ନୂଆଦିଲ୍ଲୀ: ବାହାଘର ପରେ ସ୍ୱାମୀ-ସ୍ତ୍ରୀଙ୍କ ମଧ୍ୟରେ ଝଗଡ଼ାର ଅନେକ ଖବର ଆପଣମାନେ ଶୁଣିଥିବେ । କେତେକ ମାମଲା ଥାନାରୁ ନେଇ କୋର୍ଟରେ ପହଞ୍ଚିଯାଏ । କିନ୍ତୁ ପତି-ପତ୍ନୀଙ୍କ ମଧ୍ୟରେ ଏପରି କିଛି ମାମଲା ରହିଛି ଯାହାକୁ ସେମାନେ ଗୋପନୀୟ ରଖନ୍ତି । ଏଥିରେ ପରସ୍ପର ମଧ୍ୟରେ ଗୋପନୀୟତା ରହିଥାଏ । ସ୍ୱାମୀ-ସ୍ତ୍ରୀଙ୍କ ମଧ୍ୟରେ ଯୌନ ସମ୍ପର୍କ ସେହିପରି ଏକ ମାମଲା । ସ୍ୱାମୀ-ସ୍ତ୍ରୀଙ୍କ ମଧ୍ୟରେ ଏହା ସ୍ୱାଭାବିକ ଓ ଜରୁରୀ ପ୍ରକ୍ରିୟା । କିନ୍ତୁ ଏହା ନହେଲେ ଆପଣ ଏହାକୁ କ’ଣ କହିବେ । ତେବେ ଅହମ୍ମଦାବାଦରେ ଏପରି ଏକ ମାମଲା ସାମ୍ନାକୁ ଆସିଛି । କିନ୍ତୁ ପତ୍ନୀ ନିଜ ସେକ୍ସ ଅଧିକାରକୁ ପାଇବା ପାଇଁ ଥାନାର ଦ୍ୱାରସ୍ଥ ହୋଇଛନ୍ତି । ମହିଳାଙ୍କ ସ୍ୱାମୀ ତାଙ୍କ ସହ ସେକ୍ସ କରିବାକୁ ମନା କରିଛନ୍ତି । ମହିଳା ଜଣକ ଏଥିରେ ରାଗିଯାଇ ନିଜ ସ୍ୱାମୀଙ୍କ ବିରୋଧରେ ଥାନାରେ ମାମଲା ରୁଜୁ କରିଛନ୍ତି । ଅହମ୍ମଦାବାଦରେ ଏହି ୩୩ ବର୍ଷିୟା ମହିଳା ଜଣକ ସାବରମତି ପୋଲିସ ଷ୍ଟେସନରେ ଅଭିଯୋଗ କରି ନ୍ୟାୟ ମାଗିଛନ୍ତି । ମହିଳାଙ୍କ ଅଭିଯୋଗ ଅନୁସାରେ, ବାହାଘରର ଏକ ବର୍ଷ ଯାଏଁ ସ୍ୱାମୀ ତାଙ୍କ ସହ କୌଣସି ଯୌନ ସମ୍ପର୍କ ରଖିନଥିଲେ । ଏନେଇ କହିବାରୁ ପାଟିତୁଣ୍ଡ ଓ ନିର୍ଯ୍ୟାତନା ସହିବାକୁ ପଡିଥିଲା । ଶେଷରେ ଥକ୍କି ପଡ଼ି ମହିଳା ଜଣକ ଅଭିଯୋଗ କରିବାକୁ ଥାନାରେ ପହଞ୍ଚିଛନ୍ତି । ଗତବର୍ଷ ଫେବ୍ରୁଆରୀ ମାସରେ ବଡୋଦରାରେ ଜଣେ ଯୁବକଙ୍କ ସହ ମହିଳାଙ୍କର ବାହାଘର ହୋଇଥିଲା । ବାହାଘର ୱେବସାଇଟରୁ ଉଭୟେ ଭେଟ ହୋଇଥିଲେ । ବର୍ଷକ ମଧ୍ୟରେ ପୁତ୍ର ସନ୍ତାନ ଜନ୍ମ କରିବାକୁ ପରିବାର ଲୋକେ କହିଥିଲେ । କିନ୍ତୁ ବର୍ତ୍ତମାନ ସୁଦ୍ଧା ସ୍ୱାମୀ ତାଙ୍କୁ ଛୁଇଁନଥିବା ସେ ଅଭିଯୋଗ କରିଛନ୍ତି । ମହିଳାଙ୍କ କହିବା ମୁତାବକ, ‘ମୋ ସ୍ୱାମୀ ରାତିରେ ଅଜବ ପୋଷାକ ପିନ୍ଧନ୍ତି । ଯେବେ ମୁଁ ତାଙ୍କୁ ସେକ୍ସ ପାଇଁ କୁହେ ସେ କୁହନ୍ତି କି, ମୁଁ ଜଣେ ପୁରୁଷ ପରି ଦେଖାଯାଉଛି କି? ସେ ମୋ ସହ ସମ୍ପର୍କ ରଖିପାରିଲେ ନାହିଁ । ଯେତେବେଳେ ବି ମୁଁ ତାଙ୍କ ସହ ଏହି ମାମଲାରେ କଥା ହୁଏ, ସେ ମୋ ଗଳା ଚିପିବା ସହ ନିର୍ଯ୍ୟାତନା ଦିଅନ୍ତି । ମୋ ସ୍ୱାମୀ ପ୍ରାୟତଃ ଆଇଭିଏଫ୍ ମାଧ୍ୟମରେ ସନ୍ତାନ ଜନ୍ମ ପରିବାକୁ କୁହନ୍ତି । ମୁଁ ମନା କରିବାରୁ ମୋତେ ଧକ୍କା ମାରିବା ସହ ଘରୁ ତଡ଼ିଦେଲେ । ଏବେ ମୋତେ ଫେରାଇ ନେବାକୁ ୨୫ ଲକ୍ଷ ଟଙ୍କା ଯୌତୁକ ଦାବି କରୁଛନ୍ତି ।