ନୂଆଦିଲ୍ଲୀ : ସୁପ୍ରିମକୋର୍ଟଙ୍କର ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଚର୍ଚ୍ଚାର ପରିସରକୁ ଆସିଛି। କୋର୍ଟ କହିଛନ୍ତି ଯେ ସ୍ବାମୀ ତା’ର ସ୍ତ୍ରୀକୁ ଛାଡ଼ପତ୍ର ଦେଇଥିଲେ ତା’ର ଭରଣପୋଷଣ କରିବାକୁ ପଡ଼ିବ। ଏକ ମାମଲାର ଶୁଣାଣି କରି ସୁପ୍ରିମକୋର୍ଟ କହିଛନ୍ତି, ସ୍ତ୍ରୀ ଓ ପିଲାଙ୍କ ଭରଣପୋଷଣ କରିବା ପାଇଁ ସ୍ୱାମୀଙ୍କୁ ଶାରିରୀକ ପରିଶ୍ରମ କରିବା ପାଇଁ ପଡିଲେ ମଧ୍ୟ ସେ ଏହା କରିବାକୁ ବାଧ୍ୟ । ଏଥିପାଇଁ ସ୍ବାମୀକୁ ରୋଜଗାର କରିବାକୁ ପଡ଼ିବ। ଦରକାର ପଡ଼ିଲେ ଶାରୀରିକ ଶ୍ରମକରି ବା ଦିନମଜୁରି ଲାଗି ମଧ୍ୟ ସ୍ତ୍ରୀ-ପିଲାଙ୍କୁ ପୋଷିବାକୁ ପଡ଼ିବ।
ଯଦି ସ୍ୱାମୀ ଆଇନଗତ କାରଣରୁ ଶାରୀରିକ ଭାବରେ ସକ୍ଷମ ନୁହଁନ୍ତି ତେବେ ଏଥିରୁ ସେ ମୁକ୍ତ ହୋଇପାରିବେ । ଅଦାଲତ ଶୁଣାଣି ସମୟରେ କହିଛନ୍ତି ଯେ CrPC ର ଧାରା ୧୨୫ ଅନୁଯାୟୀ ରକ୍ଷଣାବେକ୍ଷଣ ବ୍ୟବସ୍ଥା ହେଉଛି ସାମାଜିକ ନ୍ୟାୟର ଏକ ମାପ ଯାହା ମହିଳା ଏବଂ ଶିଶୁଙ୍କ ସୁରକ୍ଷା ପାଇଁ ସ୍ୱତନ୍ତ୍ର ଭାବେ ପ୍ରସ୍ତୁତ କରାଯାଇଥିଲା । ତେଣୁ ମୋର ବ୍ୟବସାୟ ବନ୍ଦ ହୋଇଯାଇ ଥିବାରୁ ଏବେ କୌଣସି ଆୟପନ୍ଥା ନାହିଁ, ତେଣୁ ସ୍ତ୍ରୀ-ପିଲାଙ୍କୁ ଭରଣପୋଷଣ ଦେଇପାରିବି ନାହିଁ ବୋଲି କହୁଥିବା ସ୍ବାମୀଙ୍କ ଯୁକ୍ତିକୁ କୋର୍ଟ ଖାରଜ କରିଦେଇଛନ୍ତି।
ଏହାର ଆଦେଶରେ ଜଷ୍ଟିସ ଦୀନେଶ ମହେଶ୍ୱରୀ ଏବଂ ବେଲା ଏମ ତ୍ରିବେଦୀ କହିଛନ୍ତି ଯେ ଉତ୍ତରଦାତା (ସ୍ୱାମୀ) ଜଣେ ଶାରୀରିକ ଦକ୍ଷ ବ୍ୟକ୍ତି ହୋଇଥିବାରୁ ସେ ଆଇନଗତ ଉପାୟରେ ରୋଜଗାର କରିବାକୁ ବାଧ୍ୟ ହେବେ ଏବଂ ତାଙ୍କ ପତ୍ନୀ ଏବଂ ନାବାଳକ ପିଲାଙ୍କୁ ରକ୍ଷଣାବେକ୍ଷଣ ଯୋଗାଇ ଦେବେ। ଫ୍ୟାମିଲି କୋର୍ଟରେ ଆବେଦନକାରୀ-ପତ୍ନୀଙ୍କ ପ୍ରମାଣ ଏବଂ ରେକର୍ଡରେ ଥିବା ଅନ୍ୟାନ୍ୟ ପ୍ରମାଣକୁ ଦୃଷ୍ଟିରେ ରଖି କହିଛନ୍ତି ଯେ ଅଭିଯୁକ୍ତର ପର୍ଯ୍ୟାପ୍ତ ପରିମାଣର ଆୟ ଉତ୍ସ ଅଛି ଏବଂ ସେ ସକ୍ଷମ ମାତ୍ର ସେ ଜାଣିଶୁଣି ଦେଇନାହାନ୍ତି ବା ଅବହେଳା କରିଛନ୍ତି, ଯାହା ଗ୍ରହଣୀୟ ନୁହେଁ। ସୁପ୍ରିମକୋର୍ଟ ଉକ୍ତ ବ୍ୟକ୍ତିଙ୍କୁ ତାଙ୍କ ପତ୍ନୀଙ୍କୁ ମାସିକ ୧୦ହଜାର ଟଙ୍କା ଏବଂ ନାବାଳକ ପୁଅକୁ ୬ହଜା ଟଙ୍କା ରକ୍ଷଣାବେକ୍ଷଣ ଭତ୍ତା ଦେବାକୁ ନିର୍ଦ୍ଦେଶ ଦେଇଛନ୍ତି। ଏହା ପୂର୍ବରୁ ପଞ୍ଜାବ ଓ ହରିୟାଣା ହାଇକୋର୍ଟ ସ୍ବାମୀଙ୍କ ସପକ୍ଷରେ ଦେଇଥିବା ରାୟକୁ କୋର୍ଟ ଖାରଜ କରିଦେଇଥିଲେ।
