ନୂଆଦିଲ୍ଲୀ: ଚଳିତମାସ ୧୯ରୁ ସଂସଦର ମୌସୁମୀ ଅଧିବେଶନ ଆରମ୍ଭ ହୋଇ ଅଗଷ୍ଟ ୧୩ ପର୍ଯ୍ୟନ୍ତ ଚାଲିବ । ଏହି ଅବସରରେ ଲୋକସଭା ବାଚସ୍ପତି ଓମ୍ ବିର୍ଲା ସୋମବାର ସ୍ଥିତି ସମୀକ୍ଷା କରିଛନ୍ତି । ୧୯ ଦିନ ଧରି ଚାଲିବାକୁ ଥିବା ଏହି ଅଧିବେଶନରେ ଉଭୟ ଗୃହ ସକାଳ ୧୧ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ କାର୍ଯ୍ୟ କରିବ ବୋଲି ସେ ସୂଚନା ଦେଇଛନ୍ତି । ସାଂସଦମାନେ ସାମାଜିକ ଦୂରତା ବଜାୟ ରଖିବେ। ଅଧିବେଶନରେ ଯୋଗଦେଉଥିବା ସାଂସଦ ଯଦି ଗୋଟିଏ ଡୋଜ୍ ଟିକା ନେଇଥିବେ ତେବେ ସେମାନଙ୍କ ପାଇଁ ଆରଟି-ପିସିଆର ରିପୋର୍ଟ ବାଧ୍ୟତାମୂଳକ ନୁହେଁ, ତଥାପି ଟିକା ନେଇନଥିବା ସାଂସଦ ଏହି ପରୀକ୍ଷା କରାଇନେବାକୁ ସେ ପରାମର୍ଶ ଦେଇଛନ୍ତି । ଏପର୍ଯ୍ୟନ୍ତ ଲୋକସଭାର ୪୪୪ ଓ ରାଜ୍ୟସଭାର ୨୧୮ ସାଂସଦ ଟିକା ନେଇସାରିଛନ୍ତି । ଟିକାକରଣ ପ୍ରସଙ୍ଗରେ ଅନ୍ୟ ୩୦ ସାଂସଦଙ୍କ ରିପୋର୍ଟକୁ ଅପେକ୍ଷା କରାଯାଇଛି ବୋଲି ବିର୍ଲା କହିଛନ୍ତି ।