କଟକ : ରାଜ୍ୟର ସର୍ବପୁରାତନ ମେଡିକାଲ ଭାବେ ପରିଚିତ ଶ୍ରୀରାମଚନ୍ଦ୍ରଭଞ୍ଜ ମେଡିକାଲ କଲେଜ ଓ ହସ୍ପିଟାଲ । ଏହି ପୁରାତନ ମେଡିକାଲକୁ ବିଶ୍ୱ ସ୍ତରୀୟ ଅନୁଷ୍ଠାନରେ ପରିଣତ କରି ରୋଗୀଙ୍କୁ ଏମସ ପ୍ଲସର ଉନ୍ନତ ସେବା ଯୋଗାଇ ଦେବା ଲାଗି ସରକାର ଯୋଜନା ପରେ ଯୋଜନା କରୁଛନ୍ତି । ବିଭିନ୍ନ ଯୋଜନା ଜାରି ରହିଥିଲେ ମଧ୍ୟ ରୋଗୀଙ୍କୁ ଚିକିତ୍ସା ଠିକ ଭାବରେ ମିଳୁନଥିବା ବେଳେ ରୋଗୀଙ୍କ ସଠିକ ତଥ୍ୟ ପ୍ରଦାନ କରାଯାଉନଥିବା ଅଭିଯୋଗ ହେଉଛି । ବିଶେଷ କରି କରୋନା ରୋଗୀଙ୍କ କ୍ଷେତ୍ରରେ ଏହା ଦେଖିବାକୁ ମିଳୁଛି । ରୋଗୀଙ୍କ ମୃତ୍ୟୁ ପରେ ସେମାନଙ୍କ ପରିବାର ଲୋକଙ୍କୁ ଖବର ଦିଆଯାଉନଥିବା ଅଭିଯୋଗ ହେଉଛି । ଫଳରେ ମୃତକଙ୍କ ଶବ ଦିନ ପରେ ଦିନ ପଡି ଦୁର୍ଗନ୍ଦ ହେଉଛି । ଯଦି ମୃତକଙ୍କ ସମ୍ପର୍କୀୟ ପହଞ୍ଚିବାରେ ବିଳମ୍ବ ହେଉଛି ତେବେ ଶବକୁ ଶଶ୍ମାନକୁ ପଠାଦିଆଯାଉଛି । ମୃତକଙ୍କ ପରିବାରକୁ ଶେଷ ଦର୍ଶନରୁ ମଧ୍ୟ ବଞ୍ଚିତ କରାଯାଉଛି ।
ଏଭଳି ହେବା ଦ୍ୱାରା ରୋଗୀ ସମ୍ପର୍କୀୟ ମେଡିକାଲରୁ ଶଶ୍ମାନ ପର୍ଯ୍ୟନ୍ତ ଦୌଡ଼ି ଦୌଡ଼ି ଶବକୁ ଚିହ୍ନଟ ନକରି ପାରି ନିରାଶରେ ଫେରୁଛନ୍ତି । ମେଡିକାଲ କର୍ମଚାରୀଙ୍କ ବେପରୁଆ ମନୋଭାବ ଯୋଗୁଁ ଏପରି ହେଉଥିବା ଅଭିଯୋଗ ହେଉଛି । କେବଳ ଜଣେ ରୋଗୀଙ୍କ କ୍ଷେତ୍ରରେ ଏପରି ହେଉନାହିଁ ଶହ ଶହ ରୋଗୀଙ୍କ ସମ୍ପର୍କୀୟମାନେ ଏପରି ଅସୁବିଧାର ସମ୍ମୁଖୀନ ହେଉଛନ୍ତି । ଅଭିଯୋଗ ହେବା ପରେ ମଧ୍ୟ କୌଣିସ ସୁଫଳ ମିଳିପାରୁନାହିଁ । ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ଏସସିବି କରୋନା ୱାର୍ଡରେ ଚିିକତ୍ସିତ ରୋଗୀଙ୍କ ନିକଟରେ । ଜଗତସିଂହପୁର ଅରଖପାରିର ଝୁମ୍ପା ମହାରଣା(୮୫) ବର୍ଷୀୟ ବୃଦ୍ଧାଙ୍କ ଠାରେ କରୋନା ଲକ୍ଷଣ ଦେଖା ଦେବାରୁ ଜଗତସିଂହପୁର ମେଡିକାଲରେ ପରୀକ୍ଷା କରାଇଥିଲେ । ତାଙ୍କ ରିପୋର୍ଟ ପଜିଟିଭ ବାହାରିବାରୁ ଡାକ୍ତର ତାଙ୍କୁ ଏସସିବି ମେଡିକାଲକୁ ଯିବା ଲାଗି ପରାମର୍ଶ ଦେଇଥିଲେ । ଗତ ୨୧ ତାରିଖରେ ଡାକ୍ତରଙ୍କ ପରାମର୍ଶ କ୍ରମେ ପରିବାର ଲୋକ ଝୁମ୍ପାଙ୍କୁ ଏସସିବି କୋଭିଡ ୱାର୍ଡରେ ଚିକିତ୍ସା ଲାଗି ଭର୍ତ୍ତି କରିଥିଲେ ।
ଗତ ଦୁଇ ଦିନ ହେବ ଆଟେଣ୍ଡାଣ୍ଟ ସେଠାରେ ବାହାରେ ରହି ତାଙ୍କର ସ୍ୱାସ୍ଥ୍ୟବସ୍ଥା ସମ୍ପର୍କରେ ବୁଝୁଥିଲେ । ସେ ସୁସ୍ଥ ଥିବା ଜଣାପଡିଥିଲା । କୋଭିଡ ୱାର୍ଡରେ ରୋଗୀ ଆଟେଣ୍ଡାଣ୍ଟଙ୍କୁ ଭିତରକୁ ଛାଡିବାକୁ ଦିଆଯାଉନାହିଁ । ତେବେ ମେଡିକାଲରେ ରହିବା ଲାଗି ସୁବିଧା ନଥିବାରୁ ପରିବାର ଲୋକ ଘରକୁ ପଲେଇ ଯାଇଥିଲେ । ଶନିବାର ମେଡିକାଲରେ ପହଞ୍ଚି ରୋଗୀଙ୍କ ସ୍ୱାସ୍ଥ୍ୟବସ୍ଥା ପଚାରିବାରୁ ତାଙ୍କୁ କୌଣିସ ଉତ୍ତର ମିଳିନଥିଲା କିମ୍ବା ରୋଗୀଙ୍କୁ ଦେଖା କରିବାକୁ ମଧ୍ୟ ଛାଡି ନଥିଲେ । କୋଭିଡ ଫାଟକ ସମ୍ମୁଖରେ ଯେତେ କାକୁତି ମିନତି ହେଲେ ମଧ୍ୟ ସୁରକ୍ଷା କର୍ମୀ ଆଟେଣ୍ଡାଙ୍କୁ ଭିତରକୁ ଛାଡି ନଥିଲେ । ଅନେକ ସମୟ ଠିଆ ହେବା ପରେ ସେଠାରୁ ଖବର ମିଳିଲା ଯେ, ରୋଗୀଙ୍କୁ ଡାଇରିଆ ୱାର୍ଡରେ ଭର୍ତ୍ତି କରାଯାଇଛି । ସେଠାରେ ପହଞ୍ଚିବା ପରେ ସେଠାରେ ଥିବା କର୍ମଚାରୀ କହିଥିଲେ ରୋଗୀର ଗତ ୩ ତାରିଖରେ ମୃତ୍ୟୁ ଘଟିଛି । ମୃତ୍ୟୁର ସ୍ପଷ୍ଟୀକରଣ ଲାଗି ଏସସିବି ଫାଣ୍ଡିରେ ଯାଇ ପରିବାର ଲୋକ ପହଞ୍ଚିଲା ବେଳକୁ ସେଠାରେ ଏକ ଭିନ୍ନ କଥା ଶୁଣିବାକୁ ମିଳିଥିଲା । ରୋଗୀର ମୃତ୍ୟୁ ଗତ ୨୭ ତାରିଖରେ ହୋଇଛି ବୋଲି ଫାଣ୍ଡି କର୍ମଚାରୀ କହିଥିଲେ ।
ରୋଗୀ ମୃତ୍ୟୁର ଦୁଇଟି ତଥ୍ୟ ସାମ୍ନାକୁ ଆସିବା ପରେ ପରିବାର ଲୋକ ଚିନ୍ତାରେ ପଡିଯାଇଥିଲେ । କେଉଁଟା ଠିକ କେଉଁଟା ଭୁଲ ତାହା ନଜାଣି ପାରି ସେମାନେ ହରଡ ଘଣାରେ ପଡ଼ିଥିଲେ । ରୋଗୀ ଶବ କେଉଁଠାରେ ଚିହ୍ନଟ ହେବ କେଉଁ ତାରିଖରେ ତାଙ୍କର ମୃତ୍ୟୁ ଘଟିଛି ତାହା ଏବେ ପ୍ରଶ୍ନବାଚୀ ସୃଷ୍ଟି କରିଛି । ଶବ ଦାହ କରାଯାଇଛି କି ନାହିଁ ତାହା ଏବେ ସନ୍ଦେହ ଘେରରେ ରହିଛି । ଅନ୍ୟପକ୍ଷରେ କୋଭିଡ଼ ରୋଗୀଙ୍କ ମୃତ୍ୟୁ ଘଟିଲେ ସେମାନଙ୍କ ପରିବାର ଲୋକଙ୍କୁ ଫୋନ ଯୋଗେ ଖବର ଦିଆଯାଇଥାଏ । ରୋଗୀର ଶେଷ ଦର୍ଶନ କରିବା ସହିତ ମୃତକଙ୍କୁ ଚିହ୍ନଟ କରିବା ପାଇଁ ସଂପର୍କୀୟ ଆସିଥାନ୍ତି । କିନ୍ତୁ ଏ କ୍ଷେତ୍ରରେ ଏସସିବି ପକ୍ଷରୁ ମୃ୍ତକଙ୍କ ପରିବାର ଲୋକଙ୍କୁ କୌଣସି ଫୋନ ଯାଇନଥିଲା ବୋଲି ଅଭିଯୋଗ ହୋଇଛି । ଏଭଳି ଘଟଣା ବାରମ୍ବାର ଘଟୁଥିବା ବେଳେ ମେଡିକାଲ କର୍ତ୍ତୃପକ୍ଷ ଏଥିପ୍ରତି ଧ୍ୟାନ ଦେଉନଥିବା ରୋଗୀ ସଂପର୍କୀୟମାନେ ଅଭିଯୋଗ କରୁଛନ୍ତି ।