହତ ଲୋକଙ୍କ ମଧ୍ୟରେ ମାସୁଦ ଆଝାରର ଭାଇ ଏବଂ ଭାରତର ମୋଷ୍ଟ ୱାଣ୍ଟେଡ୍ ଆତଙ୍କବାଦୀ ରଉଫ ଅସଗରଙ୍କ ପୁଅ ମଧ୍ୟ ସାମିଲ ଥିଲା। ରଉଫ ଅସଗର ଗୁରୁତର ଆହତ ହୋଇଥିଲେ । ଭାରତୀୟ ସଶସ୍ତ୍ର ବାହିନୀ ଜୈଶ-ଏ-ମହମ୍ମଦର ଗଡ଼ ବାହାବଲପୁର ଏବଂ ଲସ୍କର-ଏ-ତୈବାର ମୁରିଦକେ ଘାଟି ସମେତ ଆତଙ୍କବାଦୀ ଲକ୍ଷ୍ୟସ୍ଥଳ ଉପରେ କ୍ଷେପଣାସ୍ତ୍ର ଆକ୍ରମଣ କରିଥିଲେ। ପହଲଗାମ୍ ଆକ୍ରମଣରେ ୨୬ ଜଣ ସାଧାରଣ ନାଗରିକଙ୍କ ମୃତ୍ୟୁ ହେବାର ଦୁଇ ସପ୍ତାହ ପରେ ଅପରେସନ୍ ସିନ୍ଦୁର ଅଧୀନରେ ସାମରିକ ଆକ୍ରମଣ କରାଯାଇଥିଲା।
ଏକ ସାମ୍ବାଦିକ ସମ୍ମିଳନୀରେ, ବୈଦେଶିକ ସଚିବ ବିକ୍ରମ ମିଶ୍ରୀ, କର୍ଣ୍ଣେଲ ସୋଫିଆ କ୍ୟୁରେସି ଏବଂ ୱିଙ୍ଗ କମାଣ୍ଡର ବ୍ୟୋମିକା ସିଂହ ୨୫ ମିନିଟ୍ ଧରି ଚାଲିଥିବା ଅପରେସନ୍ ବିଷୟରେ ଗଣମାଧ୍ୟମକୁ ସୂଚନା ଦେଇଥିଲେ। ମିଶ୍ରୀ କହିଛନ୍ତି, ଆକ୍ରମଣ ପରଠାରୁ ପନ୍ଦର ଦିନ ବିତିଯାଇଥିଲେ ମଧ୍ୟ, ପାକିସ୍ତାନ ପକ୍ଷରୁ ଏହାର ଅଞ୍ଚଳ କିମ୍ବା ନିୟନ୍ତ୍ରଣାଧୀନ ଅଞ୍ଚଳରେ ଆତଙ୍କବାଦୀ ଭିତ୍ତିଭୂମି ବିରୁଦ୍ଧରେ କାର୍ଯ୍ୟାନୁଷ୍ଠାନ ନେବା ପାଇଁ କୌଣସି ସ୍ପଷ୍ଟ ପଦକ୍ଷେପ ନିଆଯାଇନାହିଁ। ଏହା ବଦଳରେ ଏହା କେବଳ ଅସ୍ୱୀକାର ଏବଂ ଅଭିଯୋଗରେ ଲିପ୍ତ ରହିଛି । ମିଶ୍ରି ଆହୁରି କହିଛନ୍ତି , ପାକିସ୍ତାନ-ଭିତ୍ତିକ ଆତଙ୍କବାଦୀ ମଡ୍ୟୁଲ୍ ଉପରେ ଆମର ଗୁଇନ୍ଦା ନଜର ସୂଚାଇ ଦେଇଛି ଯେ ଭାରତ ବିରୁଦ୍ଧରେ ଆହୁରି ଆକ୍ରମଣ ହେବାକୁ ଯାଉଛି ।
