ପାଟନା: ଭାରସାମ୍ୟ ହରାଇ ଲୋକଙ୍କ ଉପରେ ମାଡିଗଲା ଜିଲ୍ଲାପାଳଙ୍କ ଗାଡି । ଜିଲ୍ଲାପାଳଙ୍କ କାର୍ ଚକା ତଳେ ଚାଲିଗଲା ୩ ନିରୀହ ଜୀବନ । ଆଜି ବିହାରର ମଧୁବନି ଜିଲ୍ଲାରେ ଏହି ମର୍ମନ୍ତୁଦ ସଡକ ଦୁର୍ଘଟଣା ଘଟିଛି । ମଧେପୁରା ଜିଲ୍ଲାପାଳ ବିଜୟ ପ୍ରକାଶ ମୀନାଙ୍କ କାର୍ ଧକ୍କାରେ ୩ ଜଣଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିବା ବେଳେ ଏକାଧିକ ଆହତ ହୋଇଛନ୍ତି । ଆହତମାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ତେବେ ଜିଲ୍ଲାପାଳଙ୍କ ଗାଡି ଦ୍ରୁତଗତିରେ ଆସୁଥିବା ବେଳେ ଭାରସାମ୍ୟ ହରାଇ ଲୋକଙ୍କ ଉପରେ ଚଢିଯାଇଥିବା ସୂଚନା ରହିଛି ।
ସୂଚନା ଅନୁଯାୟୀ, ଆଜି ସକାଳେ ବିହାରର ମଧୁବନି ଜିଲ୍ଲା ଅନ୍ତର୍ଗତ ପୁଲପରାସ ଥାନା ଅଞ୍ଚଳର ଲୋହିଆ ଛକ ନିକଟ ୫୭ ନମ୍ବର ଜାତୀୟ ରାଜପଥରେ ଏହି ମର୍ମନ୍ତୁଦ ସଡକ ଦୁର୍ଘଟଣା ଘଟିଛି । ଏକ କାର ଦ୍ରୁତ ଗତିରେ ଆସି ଲୋକମାନଙ୍କ ଉପରେ ଚଢାଇ ଚାଲିଯାଇଥିଲା । ଏହି ଦୁର୍ଘଟଣାରେ ୩ ଜଣଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିବା ବେଳେ ଏକାଧିକ ଆହତ ହୋଇଛନ୍ତି । ଆହତମାନଙ୍କ ମଧ୍ୟରୁ ୨ ଜଣଙ୍କ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ଡାକ୍ତର ରେଫର କରିଛନ୍ତି ।
ତେବେ ଗାଡିଟି ମଧେପୁରା ଜିଲ୍ଲାପାଳ ବିଜୟ ପ୍ରକାଶ ମୀନାଙ୍କର ହୋଇଥିବା ଜଣାପଡିଛି । ଏନେଇ ପୋଲିସ ତଦନ୍ତ ଆରମ୍ଭ କରିଛି । ଜିଲ୍ଲାପାଳ ବିଜୟଙ୍କ ଗାଡି ରାଜଧାନୀ ପାଟନାରୁ ମଧେପୁରା ଅଭିମୁଖେ ଯାଉଥିଲା । ୫୭ ନଂ ଜାତୀୟ ରାଜପଥରେ ଗାଡି କିଛି ଲୋକଙ୍କ ଉପରେ ମାଡିଯିବା ପରେ ଭାରସାମ୍ୟ ହରାଇ ରାସ୍ତାକଡରେ ଏକ ଖୁଣ୍ଟରେ ପିଟି ହୋଇଯାଇଥିଲା । ଯେଉଁଥିରେ ଜିଲ୍ଲାପାଳଙ୍କ କାରର ସାମ୍ନା ପଟ ସମ୍ପୂର୍ଣ୍ଣ ଭାଙ୍ଗିରୁଜି ଯାଇଛି । ତେବେ ଦୁର୍ଘଟଣା ସମୟରେ ଗାଡି ଭିତରେ ଜିଲ୍ଲାପାଳ ଉପସ୍ଥିତ ଥିଲେ କି ନାହିଁ ସେନେଇ ବର୍ତ୍ତମାନ ସୁଦ୍ଧା ସ୍ପଷ୍ଟ ସୂଚନା ମିଳି ପାରିନାହିଁ ।
