ପାଦଚିହ୍ନ

 

ଅଗ୍ରଓ୍ଵାଲ୍ ଜୋତା ଶୋ ରୁମରେ ମୁଁ ବସିଥାଏ ମୋର ଅଫିସ ଜୋତା ହଳେ ନେବାପାଇଁ । ମୋ ପାଦକୁ ଦେଖି ତାଙ୍କର ସେଲ୍ସ ମେନ ଜୋତା ଗଦା କରି ଚାଲିଥାଏ । ହଠାତ ଯୁବକଟିଏ ଧଇଁସଇଁ ହେଇ ପଶି ଆସିଲା । ସେ ବହୁତ ଜଲଦିରେ ଥିଲା ପରି ଜଣା ପଡୁଥାଏ ।

ସେ ସିଧା ଦୋକାନ ମାଲିକଙ୍କୁ ପଚାରିଲା ,

– ଆଜ୍ଞା ଲେଡିଜ ଚପଲ ହଳେ ନେଇଥାନ୍ତି ।

– କେମିତି ଜୋତା ଆଉ କେଉଁ ରେଞ୍ଜରେ ନେବେ ଆପଣ ।

– ରେଞ୍ଜ ପାଇଁ ଆପଣ ଚିନ୍ତା କରନ୍ତୁ ନାହିଁ । ମଜବୁତ ଓ ଆରାମଦାୟକ ହେବା ନିହାତି ଆବଶ୍ୟକ ।

– ତେବେ ମାପ କେତେ ?

ଗୋଟାଏ ଚାରି ଚଉତା କାଗଜକୁ ଖୋଲୁ ଖୋଲୁ ସେ ସ୍ଵଗତ ଭୁଟୁଭୁଟୁ ହେଉଥିଲା ।

– ସେ କଣ କେବେ ଜୋତା ନାଇଛି ଯେ ମାପ କେତେ ଜାଣିବି ,
ପୁଣି ଯୋରରେ କହିଲା

– ଏଇଟା ମୋ ମାଆର ପାଦଚିହ୍ନ । ଏଇ ମାପରେ ଚପଲ ଦିଅନ୍ତୁ । ଟିକେ ଶୀଘ୍ର , ମୋର ଟ୍ରେନ୍ ଟାଇମ ହେଇ ଯାଉଛି ।

ଅଗ୍ରଓ୍ଵାଲ୍ ଜୀ ଆଶ୍ଚର୍ଯ୍ୟ ହୋଇ ସେଇ କାଗଜକୁ ଦେଖୁଥାନ୍ତି । ସେଥିରେ କାଦୁଅ ନଟପଟ ପାଦଚିହ୍ନ ଟିଏ ।

ଯୁବକଟି ତାଙ୍କର ହାବଭାବ ଠଉରେଇ କହିଲା ,

– ମୋ ମାଆ ରାଜମିସ୍ତ୍ରୀ ପାଖରେ ରେଜା କାମ କରି ମୋତେ ମଣିଷ କରିଛି । ଆଜି ମୋତେ ପ୍ରଥମ ଦରମା ମିଳିଲା ତ । ମୋ ମାଆ ପାଇଁ କଣ ଉପହାର ନେବି ଭାବି ଭାବି ଠିକ୍ କଲି ଯେ ମୋ ମାଆ ଖାଲି ପାଦରେ ଚାଲି , କାମକରି ତା ପାଦକୁ ଘାଇଲା କରି ଦେଇଛି ମୋରି ଉନ୍ନତି ପାଇଁ । ତେଣୁ ଏଇ ଚପଲଠାରୁ ଅଧିକ ସୁନ୍ଦର ଉପହାର ଆଉ କଣ ହୋଇପାରେ ?

– ଦେଖିଲ ଏଇ ଚପଲଟା ପସନ୍ଦ ଆସୁଛି ? ଏହାର ଦାମ୍ ହଜାରେ ଟଙ୍କା ।

– ହେଉ ହଜାରେ ଟଙ୍କା । ଏଇଟାକୁ ପ୍ୟାକ କରି ଦିଅନ୍ତୁ ।

– ବାବୁ , ତୁମର ଦରମା କେତେ ?

– ଆଜ୍ଞା ଦଶହଜାର ।

– ଦଶହଜାର ଦରମା ଦେଖି ହଜାରେ ଟଙ୍କା ଅଧିକ ହୋଇ ଯାଉନାହିଁ ?

– ହଁ , ଚଳିବ । ମୁଁ ପାଞ୍ଚହଜାରରେ ଚଳି ମାଆକୁ ବଳକା ଚାରି ହଜାର ଦେବି । ମୋତେ ଅବଶ୍ୟ ଟିକେ କଷ୍ଟ ହେବ । ମୋ ମାଆର କଷ୍ଟ ସାମନାରେ ଏଇ କଷ୍ଟ କିଛି ନୁହେଁ ।

ଅତ୍ୟନ୍ତ ପ୍ରଭାବିତ ହୋଇ ଅଗ୍ରଓ୍ଵାଲ୍ ଜୀ ତା ହାତକୁ ଦୁଇଟା ପ୍ୟାକେଟ ବଢ଼ାଇ ଦେଲେ ।

– ନିଅ ମୋ ତରଫରୁ ତୁମ ମାଆଙ୍କୁ ଆଉ ହଳେ ଜୋତା । ମାଆଙ୍କୁ କହିବ ସେ ଜୋତା ଛିଣ୍ଡି ଗଲେ ଏଇ ଜୋତା ପିନ୍ଧିବେ ।

ଯୁବକ ଜଣକ ଥତମତ ହୋଇ ପ୍ୟାକେଟ୍ ଧରି ଯିବାକୁ ବାହାରିଲାରୁ ଅଗ୍ରଓ୍ଵାଲ୍ ଜୀ କହିଲେ ।

-ସେ ପାଦଚିହ୍ନ ଥିବା କାଗଜଟା ଦେବ କି ?

କାଗଜ ଟି ଦେଇ ଯୁବକଟି ପଳେଇଲା । ମୁଁ ଆଶ୍ଚର୍ଯ୍ୟ ହୋଇ ଦେଖୁଥିଲି । ସେ କାଗଜଟିକୁ ଠାକୁର ପାଖରେ ସଜାଡି ରଖୁ ରଖୁ କହୁଥିଲେ ,

– ଏଇ ପାଦ ଚିହ୍ନ ସାମାନ୍ୟ ପାଦର ନୁହେଁ । ଏ ହେଉଛି ଲକ୍ଷ୍ମୀ ପାଦ । ସାକ୍ଷାତ ଉନ୍ନତି ଦାତ୍ରୀର ପାଦ । ଯେଉଁ ମାଆ ମଜଦୂରୀ କରି ଛୁଆକୁ ମଣିଷ କରି ପକାଏ ସେ ସତରେ ଲକ୍ଷ୍ମୀ ।

ମୁଁ ଭାବୁଥିଲି , ସତ୍ କର୍ମ ସତରେ ସଂକ୍ରାମକ ନୁହେଁ କି ? ( ଏକ ହିନ୍ଦୀ ଗପର ଛାୟାରେ )

ଆରତୀ ସାହୁ ( ଆଶା )
ବସନ୍ତ ବିହାର
ନୂଆଦିଲ୍ଲୀ

31 – 8 – 2020

LEAVE A REPLY

Please enter your comment!
Please enter your name here