ନୂଆଦିଲ୍ଲୀ : ହିନ୍ଦୁ ଧର୍ମରେ ସମସ୍ତ ରୀତିନୀତି, ପୂଜାପର୍ବରେ ନଡ଼ିଆ ଖୋଜା ପଡ଼େ । ପ୍ରତ୍ୟେକ ଶୁଭକାମ ବିବାହ ବ୍ରତ, ଘର ପ୍ରତିଷ୍ଠା ବା ଗୃହ ପ୍ରବେଶ, ବ୍ୟବସାୟ ଆରମ୍ଭ, ଯାହା ବି ହେଉ ନଡ଼ିଆ ଭାଙ୍ଗିବା ସହିତ ଏହା ଆରମ୍ଭ ହୁଏ । ତେବେ ଦେବ କାମରେ ନଡ଼ିଆକୁ ଏତେ ପ୍ରାଧାନ୍ୟ ଦେବା ପଛରେ ରହିଛି ବିଶେଷ କାରଣ । ଏ ସମ୍ପର୍କରେ ଆସନ୍ତୁ ଜାଣିବା…ନଡ଼ିଆ ଗଛ ଅତି ଉଚ୍ଚା ହୋଇଥିବାବେଳେ ନଡ଼ିଆ ଫଳ ବି ସେହି ଉଚ୍ଚରେ ହିଁ ଫଳେ । ପୁଣି ନଡ଼ିଆର ବାହାର ଅଂଶ ଅତିଶକ୍ତ । ଏଣୁ କୌଣସି ଜୀବଜନ୍ତୁ,କୀଟପତଙ୍ଗ,ପକ୍ଷୀ ଏଥିରେ ମୁହଁ ମାରିପାରନ୍ତି ନାହିଁ । ଏଣୁ ନଡ଼ିଆ ଫଳ ଅନାୟାସରେ ଦେବ ଯୋଗ୍ୟ ହୋଇପାରିଥାଏ ।
ନଡ଼ିଆ ପାଣିକୁ ଅତି ପବିତ୍ର ମନେ କରାଯାଏ । ଏହାକୁ ପିଟି ଭାଙ୍ଗିବା ସହ ନଡ଼ିଆ ପାଣି ଚାରିପଟକୁ ଛିଞ୍ଚାଡ଼ି ହୋଇପଡ଼େ । ଯଦ୍ୱାରା ଦୁଷ୍ଟଶକ୍ତି ସେହି ସ୍ଥଳରୁ ଦୂରେଇ ଯାଇଥାନ୍ତି ବୋଲି ବିଶ୍ୱାସ ରହିଛି । ଯେଉଁଥି ପାଇଁ କୌଣସି କାର୍ଯ୍ୟ ଆରମ୍ଭରେ ନଡ଼ିଆ ଭାଙ୍ଗିବାର ପରମ୍ପରା ରହିଛି ।