ଅକଲାଣ୍ଡ : ଘରୋଇ ନ୍ୟୁଜିଲାଣ୍ଡ ଓ ଭ୍ରମଣକାରୀ ଭାରତ ମଧ୍ୟରେ ଶୁକ୍ରବାର ଏଠାରେ ଥିବା ଇଡେନ୍ ପାର୍କରେ ପ୍ରଥମ ଟି-୨୦ ମ୍ୟାଚ୍ ଖେଳାଯିବ । ପ୍ରଥମ ଥର ପାଇଁ ଭାରତ ଏହି ଗସ୍ତରେ ୫ଟି ଟି-୨୦ ମ୍ୟାଚ୍ ଖେଳିବ । ନ୍ୟୁଜିଲାଣ୍ଡରେ ବର୍ତମାନ ସୁଦ୍ଧା ଗୋଟିଏ ବି ଟି-୨୦ ସିରିଜ ଜିତିନଥିବା ଭାରତ ଏହି ମ୍ୟାଚ୍ ଜିତି ସିରିଜ ବିଜୟ ପାଇଁ ଅଭିଯାନ ଆରମ୍ଭ କରିବ । ଅଷ୍ଟ୍ରେଲିଆକୁ ଘରୋଇ ପଡିଆରେ ଦିନିକିଆ ସିରିଜ ପରାସ୍ତ କରି ବିରାଟ କୋହଲିଙ୍କ ନେତୃତ୍ୱାଧୀନ ଭାରତ ଏବେ ଭଲ ଫର୍ମରେ ରହିଛି । ଦଳ ଉଭୟ ବ୍ୟାଟିଂ ଓ ବୋଲିଂରେ ଶ୍ରେଷ୍ଠ ଫର୍ମରେ ରହିଛି ।
ଦଳର ବର୍ତମାନର ପ୍ରଦର୍ଶନ ଭାରତକୁ ମ୍ୟାଚ୍ ଜିତାଇବାର ସମ୍ଭାବନା ସୃଷ୍ଟି କରୁଛି । କିନ୍ତୁ ଘରୋଇ ପରିବେଶରେ ଅତୀତରେ ନ୍ୟୁଜିଲାଣ୍ଡର ପଲା ଭାରତ ଉପରେ ସବୁବେଳେ ଭାରି ରହିଛି, ଯାହାର ଫାଇଦା ନେବାକୁ ଦଳ ଏଠାରେ ଚାହିଁବ । କେନ୍ ୱିଲିୟମସନଙ୍କ ନେତୃତ୍ୱରେ ନ୍ୟୁଜିଲାଣ୍ଡ ଏହି ମ୍ୟାଚ୍ ଜିତି ଭାରତ ଉପରେ ଆରମ୍ଭରୁ ଚାପ ପକାଇବାକୁ ଉଦ୍ୟମ କରିବ । ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ବର୍ତମାନ ସୁଦ୍ଧା ସମୁଦାୟ ୧୨ଟି ଟି-୨୦ ମ୍ୟାଚ୍ ଖେଳାଯାଇଛି । ଏହାମଧ୍ୟରୁ ନ୍ୟୁଜିଲାଣ୍ଡ ୮ଟି ମ୍ୟାଚ୍ ଜିତିଥିବା ବେଳେ ଭାରତ ୩ଟି ଜିତିଛି । ଗୋଟିଏ ମ୍ୟାଚ୍ ବାତିଲ ହୋଇଥିଲା । ସେହିପରି ନ୍ୟୁଜିଲାଣ୍ଡରେ ଉଭୟ ଦଳ ମଧ୍ୟରେ ଦୁଇଟି ସିରିଜରେ ୫ଟି ମ୍ୟାଚ୍ ଖେଳାଯାଇଛି । ଏହାମଧ୍ୟରୁ ଭାରତ ଗୋଟିଏ ମ୍ୟାଚ୍ ଜିତିଥିବା ବେଳେ ଉଭୟ ସିରିଜ ନ୍ୟୁଜିଲାଣ୍ଡ ନାମରେ ରହିଛି ।
ଭାରତ : ବିରାଟ କୋହଲି (ଅଧିନାୟକ), ରୋହିତ ଶର୍ମା (ଉପଅଧିନାୟକ), ଲୋକେଶ ରାହୁଲ, ଶ୍ରେୟସ ଆୟର, ମନୀଷ ପାଣ୍ଡେ, ଋଷଭ ପନ୍ତ୍ (ୱିକେଟକିପର), ରବୀନ୍ଦ୍ର ଜାଡେଜା/ ୱାଶିଂଟନ୍ ସୁନ୍ଦର, କୁଲଦୀପ ଯାଦବ, ଯଶ୍ପ୍ରୀତ ବୁମ୍ରା, ମହମ୍ମଦ୍ ଶମୀ, ନଭଦୀପ ସୈନୀ ।
ନ୍ୟୁଜିଲାଣ୍ଡ : ମାର୍ଟିନ୍ ଗପ୍ଟିଲ, କଲିନ୍ ମୁନରୋ, କେନ୍ ୱିଲିୟମ୍ସନ୍ (ଅଧିନାୟକ), ଟିମ୍ ସିଫର୍ଟ (ୱିକେଟକିପର), କଲିନ୍ ଡି’ ଗ୍ରାଣ୍ଡହୋମ, ରସ୍ ଟେଲର, ଡାରେଲ ମିଚେଲ, ମିଚେଲ ସାଂଟନର, ସ୍କଟ କୁଗେଲିନ, ଟିମ ସାଉଦୀ, ବ୍ଲେୟାର ଟିକନର
ଆଜି ନ୍ୟୁଜିଲାଣ୍ଡ-ଇଣ୍ଡିଆ ପ୍ରଥମ ଟି-୨୦
