ଭୁବନେଶ୍ୱର: ବାତ୍ୟା ‘ଅର୍ଣ୍ଣବ’ ଏବଂ ଏହାର ପରବର୍ତ୍ତୀ ପ୍ରବଳ ବର୍ଷା ଓ ବନ୍ୟା ଯୋଗୁଁ କ୍ଷତିଗ୍ରସ୍ତ ହୋଇଥିବା ଜିଲ୍ଲାଗୁଡ଼ିକର ତ୍ୱରିତ ପୁନରୁଦ୍ଧାର ପାଇଁ ପଞ୍ଚାୟତିରାଜ ଓ ପାନୀୟ ଜଳ ବିଭାଗ କୁ ଅର୍ଥ ମଞ୍ଜୁର କରାଯାଇଛି । ସ୍ୱତନ୍ତ୍ର ରିଲିଫ୍ କମିଶନର (ଏସ୍‌ଡିଆର୍‌ଏଫ୍‌) ପାଣ୍ଠିରୁ ବିଭିନ୍ନ କ୍ଷତିଗ୍ରସ୍ତ ପ୍ରକଳ୍ପର ମରାମତି ଏବଂ ପୁନର୍ନିର୍ମାଣ ନିମନ୍ତେ ମୋଟ୍ ୪୮୨ କୋଟି ୪୨ ଲକ୍ଷ ଟଙ୍କା ପ୍ରଦାନ କରାଯାଇଛି। ଏହି ପ୍ରଳୟଙ୍କରୀ ବାତ୍ୟା ଓ ବନ୍ୟା ଯୋଗୁଁ ରାଜ୍ୟର ମୋଟ ୬ଟି ଜିଲ୍ଲା ବିଶେଷ ଭାବେ ପ୍ରଭାବିତ ହୋଇଛି। ସେଥିମଧ୍ୟରୁ ଗଞ୍ଜାମ ଜିଲ୍ଲା ସର୍ବାଧିକ କ୍ଷତିଗ୍ରସ୍ତ ହୋଇଥିବା ବିଭିନ୍ନ ପ୍ରକଳ୍ପ ପାଇଁ ସର୍ବାଧିକ ୩୦୬ କୋଟି ୫୪ ଲକ୍ଷ ଟଙ୍କା ,ଗଜପତି ଜିଲ୍ଲାରେ ୧୦୯ କୋଟି ୯୭ ଲକ୍ଷ, କନ୍ଧମାଳରେ ୪୨ କୋଟି ୫୭ ଲକ୍ଷ, ନୂଆପଡ଼ାରେ ୧୫ କୋଟି ୮ ଲକ୍ଷ, ନବରଙ୍ଗପୁରରେ ୭ କୋଟି ୭୮ ଲକ୍ଷ ଏବଂ ରାୟଗଡ଼ାରେ ୯୭ ଲକ୍ଷ ୬୦ ହଜାର ଟଙ୍କାର କ୍ଷୟକ୍ଷତି ପାଇଁ ଅର୍ଥ ଅନୁମୋଦନ କରାଯାଇଛି। ପ୍ରାକୃତିକ ଦୁର୍ବିପାକ ଯୋଗୁଁ ପ୍ରଭାବିତ ଅଞ୍ଚଳଗୁଡ଼ିକରେ ବ୍ୟାପକ କ୍ଷତି ଘଟିଛି। ବିଶେଷ କରି ବିଦ୍ୟାଳୟ କୋଠା, କମ୍ୟୁନିଟି ହଲ୍‌, ପଞ୍ଚାୟତ ଘର, ଅଙ୍ଗନବାଡ଼ି କେନ୍ଦ୍ର, ଗ୍ରାମ ପଞ୍ଚାୟତ ଓ ପଞ୍ଚାୟତ ସମିତି ରାସ୍ତା, ପୋଲ, କଲଭର୍ଟ, ସ୍ୱାସ୍ଥ୍ୟ ଉପକେନ୍ଦ୍ର, ପାନୀୟ ଜଳ ପ୍ରକଳ୍ପ ଏବଂ ନଳକୂପ ଆଦି କ୍ଷତିଗ୍ରସ୍ତ ପାଇଁ ଅର୍ଥ ଅନୁମୋଦନ କରାଯାଇଛି। ଏହି ଆର୍ଥିକ ସହାୟତା ଦ୍ୱାରା ପ୍ରଭାବିତ ଜନସାଧାରଣଙ୍କ ମୌଳିକ ସୁବିଧା ଯଥା ପାନୀୟ ଜଳ ଯୋଗାଣ ଏବଂ ଯାତାୟାତ ବ୍ୟବସ୍ଥାକୁ ଯଥାଶୀଘ୍ର ପୂର୍ବବସ୍ଥାକୁ ଅଣାଯାଇପାରିବ ବୋଲି ପ୍ରଶାସନ ପକ୍ଷରୁ ଆଶା ପ୍ରକାଶ କରାଯାଇଛି।

The post ବାତ୍ୟା ‘ଅର୍ଣ୍ଣବ’ ଏବଂ ବନ୍ୟା କ୍ଷୟକ୍ଷତି: ୬ଟି ଜିଲ୍ଲାର ପୁନରୁଦ୍ଧାର ପାଇଁ ପଞ୍ଚାୟତିରାଜ ଓ ପାନୀୟ ଜଳ ବିଭାଗକୁ ୪୮୨.୪୨ କୋଟି ଟଙ୍କା ମଞ୍ଜୁର appeared first on ONA KHABAR.

ଭୁବନେଶ୍ୱର: ରାଜ୍ୟ ତଥା ଦେଶର ସାମାଜିକ-ଅର୍ଥନୈତିକ ଅଭିବୃଦ୍ଧିରେ ଜାତୀୟ ରାଜପଥ ଓ ରାଜ୍ୟ ରାଜପଥଗୁଡ଼ିକର ପ୍ରମୁଖ ଭୂମିକା ରହିଛି । ଏହି ଦୃଷ୍ଟିରୁ ଭାରତ ସରକାରଙ୍କ ଜାତୀୟ ରାଜପଥ ପ୍ରାଧିକରଣ ଏବଂ ସଡ଼କ ପରିବହନ ଓ ରାଜପଥ ମନ୍ତ୍ରଣାଳୟ ପକ୍ଷରୁ ରାଜ୍ୟରେ ନିର୍ମାଣ ହେଉଥିବା ଜାତୀୟ ରାଜପଥ ପ୍ରକଳ୍ପର ଅଗ୍ରଗତି ନେଇ ଆଜି ଆଇନ, ପୂର୍ତ୍ତ ଓ ଅବକାରୀ ମନ୍ତ୍ରୀ ଶ୍ରୀ ପୃଥ୍ୱୀରାଜ ହରିଚନ୍ଦନଙ୍କ ଅଧ୍ୟକ୍ଷତାରେ ଏକ ଉଚ୍ଚସ୍ତରୀୟ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି । ନିର୍ମାଣ ସୌଧ ସ୍ଥିତ ଦ୍ୱିତୀୟ ମହଲା ସମ୍ମିଳନୀ କକ୍ଷରେ ଅନୁଷ୍ଠିତ ଏହି ସମୀକ୍ଷା ବୈଠକରେ ଜାତୀୟ ରାଜପଥ ପ୍ରାଧିକରଣ ଏବଂ ରାଜ୍ୟ ସରକାରଙ୍କ ଅଧୀନରେ ଥିବା ଏନ୍‌ଏଚ୍‌ ଡିଭିଜନ୍‌ର ୫୦ କୋଟିରୁ ଊର୍ଦ୍ଧ୍ଵ ମୂଲ୍ୟର ପ୍ରକଳ୍ପ ଗୁଡ଼ିକର ଅଗ୍ରଗତି ନେଇ ବିସ୍ତୃତ ଆଲୋଚନା ହୋଇଥିଲା ।

ବୈଠକରେ ୨୪୦ କିମି ଦୀର୍ଘ ରାୟପୁର-ବିଶାଖାପାଟଣା ରୋଡ୍‌ କରିଡ଼ର, ଚଣ୍ଡିଖୋଲ-ପାରାଦୀପକୁ ସଂଯୋଗ କରୁଥିବା ରାସ୍ତା, କଟକ-ଅନୁଗୁଳ-ସମ୍ବଲପୁର କରିଡ଼ର, ସମ୍ବଲପୁର ବାଇପାସ୍‌, କଟକ-କନ୍ଦରପୁର ରାସ୍ତା, କୋଷ୍ଟାଲ ହାଇେୱ (ରାମେଶ୍ୱର-ପାରାଦୀପ, ପାରାଦୀପ-ଦୀଘା), ୪ ଲେନ୍‌ବିଶିଷ୍ଟ ରେଢ଼ାଖୋଲ-ସମ୍ବଲପୁର ରାସ୍ତା, ୪ ଲେନ୍‌ବିଶିଷ୍ଟ ରାଉରକେଲା-ରାଞ୍ଚି ରାସ୍ତା, ୬ ଲେନ୍‌ବିଶିଷ୍ଟ କୋଇଡ଼ା-ବଡ଼ବିଲ୍‌-ଚଣ୍ଡିଖୋଲ ରାସ୍ତା, ଏନ୍‌ଏଚ୍‌-୧୬ରେ ଥିବା ୬ ଲେନ୍‌ବିଶିଷ୍ଟ ପୁଇଁତଳା-ଟାଙ୍ଗୀ ରାସ୍ତା, ୪ ଲେନ୍‌ବିଶିଷ୍ଟ ଝାରସୁଗୁଡ଼ା- ତିଲେଇବେଣି ଏବଂ ସମ୍ବଲପୁର-ଝାରସୁଗୁଡ଼ା ୪ ଲେନ୍‌ବିଶିଷ୍ଟ ଗ୍ରୀନ୍‌ ଫିଲ୍‌ଡ ରାସ୍ତା, ସର୍ଭିସ୍‌ ରୋଡ୍‌ ଥାଇ ୬ ଲେନ୍‌ବିଶିଷ୍ଟ ପୁରୀ-ଭୁବନେଶ୍ୱର ରାସ୍ତା ସହ କ୍ୟାପିଟାଲ୍‌ ରିଜିୟନ୍‌ ରିଂ-ରୋଡ୍‌ ଆଦି ଜାତୀୟ ରାଜପଥ ପ୍ରାଧିକରଣ ରାସ୍ତାର ଅଗ୍ରଗତି ନେଇ ଆଲୋଚନା ହୋଇଥିଲା । ସେହିପରି ରାଜ୍ୟ ସରକାରଙ୍କ ପୂର୍ତ୍ତ ବିଭାଗ ଏନ୍‌ଏଚ୍‌ ଡିଭିଜନ୍‌ ଅଧୀନରେ ଥିବା କୋକସରା-ନବରଙ୍ଗପୁର ରାସ୍ତାର ପ୍ରଶସ୍ତିକରଣ, ଏନ୍‌ଏଚ୍‌-୫୯ ଅଧୀନରେ ଥିବା ଦାରିଙ୍ଗବାଡ଼ି ଘାଟି ରାସ୍ତା, ମୋହନା-କୋରାପୁଟ ରାସ୍ତାର ପ୍ରଶସ୍ତିକରଣ, ଏନ୍‌ଏଚ୍‌-୧୫୭ରେ ଥିବା ଭଞ୍ଜନଗର-ଆସ୍କାର ରାସ୍ତାର ପ୍ରଶସ୍ତିକରଣ, ବ୍ରହ୍ମପୁର ବାଇପାସ୍‌ ରାସ୍ତା, ଖୋର୍ଦ୍ଧା ବାଇପାସ୍‌ ରାସ୍ତା, ୪ ଲେନ୍‌ବିଶିଷ୍ଟ ଖରିଆର୍‌ ରୋଡ୍‌ ଆର୍‌ଓବି, ୪ ଲେନ୍‌ବିଶିଷ୍ଟ କେସିଙ୍ଗା ଆର୍‌ଓବି, ଏନ୍‌ଏଚ୍‌-୨୬୦ର ୪ ଲେନ୍‌ବିଶିଷ୍ଟ ଜୟପୁର ବାଇପାସ୍‌ ରାସ୍ତା ନିର୍ମାଣ, ମାଲକାନଗିରି-ମୋଟୁ ରାସ୍ତାରେ ହାଇଲେବୁଲ୍‌ ସେତୁ ନିର୍ମାଣ ଏବଂ କନ୍ଦରପୁର-ବାଲିକୁଦା ରାସ୍ତାର ପ୍ରଶସ୍ତିକରଣ ନେଇ ଆଲୋଚନା ହୋଇଥିଲା ।

ଏଥିରେ ଜମି ଅଧିଗ୍ରହଣଠାରୁ ଆରମ୍ଭ କରି ଜଙ୍ଗଲ ଜମି ସମସ୍ୟା ଦୂରୀକରଣ, ୟୁଟିଲିଟି ସିଫଫିଂ ଏବଂ ଅନ୍ୟାନ୍ୟ ସମସ୍ୟା ନେଇ ଆଲୋଚନା ହୋଇଥିଲା । ବୈଠକରେ ନିର୍ମାଣ ବିଭାଗ ପ୍ରମୁଖ ଶାସନ ସଚିବ ଶ୍ରୀ ସଂଜୟ କୁମାର ସିଂହ ବିଭିନ୍ନ ରାସ୍ତାର ଅଗ୍ରଗତି ଏବଂ ସମସ୍ୟା ନେଇ ମନ୍ତ୍ରୀଙ୍କୁ ଅବଗତ କରାଇଥିଲେ । ନିର୍ମାଣ କାର୍ଯ୍ୟକୁ ଆଗେଇ ନେବା ଲାଗି ବିଭିନ୍ନ ବିଭାଗ ସହିତ ସମନ୍ୱୟ ରକ୍ଷା, ଭୂମିରାଶି ପୋର୍ଟାଲର ବହୁଳ ଉପଯୋଗ ସହ ଧାର୍ଯ୍ୟ ଲକ୍ଷ୍ୟ ପୂରଣ କାର୍ଯ୍ୟ କରିବାକୁ ବିଭାଗୀୟ ଅଧିକାରୀ ଓ ଇଂଜିନିୟରମାନଙ୍କୁ ପରାମର୍ଶ ଦେଇଥିଲେ । ଏଥି ସହିତ ନିର୍ମାଣ କାର୍ଯ୍ୟରେ ଅବହେଳା କରୁଥିବା ଠିକାସଂସ୍ଥା ବିରୁଦ୍ଧରେ କଡା କାର୍ଯ୍ୟନୁଷ୍ଠାନ ପାଇଁ ମୁଖ୍ୟ ଯନ୍ତ୍ରୀ ତଥା ଅଧିକ୍ଷକ ଯନ୍ତ୍ରୀଙ୍କୁ ସେ ପରାମର୍ଶ ଦେଇଥିଲେ I ଆଜିର ବୈଠକରେ ସର୍ବୋଚ୍ଚ ଯନ୍ତ୍ରୀ ତଥା ସ୍ୱତନ୍ତ୍ର ଶାସନ ସଚିବ ଇଂ ସମୀର ହୋତା, ସର୍ବୋଚ୍ଚ ଯନ୍ତ୍ରୀ (ସିଭିଲ୍‌ ଓ ରୋଡ୍ସ ) ଇଂ ସତ୍ୟବ୍ରତ ବେହେରା, ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗ ସ୍ୱତନ୍ତ୍ର ଶାସନ ସଚିବ ଶ୍ରୀ ସ୍ୱୟମ୍‌ ମଲ୍ଲିକ, ମୁଖ୍ୟଯନ୍ତ୍ରୀ ଏନ୍‌ଏଚ୍‌-୧ ଇଂ ନାରାୟଣ ପଟେଲ, ମୁଖ୍ୟଯନ୍ତ୍ରୀ ଏନ୍‌ଏଚ୍‌-୨ ଇଂ ଦୀପକ ପାଣିଗ୍ରାହୀ, ସଡ଼କ ପରିବହନ ଓ ରାଜପଥ ମନ୍ତ୍ରଣାଳୟର ଆଞ୍ଚଳିକ ଅଧିକାରୀ ଇଂ ସୁନୀଲ କୁମାର, ଏନ୍‌ଏଚ୍‌ଏଆଇର ଆଞ୍ଚଳିକ ଅଧିକାରୀ ଇଂ ପ୍ରଦୀପ ଲାଲ, ଅତିରିକ୍ତ ଶାସନ ସଚିବ ଶ୍ରୀ ପ୍ରଦୀପ କୁମାର ସାହୁଙ୍କ ସମେତ ବିଭିନ୍ନ ଜୋନ୍‌ର ମୁଖ୍ୟଯନ୍ତ୍ରୀ, ଅତିରିକ୍ତ ମୁଖ୍ୟଯନ୍ତ୍ରୀ ଓ ଅଧୀକ୍ଷଣ ଯନ୍ତ୍ରୀ, ବିଭିନ୍ନ ବିଭାଗର ଅଧିକାରୀ ଓ ଠିକା ସଂସ୍ଥାର କାର୍ଯ୍ୟନିର୍ବାହୀ ପ୍ରମୁଖ ଯୋଗ ଦେଇଥିଲେ ।

The post ଜାତୀୟ ରାଜପଥ ପ୍ରାଧିକରଣ ଏବଂ ରାଜପଥ ପ୍ରକଳ୍ପର ସମୀକ୍ଷା କଲେ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ appeared first on ONA KHABAR.

ଭୁବନେଶ୍ୱର: ଗୁଜୁରାଟର ଏକତା ନଗରେ ଆୟୋଜିତ ହେଉଥିବା ‘ଭାରତ ପର୍ବ’ କାର୍ଯ୍ୟକ୍ରମରେ ଓଡ଼ିଶାର ସଂସ୍କୃତିର ଝଲ୍‌କ ଦେଖିବାକୁ ମିଳୁଛି। ‘ଭାରତ ପର୍ବ’ କାର୍ଯ୍ୟକ୍ରମରେ ଆୟୋଜିତ ହେଉଥିବା ସାଂସ୍କୃତିକ ସନ୍ଧ୍ୟାରେ ଓଡ଼ିଶାର ଶାସ୍ତ୍ରୀୟ ଓ ଲୋକନୃତ୍ୟ ପରିବେଷଣ କରାଯାଉଛି। ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ପକ୍ଷରୁ ଦୁଇଟି ସାଂସ୍କୃତିକ ଦଳଙ୍କୁ ଏକତା ନଗରକୁ ପଠାଯାଇଛି, ଯେଉଁମାନେ ସାଂସ୍କୃତିକ ସନ୍ଧ୍ୟା କାର୍ଯ୍ୟକ୍ରମରେ ଅଂଶଗ୍ରହଣ କରିଛନ୍ତି। ସାଂସ୍କୃତିକ ସନ୍ଧ୍ୟାରେ ଓଡ଼ିଶାର କଳାକାରମାନେ ଓଡ଼ିଶୀ ଓ ସମ୍ବଲପୁର ନୃତ୍ୟ ପରିବେଷଣ କରିଛନ୍ତି ଯାହାକୁ ଦର୍ଶକମାନେ ବେଶ୍ ପ୍ରଶଂସା କରିଛନ୍ତି। ସଂସ୍କୃତି ବିଭାଗର ଏହି ପଦକ୍ଷେପ ଓଡ଼ିଶାର କଳା ଓ ସଂସ୍କୃତିକୁ ଜାତୀୟ ସ୍ତରରେ ଏକ ଅନନ୍ୟ ପରିଚୟ ପ୍ରଦାନ କରିବା ସହ ସାଂସ୍କୃତିକ ଭାବବିନିମୟକୁ ସୁଦୃଢ଼ କରୁଛି। ସୂଚନା ଯୋଗ୍ୟ ଯେ, ଗତ ଅକ୍ଟୋବର ୩୦ ତାରିଖ ଦିନ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଗୁଜୁରାଟର ଏକତା ନଗର ଠାରେ ‘ଭାରତ ପର୍ବ’ କାର୍ଯ୍ୟକ୍ରମକୁ ଆନୁଷ୍ଠାନିକ ଭାବେ ଉଦ୍‌ଘାଟନ କରିଥିଲେ। ଏହା ଆସନ୍ତା ନଭେମ୍ବର ୧୫ ତାରିଖ ପର୍ଯ୍ୟନ୍ତ ଅନୁଷ୍ଠିତ ହେବ।

The post ଗୁଜୁରାଟର ଏକତା ନଗରରେ ଓଡ଼ିଶାର କଳା ଓ ସଂସ୍କୃତି ପ୍ରଦର୍ଶିତ appeared first on ONA KHABAR.

ଭୁବନେଶ୍ୱର: ଓଡ଼ିଶା ସରକାରଙ୍କ ମହିଳା ଓ ଶିଶୁ ବିକାଶ ବିଭାଗ ଏବଂ ‘ରକେଟ୍ ଲର୍ଣ୍ଣିଂ’ର ମିଳିତ ଆନୁକୂଲ୍ୟରେ ଆଜି ଭୁବନେଶ୍ୱରସ୍ଥିତ ଲାଇଫ୍ (LYFE) ହୋଟେଲରେ ଦୁଇଦିନିଆ ‘ଜାତୀୟ ପ୍ରାକ୍ ଶୈଶବ ଯତ୍ନ ଓ ଶିକ୍ଷା (ECCE) କନକ୍ଲେଭ’ ଉଦ୍‌ଘାଟିତ ହୋଇଯାଇଛି। ୧୧ ଏବଂ ୧୨ ନଭେମ୍ବରରେ ଆୟୋଜିତ ଏହି କନକ୍ଲେଭର ମୁଖ୍ୟ ଉଦ୍ଦେଶ୍ୟ ହେଉଛି ୦ ରୁ ୬ ବର୍ଷ ବୟସର ଶିଶୁମାନଙ୍କ ପୋଷଣ, ସ୍ୱାସ୍ଥ୍ୟସେବା, ପ୍ରାରମ୍ଭିକ ସକ୍ରିୟତା ଏବଂ ଖେଳ-ଭିତ୍ତିକ ଶିକ୍ଷା ଉପରେ ଗୁରୁତ୍ୱ ଦେଇ ପ୍ରାରମ୍ଭିକ ଶୈଶବ ଯତ୍ନ ଓ ଶିକ୍ଷା ବ୍ୟବସ୍ଥାକୁ ଅଧିକ ମଜବୁତ କରିବା।

ଉଦ୍‌ଘାଟନୀ ସମାରୋହରେ ବରିଷ୍ଠ ସରକାରୀ ଅଧିକାରୀ, ନୀତି ନିର୍ଦ୍ଧାରକ, ସ୍ୱାସ୍ଥ୍ୟ ଓ ଶିକ୍ଷା ବିଶେଷଜ୍ଞ ଏବଂ ବିକାଶମୂଳକ ସହଯୋଗୀ ସଂସ୍ଥାର ପ୍ରତିନିଧିମାନେ ଯୋଗଦେଇଥିଲେ।

ମହିଳା ଓ ଶିଶୁ ବିକାଶ ବିଭାଗର ନିର୍ଦ୍ଦେଶିକା ଶ୍ରୀମତୀ ମୋନୀଷା ବାନାର୍ଜୀ ସ୍ୱାଗତ ଭାଷଣ ଦେଇଥିବା ବେଳେ ବିଭାଗୀୟ କମିଶନର-ତଥା-ଶାସନ ସଚିବ ଡ଼ଃ ମୃଣାଳିନୀ ଦର୍ସ୍ୱାଲ, ଓଡ଼ିଶାରେ ECCE କ୍ଷେତ୍ରରେ ହୋଇଥିବା ଅଗ୍ରଗତି ସମ୍ପର୍କରେ ଉପସ୍ଥାପନ କରିଥିଲେ।

ମୁଖ୍ୟବକ୍ତା ଭାବେ ଯୋଗଦେଇ ଶିଶୁରୋଗ ବିଶେଷଜ୍ଞ ତଥା ବିଶ୍ୱ ସ୍ୱାସ୍ଥ୍ୟ ସଂଗଠନ (WHO)ର ପୂର୍ବତନ ଡେପୁଟି ଡାଇରେକ୍ଟର ଡ. ସୌମ୍ୟା ସ୍ୱାମୀନାଥନ୍ ଶିଶୁର ସାରା ଜୀବନର ସ୍ୱାସ୍ଥ୍ୟ, ଶିକ୍ଷା ଓ ବିକାଶ କ୍ଷେତ୍ରରେ ପ୍ରଥମ ଛଅ ବର୍ଷର ଗୁରୁତ୍ୱପୂର୍ଣ୍ଣ ଭୂମିକା ସମ୍ପର୍କରେ ଆଲୋକପାତ କରିଥିଲେ। ନୀତି ଆୟୋଗର ପୂର୍ବତନ ସଦସ୍ୟ ଡ. ଭି. କେ. ପଲ୍ ସଶକ୍ତ ଅଙ୍ଗନବାଡ଼ି କର୍ମୀ ଏବଂ ଶିଶୁ ବିକାଶର ସାମଗ୍ରିକ ଆଭିମୁଖ୍ୟ ମାଧ୍ୟମରେ ECCE କୁ ସୁଦୃଢ଼ କରିବା ଉପରେ ବକ୍ତବ୍ୟ ରଖିଥିଲେ।

‘ଆସ ଖେଳିବା ଆସ ଶିଖିବା’ କାର୍ଯ୍ୟକ୍ରମ ସମ୍ପର୍କରେ ଆଲୋକପାତ କରି ମହିଳା ଓ ଶିଶୁ ବିକାଶ ବିଭାଗର କମିଶନର-ତଥା-ସଚିବ ଡ଼ଃ ମୃଣାଳିନୀ ଦର୍ସ୍ୱାଲ, ପ୍ରାରମ୍ଭିକ ଶିକ୍ଷା ବ୍ୟବସ୍ଥାକୁ ସୁଦୃଢ଼ କରିବାରେ ପ୍ରଯୁକ୍ତିବିଦ୍ୟା, ଦକ୍ଷ ଶିକ୍ଷକ ଏବଂ ପିତାମାତାଙ୍କ ସକ୍ରିୟ ଭାଗିଦାରୀର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ। ବ୍ୟାପକ ସ୍ତରରେ ଗୁଣାତ୍ମକ ପ୍ରାରମ୍ଭିକ ଶିଶୁ ବିକାଶ ସେବା ଯୋଗାଇଦେବା ପାଇଁ ସରକାରଙ୍କ ସହ ମିଳିତ ଉଦ୍ୟମର ଆବଶ୍ୟକତାକୁ ସେ ଦୋହରାଇଥିଲେ।

ଏହି ଅବସରରେ ମହିଳା ଓ ଶିଶୁ ବିକାଶ ବିଭାଗ ପକ୍ଷରୁ ତିନୋଟି ମୁଖ୍ୟ ପଦକ୍ଷେପର ଶୁଭାରମ୍ଭ କରାଯାଇଥିଲା:

* ୦ ରୁ ୬ ବର୍ଷର ଶିଶୁଙ୍କ ପ୍ରାରମ୍ଭିକ ଯତ୍ନ, ଶିକ୍ଷା ଏବଂ ପିତାମାତାଙ୍କ ସହଭାଗିତାକୁ ପ୍ରୋତ୍ସାହିତ କରିବା ପାଇଁ ଡିଜିଟାଲ୍ ସୂଚନା, ଶିକ୍ଷା ଓ ସଂଚାର (IEC) ସାମଗ୍ରୀ।

* ଶୈଶବର ପ୍ରାରମ୍ଭିକ ବର୍ଷଗୁଡ଼ିକର ଗୁରୁତ୍ୱ ଏବଂ ECCE ଅଧୀନରେ ଉତ୍ତରଦାୟୀ ପାଳନପୋଷଣ (Responsive Parenting) ଉପରେ ଆଧାରିତ ଏକ ଭିଡିଓ।

* ୦ ରୁ ୩ ବର୍ଷ ବୟସର ଶିଶୁଙ୍କ ବିକାଶକୁ ସୁଦୃଢ଼ କରିବା ପାଇଁ ରକେଟ୍ ଲର୍ଣ୍ଣିଂର ସ୍ୱତନ୍ତ୍ର କାର୍ଯ୍ୟକ୍ରମ ‘ସୁପାଳନ’।

ଉଦ୍‌ଘାଟନୀ ସେସନ୍ ଶେଷରେ ମହିଳା ଓ ଶିଶୁ ବିକାଶ ବିଭାଗର ଅତିରିକ୍ତ ସଚିବ (ECCE) ଶ୍ରୀମତୀ ସ୍ୱୟଂପ୍ରଭା ମହାନ୍ତି ଧନ୍ୟବାଦ ଅର୍ପଣ କରିଥିଲେ।

୦ ରୁ ୬ ବର୍ଷ ଶିଶୁଙ୍କ ବିକାଶ ସମ୍ପର୍କରେ ବିଶେଷଜ୍ଞମାନଙ୍କ ଆଲୋଚନା-

ପ୍ରଥମ ଦିନରେ ପ୍ରାରମ୍ଭିକ ଶିଶୁ ବିକାଶର ବିଭିନ୍ନ ଗୁରୁତ୍ୱପୂର୍ଣ୍ଣ ଦିଗକୁ ନେଇ ତିନୋଟି ପ୍ୟାନେଲ ଆଲୋଚନା ଅନୁଷ୍ଠିତ ହୋଇଥିଲା।

୧. ପ୍ରଥମ ତିନି ବର୍ଷ: ସ୍ୱାସ୍ଥ୍ୟ, ପୋଷଣ ଏବଂ ପ୍ରାରମ୍ଭିକ ସକ୍ରିୟତାର ଯତ୍ନ (୦-୩ ବର୍ଷ): ଏହି ସେସନ୍‌ରେ ଆବଶ୍ୟକୀୟ ଯତ୍ନ, ପୋଷଣ, ପ୍ରାରମ୍ଭିକ ସକ୍ରିୟତା ଏବଂ ଓଡ଼ିଶାର ସମୁଦାୟ-ଭିତ୍ତିକ ECCE ମଡେଲ ଉପରେ ଆଲୋଚନା କରାଯାଇଥିଲା। ଏଥିରେ ଜନସ୍ୱାସ୍ଥ୍ୟ ପରାମର୍ଶଦାତା ଡ. ରମ୍ୟା ପିନ୍ନାମାନେନି, କଟକ ଜିଲ୍ଲାପାଳ ତଥା ଜିଲ୍ଲା ମାଜିଷ୍ଟ୍ରେଟ୍ ଶ୍ରୀ ଦତ୍ତାତ୍ରୟ ଭାଉସାହେବ ସିନ୍ଦେ ଏବଂ ଆଇଜିପି ଡ. ସତ୍ୟଜିତ ନାୟକ ପ୍ୟାନେଲିଷ୍ଟ ଭାବେ ଯୋଗଦେଇଥିଲେ। ରକେଟ୍ ଲର୍ଣ୍ଣିଂର ଶିକ୍ଷା ଓ କଣ୍ଟେଣ୍ଟ ଲିଡ୍ ମିସ୍ ସୁଖନା ସାହାନୀ ଏହାକୁ ସଞ୍ଚାଳନ କରିଥିଲେ।

୨. ବିଦ୍ୟାଳୟ ପ୍ରସ୍ତୁତି: ଖେଳ-ଭିତ୍ତିକ ଶିକ୍ଷା ଏବଂ ଆଦର୍ଶ ଅଙ୍ଗନବାଡ଼ି କେନ୍ଦ୍ର (୩-୬ ବର୍ଷ): ଏହି ଆଲୋଚନାରେ ପ୍ରାକ୍-ବିଦ୍ୟାଳୟ ଶିକ୍ଷା ପାଇଁ ଜାତୀୟ ରୋଡମ୍ୟାପ୍ ଏବଂ ଅଙ୍ଗନବାଡ଼ି କେନ୍ଦ୍ରଗୁଡ଼ିକୁ ଗୁଣାତ୍ମକ ପ୍ରାରମ୍ଭିକ ଶିକ୍ଷା କେନ୍ଦ୍ର ଭାବେ ଗଢ଼ିତୋଳିବା ଉପରେ ଆଲୋକପାତ କରାଯାଇଥିଲା। ପ୍ୟାନେଲିଷ୍ଟ ଭାବେ SPNIWCD ର ଅତିରିକ୍ତ ନିର୍ଦ୍ଦେଶିକା ଡ. ରୀତା ପଟ୍ଟନାୟକ, SCERT ର ଉପ-ନିର୍ଦ୍ଦେଶିକା ଶ୍ରୀମତୀ ଚନ୍ଦ୍ରିକା ନାୟକ, ସିଏମସି ଭେଲୋରର ପ୍ରଫେସର ଡ. ବିନା କୋଶି ଏବଂ କେନ୍ଦ୍ର ମହିଳା ଓ ଶିଶୁ ବିକାଶ ମନ୍ତ୍ରଣାଳୟର ଶ୍ରୀମତୀ ରାଧିକା ଝା (ଆଭାସୀ ମାଧ୍ୟମରେ) ଅଂଶଗ୍ରହଣ କରିଥିଲେ। ICDS ଓ SW ର ନିର୍ଦ୍ଦେଶିକା ଶ୍ରୀମତୀ ମୋନୀଷା ବାନାର୍ଜୀ ଏହାକୁ ସଞ୍ଚାଳନ କରିଥିଲେ।

୩. ପ୍ରାରମ୍ଭିକ ଶିଶୁ ବିକାଶ ପାଇଁ ସହଭାଗିତା: ଏହି ସେସନ୍‌ରେ ଅନ୍ତଃ-ବିଭାଗୀୟ ସମନ୍ୱୟ, ସରକାରୀ-ବେସରକାରୀ ସହଭାଗିତା (PPP) ଏବଂ ସିଏସ୍‌ଆର୍ (CSR) ମାଧ୍ୟମରେ ହେଉଥିବା କାର୍ଯ୍ୟକ୍ରମ ସମ୍ପର୍କରେ ମେଘାଳୟର ପ୍ରାରମ୍ଭିକ ଶିଶୁ ବିକାଶ ମିଶନର ଉଦାହରଣ ନେଇ ଆଲୋଚନା କରାଯାଇଥିଲା। ମେଘାଳୟ ECD ମିଶନର ସିଓଓ ଶ୍ରୀ ରୋନାଲ୍ଡ କିଣ୍ଟା, OSEPA ର ଉପ-ନିର୍ଦ୍ଦେଶିକା (ପେଡାଗୋଜି) ମିସ୍ ନିରୂପା ବେହେରା ଏବଂ ଓଡ଼ିଶା ସରକାରଙ୍କ ମହିଳା ଓ ଶିଶୁ ବିକାଶ ବିଭାଗର ସ୍ୱତନ୍ତ୍ର ସଚିବ ଶ୍ରୀମତୀ ଇତିଶ୍ରୀ ଦାସ (ଓ.ଏ.ଏସ.) ପ୍ୟାନେଲିଷ୍ଟ ଭାବେ ଯୋଗଦେଇଥିଲେ। ରାଜ୍ୟ ଉଦ୍ୟୋଗ ଓ ନୀତି ଲିଡ୍ ମିସ୍ ରାଧିକା ମାଥୁର ଏହି ସେସନ୍ ସଞ୍ଚାଳନ କରିଥିଲେ। କନକ୍ଲେଭର ପ୍ରଥମ ଦିନରେ ଗୁଣାତ୍ମକ ପୋଷଣ, ସ୍ୱାସ୍ଥ୍ୟସେବା, ପ୍ରାରମ୍ଭିକ ଶିକ୍ଷା, ଦକ୍ଷ ଅଙ୍ଗନବାଡ଼ି କର୍ମୀ, ପିତାମାତାଙ୍କ ସକ୍ରିୟ ଅଂଶଗ୍ରହଣ ଏବଂ ବିଭିନ୍ନ ସରକାରୀ ବିଭାଗ ମଧ୍ୟରେ ସମନ୍ୱୟ ରକ୍ଷା କରି ଏକ ସମନ୍ୱିତ ପ୍ରାରମ୍ଭିକ ଶିଶୁ ବିକାଶ ଢାଞ୍ଚା ପ୍ରସ୍ତୁତ କରିବା ଉପରେ ଗୁରୁତ୍ୱାରୋପ କରାଯାଇଥିଲା।

The post ଓଡ଼ିଶାରେ ଜାତୀୟ ପ୍ରାକ୍ ଶୈଶବ ଯତ୍ନ ଓ ଶିକ୍ଷା (ECCE) କନକ୍ଲେଭ ଆୟୋଜିତ appeared first on ONA KHABAR.

ଭୁବନେଶ୍ୱର: ପାର୍ବଣ ଋତୁରେ ରାଜ୍ୟରେ ବେଆଇନ ମଦ ଓ ନିଶାଦ୍ରବ୍ୟର ଉତ୍ପାଦନ, ବିକ୍ରୟ ଏବଂ ପରିବହନକୁ ରୋକିବା ଉଦ୍ଦେଶ୍ୟରେ ଅବକାରୀ ବିଭାଗ ପକ୍ଷରୁ ଗତ ଅକ୍ଟୋବର ୧୦ରୁ ନଭେମ୍ବର ୧୦, ପର୍ଯ୍ୟନ୍ତ ରାଜ୍ୟସାରା ଚାଲିଥିବା ମାସବ୍ୟାପୀ ସ୍ୱତନ୍ତ୍ର ପ୍ରବର୍ତ୍ତନ ଅଭିଯାନ ସଫଳତାର ସହ ଶେଷ ହୋଇଛି। ଏହି ଅଭିଯାନରେ ମୋଟ ୪୫.୫୭ କୋଟି ଟଙ୍କା ମୂଲ୍ୟର ନିଶାଦ୍ରବ୍ୟ ଓ ଚୋରା ମଦ ଜବତ କରାଯାଇଛି। ଏହି ଅଭିଯାନ ସମୟରେ ଅବକାରୀ ବିଭାଗ ପକ୍ଷରୁ ମୋଟ ୭,୮୨୬ଟି ମାମଲା ରୁଜୁ କରାଯିବା ସହ ୩,୭୬୪ ଜଣଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି। ଚଢ଼ାଉ ସମୟରେ ୩,୨୦୧ କେଜି ଗଞ୍ଜେଇ, ୬,୩୬୬ ଗ୍ରାମ ହେରୋଇନ୍, ୧୫୦.୫ ଲିଟର କଫ୍ ସିରପ୍, ୧୪,୧୯୩ କେଜି ମହୁଲ ଫୁଲ, ୧,୦୪୫ ଲିଟର ନକଲି ବିଦେଶୀ ମଦ ଏବଂ ୪,୨୮,୫୮୫ ଲିଟର ଚୋରା ଭାଟି ମଦ (ID Liquor) ଜବତ କରାଯାଇଛି। ଏଥିସହ ୪୦,୬୦,୪୧୦ ଲିଟର ମଦ ପ୍ରସ୍ତୁତି ପାଇଁ ବ୍ୟବହୃତ ପୋଚ ନଷ୍ଟ କରାଯାଇଥିବା ବେଳେ ଏହି ବେଆଇନ କାର୍ଯ୍ୟକଳାପରେ ବ୍ୟବହୃତ ୪୪୨ଟି ଗାଡ଼ି ଜବତ ହୋଇଛି। ରାଜ୍ୟବ୍ୟାପୀ ସମନ୍ୱିତ କାର୍ଯ୍ୟାନୁଷ୍ଠାନ ଓ ନିରନ୍ତର ତଦାରଖ ଯୋଗୁଁ ଏହି ସ୍ୱତନ୍ତ୍ର ଅଭିଯାନ ସଫଳ ହୋଇପାରିଛି। ବେଆଇନ ମଦ ଓ ନିଶାଦ୍ରବ୍ୟର କାରବାରକୁ ରୋକିବା ସହ ରାଜ୍ୟରେ ନିଶାସେବନ ଜନିତ ସମସ୍ୟାର ମୁକାବିଲା ଏବଂ ଜନସାଧାରଣଙ୍କୁ ଏହାର କୁପ୍ରଭାବରୁ ସୁରକ୍ଷିତ ରଖିବା ପାଇଁ ଅବକାରୀ ବିଭାଗ ଆଗାମୀ ଦିନରେ ମଧ୍ୟ ନିଜର ନିରୀକ୍ଷଣ ଓ ପ୍ରବର୍ତ୍ତନ କାର୍ଯ୍ୟକୁ ଅଧିକ ଜୋରଦାର କରିବ।

The post ମାସବ୍ୟାପୀ ସ୍ୱତନ୍ତ୍ର ଅବକାରୀ ଚଢ଼ାଉ ଅଭିଯାନରେ ୪୫.୫୭ କୋଟି ଟଙ୍କାର ନିଶାଦ୍ରବ୍ୟ ଓ ଚୋରା ମଦ ଜବତ appeared first on ONA KHABAR.

ଭୁବନେଶ୍ୱର: ଆଜି ପ୍ରଦେଶ କଂଗ୍ରେସ କାର୍ଯ୍ୟାଳୟରେ ପ୍ରଦେଶ କଂଗ୍ରେସ ଆଦିବାସୀ ବିଭାଗର ଅଧ୍ୟକ୍ଷ ତଥା ପୂର୍ବତନ ସାଂସଦ ଶ୍ରୀ ଯଶବନ୍ତ ସିଂ ଲାଗୁରି ଏକ ସାମ୍ବାଦିକ ସମ୍ମିଳନୀରେ କହିଥିଲେ ଯେ ଓଡ଼ିଶାରେ ବିଜେପି ସରକାରରେ ଧାର୍ମିକ ଅସହିଷ୍ଣୁତା ସାଙ୍ଘାତିକ ଭାବେ ବଢ଼ିଚାଲିଛି । ଏହି ଅସହିଷ୍ଣୁତାରେ ଅଧିକ ଶିକାର ହେଉଛି ଆଦିବାସୀ ସଂପ୍ରଦାୟ । ଓଡ଼ିଶାର ଜନସଂଖ୍ୟାର ପ୍ରାୟ ୨୫ ପ୍ରତିଶତ ହେଉଛନ୍ତି ଆଦିବାସୀ ବର୍ଗର । ଆଦିବାସୀମାନଙ୍କର ବିକାଶକୁ ଯଦି ଅଣଦେଖା କରାଯାଏ ତେବେ ଏ ରାଜ୍ୟର ବିକାଶ ଅସମ୍ଭବ । ସରଳ ଆଦିବାସୀମାନଙ୍କର ଧର୍ମୀୟ ଭାବନାକୁ ନେଇ ଏକ ନିର୍ଦ୍ଦିଷ୍ଟ ଦଳ ହିଂସା ସୃଷ୍ଟି କରୁଛି ଏବଂ ନିରୀହ ଆଦିବାସୀମାନଙ୍କୁ ଅକଥନୀୟ ଅତ୍ୟାଚାର କରୁଛି । ଦଳିତ ଲୋକମାନଙ୍କୁ ମଧ୍ୟ ନିର୍ମମ ଅତ୍ୟାଚାର କରାଯାଉଛି । ଗଞ୍ଜାମ ଜିଲ୍ଲାର ସାନଖେମୁଣ୍ଡି ନିର୍ବାଚନ ମଣ୍ଡଳୀ ଅନ୍ତର୍ଗତ ସିଙ୍ଗିପୁର ଅଞ୍ଚଳର ଦଳିତ ବର୍ଗର ନିରୀହ ଲୋକ ବୁଲୁ ନାୟକ ଓ ବାବୁଲା ନାୟକଙ୍କୁ ଗତ ତା. ୨୨ ଜୁନ୍ ୨୦୨୫ ରିଖରେ ଧରାକୋଟ ଥାନା ଅନ୍ତର୍ଗତ ଖାରିଗୁମା ଗ୍ରାମରେ ଯେଉଁଭଳି ଭାବରେ ଅମାନୁଷିକ ଅତ୍ୟାଚାର କରାଗଲା ତାହା ହୃଦୟ ବିଦାରକ ଏବଂ ଧର୍ମାନ୍ଦ ଲୋକଙ୍କଦ୍ୱାରା କିଭଳି ଅତ୍ୟାଚାର ବଢ଼ିଚାଲିଛି ତାହାର ଏକ ଜ୍ୱଳନ୍ତ ଉଦାହାରଣ । ତାଙ୍କୁ ବଳପୂର୍ବକ ଲଣ୍ଡା କରାଯିବା ସହ ଗୁରୁଣ୍ଡି ଗୁରୁଣ୍ଡି ଯିବାକୁ, ଘାସ ଓ ନର୍ଦ୍ଦମା ପାଣି ପିଇବାକୁ ବାଧ୍ୟ କରାଯାଇଥିଲା । ସେହିଭଳି ଘଟଣା କ୍ରମାଗତ ଘଟିଚାଲିଛି । କିନ୍ତୁ ସରକାର ନୀଦକ । ନିକଟରେ କେନ୍ଦୁଝର ଜିଲ୍ଲାର ଘସିପୁରା ବ୍ଲକ ଏବଂ ସୁନ୍ଦରଗଡ ଜିଲ୍ଲାର ବଣେଇଁ ବ୍ଲକରେ ମଧ୍ୟ ଏଭଳି ଅମାନୁଷିକ ଅତ୍ୟାଚାର ଘଟଣା ଘଟିବା ପରେ ସରକାର ନିରବ ବସିଛନ୍ତି । ବଣେଇଁର କେ ବଳଙ୍ଗ ଥାନା ଅନ୍ତର୍ଗତ ଝରବେଡା ଗ୍ରାମ ଠାରେ ଗାଈ ଚରେଇବାକୁ ନେଉଥିବା ପଟାଶମୁଣ୍ଡାଙ୍କ ଉପରେ କଥାକଥିତ ଗୋ ରକ୍ଷକ ଦଳର ସଭ୍ୟମାନଙ୍କ ପକ୍ଷରୁ ଅମାନୁଷିକ ଅତ୍ୟାଚାର କରାଯାଇଥିଲା । ଏହାକୁ ନେଇ ସ୍ଥାନୀୟ ଆଦିବାସୀ ଲୋକମାନେ ରାଜପଥ ଅବରୋଧ ଏବଂ ଥାନା ଘେରାଉ ମଧ୍ୟ କରିଛନ୍ତି ।

ସେହିଭଳି ଅକ୍ଟୋବର ୨୩ ତାରିଖ ୨୦୨୬ ରିଖ ଦିନ କେନ୍ଦୁଝର ଜିଲ୍ଲାର ଘସିପୁରା ଥାନା ଅନ୍ତର୍ଗତ ବସନ୍ତପୁର ଗ୍ରାମରେ ସାନ୍ତାଳ ଆଦିବାସୀମାନଙ୍କର ଧାର୍ମିକ ପୀଠ ଜାହେରାଥାନକୁ କିଛି ଅସାମାଜିକ ଲୋକମାନେ ଭଙ୍ଗାରୁଜା କରିଛନ୍ତି ଏବଂ ସେହି ନିରୀହ ଗ୍ରାମବାସୀ ଏପରିକି ପୁରୁଷ ଓ ସ୍ତ୍ରୀ ଉଭୟଙ୍କୁ ଶାରୀରିକ ଆକ୍ରମଣ କରିବା ସହ ତାଙ୍କୁ ଧମକ ଚମକ ଦିଆଯାଇଛି । ସେମାନଙ୍କର କଣ୍ଟ୍ରୋଲ ଚାଉଳ ଏବଂ ଅନ୍ୟାନ୍ୟ ସରକାରୀ ସହାୟତା ବନ୍ଦ କରିଦେବାକୁ ମଧ୍ୟ ସେହି ଅପରାଧିମାନେ ଧମକ ଦେଇଛନ୍ତି । ପିସିସି ସଭାପତି ଶ୍ରୀ ଭକ୍ତ ଚରଣ ଦାସଙ୍କ ନିର୍ଦ୍ଦେଶକ୍ରମେ ପ୍ରଦେଶ କଂଗ୍ରେସର ଏକ ତଥ୍ୟ ଅନୁଧ୍ୟାନକାରୀ ଦଳରେ ଆମେ ଘଟଣାସ୍ଥଳକୁ ଗସ୍ତ କରିଥିଲୁ । ଯେହେତୁ ପୁଲିସ କୌଣସି କାର୍ଯ୍ୟାନୁଷ୍ଠାନ ନେଲା ନାହିଁ ସେଥିପାଇଁ ବିହିତ କାର୍ଯ୍ୟାନୁଷ୍ଠାନ ନେବା ପାଇଁ ଜିଲ୍ଲାପାଳଙ୍କୁ ଅନୁରୋଧ କରିବା ପରେ ମଧ୍ୟ କୌଣସି ଫଳ ମିଳିଲା ନାହିଁ । ଆମେ ଗତକାଲି କଟକରେ ରାଜ୍ୟ ପୁଲିସ ମହାନିର୍ଦ୍ଦେଶକଙ୍କୁ ସାକ୍ଷାତ କରି ଅତ୍ୟାଚାରିତ ଆଦିବାସୀଙ୍କ ନ୍ୟାୟ ଏବଂ କାର୍ଯ୍ୟାନୁଷ୍ଠାନ ନେଇନଥିôବା ପୁଲିସ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଅନୁରୋଧ କରିଥିଲେ । ଆଜି ମଧ୍ୟ ମହାମହିମ ରାଜ୍ୟପାଳଙ୍କୁ ଭେଟି ଓଡ଼ିଶା ପ୍ରଦେଶ କଂଗ୍ରେସ ଆଦିବାସୀ ବିଭାଗ ପକ୍ଷରୁ ଏ ସଂପର୍କରେ ଏକ ସ୍ମାରକ ପତ୍ର ପ୍ରଦାନ କରିଛୁ ।

କେନ୍ଦୁଝର, ମୟୁରଭଞ୍ଜ ଓ ସୁନ୍ଦରଗଡ ଜିଲ୍ଲାର ଆଦିବାସୀ ସଂପ୍ରଦାୟର ଲୋକମାନେ ଆସନ୍ତା ନଭେମ୍ବର ୧୮ ତାରିଖ ଦିନ କେନ୍ଦୁଝର ସହରରେ ଏକତ୍ରିତ ହେବେ ଏବଂ ଗୈରିକ ସଂଗଠନମାନେ ଧର୍ମ ନାମରେ ନିରୀହ ଆଦିବାସୀମାନଙ୍କ ଉପରେ ଯେଉଁ ଅତ୍ୟାଚାର ଚଲାଇଛନ୍ତି ସେ ସଂପର୍କରେ ଏକ ସ୍ମାରକ ପତ୍ର ଓଡ଼ିଶାର ମୁଖ୍ୟମନ୍ତ୍ରୀ ଏବଂ ଓଡ଼ିଶାର ରାଜ୍ୟପାଳଙ୍କ ଉଦ୍ଦ୍ୟେଶରେ କେନ୍ଦୁଝର ଜିଲ୍ଲାପାଳଙ୍କୁ ପ୍ରଦାନ କରିବେ । ଓଡ଼ିଶା ସରକାର ଯଦି ଏହି ଜନବିରୋଧି ସଂଗଠନ ପ୍ରତି ସଜାଗ ଓ ସତର୍କ ନ ରହନ୍ତି, ଅତ୍ୟାଚାରିକ ଆଦିବାସୀମାନଙ୍କୁ ନ୍ୟାୟ ପ୍ରଦାନ ଏବଂ ଅପରାଧିମାନଙ୍କୁ ଦଣ୍ଡିତ ନ କରନ୍ତି ତେବେ ଆଗାମୀ ଦିନରେ ଏକ ଦୁର୍ବାର ଆନ୍ଦୋଳନକୁ ସାମ୍ନା କରିବାକୁ ସରକାର ସତର୍କ ରୁହନ୍ତୁ ବୋଲି ଶ୍ରୀ ଲାଗୁରି କହିଛନ୍ତି । ଏମାନଙ୍କୁ ପ୍ରୋତ୍ସାହନ ଓ ସୁଯୋଗ ନ ଦିଆଯାଉ ବୋଲି ଶ୍ରୀ ଲାଗୁରି ସରକାରଙ୍କୁ ଚେତାବନି ଦେଇଛନ୍ତି । ଏହି ସାମ୍ବାଦିକ ସମ୍ମିଳନୀରେ ପୂର୍ବତନ ସାଂସଦ ରାମଚନ୍ଦ୍ର ହାଂସାଦା, ସୁନୀତା ବିଶ୍ୱାଳ, ଅନିମା ମିଞ୍ଜ ଉପସ୍ଥିତ ଥିଲେ ।

The post କେନ୍ଦୁଝର ସହରରେ ଆଦିବାସୀ ଅତ୍ୟାଚାର ବିରୁଦ୍ଧରେ ଏକତ୍ରିତ ହେବେ appeared first on ONA KHABAR.

ପୂର୍ବରୁ ଆଇଏମ୍‌ଡିର ବାରମ୍ବାର ପୂର୍ବାନୁମାନ ଓ ସତର୍କ ସୂଚନା ସତ୍ତ୍ବେ ଗଂଜାମର ୬ଟି ଯାକ ଡ୍ୟାମ୍‌ରେ ତ୍ରୁଟିପୂର୍ଣ୍ଣ ଜଳ ପରିଚାଳନା ଯୋଗୁଁ ପ୍ରଳୟଙ୍କରୀ ବନ୍ୟା ହେଲା ବୋଲି ପିସିସି ସଭାପତି ଭକ୍ତ ଚରଣ ଦାସ ଓ ପୂର୍ବତନ ମୁଖ୍ୟ ଶାସନ ସଚିବ ସୁରେଶ ମହାପାତ୍ର ତଥ୍ୟପ୍ରମାଣ ସହ ଉପସଂହାରରେ ପହଞ୍ଚିବା ପରେ ବୁଧବାର ପୂର୍ବାହ୍ନରେ ମୁଖ୍ୟ ଶାସନ ସଚିବ ଏହାର ସ୍ପଷ୍ଟୀକରଣ ଦେଇଛନ୍ତି। ସେ କହିଛନ୍ତି ଯେ ବିଗତ ଦିନରେ ହୋଇଥିବା ବନ୍ୟା ପଛର ମୁଖ୍ୟ କାରଣ ହେଉଛି ଅପ୍ରତ୍ୟାଶିତ ଓ ଅତ୍ୟଧିକ ବର୍ଷା। ‘ଫାଇଲିନ’ ବାତ୍ୟା ସମୟରେ ହୋଇଥିବା ବର୍ଷା ତୁଳନାରେ ଏଥର ବହୁତ ଅଧିକ ବର୍ଷା ରେକର୍ଡ କରାଯାଇଛି। ବିରୋଧୀଙ୍କ ଅଭିଯୋଗର ଜବାବ ଦେଇ ସେ କହିଛନ୍ତି ଯେ ନଦୀବନ୍ଧ ଏବଂ ଡ୍ୟାମ୍‌ର ସୁରକ୍ଷା ପାଇଁ ନିର୍ଦ୍ଧାରିତ ପ୍ରୋଟୋକଲ୍ ଏବଂ ଜଳଧାରଣ କ୍ଷମତାକୁ ଆଧାର କରି ଜଳସମ୍ପଦ ବିଭାଗର ଇଞ୍ଜିନିୟର ଓ ବିଶେଷଜ୍ଞ ଟିମ୍‌ଙ୍କ ଆକଳନ ଅନୁସାରେ ହିଁ ଡ୍ୟାମ୍ ଗେଟ୍ ଖୋଲାଯାଇଥିଲା। ଏହା କୌଣସି ମନୁଷ୍ୟକୃତ ବନ୍ୟା ନୁହେଁ।

ମଧ୍ୟାହ୍ନରେ ପିସିସି ସଭାପତି ଶ୍ରୀ ଦାସ ଏ ନେଇ ଗଣମାଧ୍ୟମ ପ୍ରତିନିଧିଙ୍କ ପ୍ରଶ୍ନର ଉତ୍ତରରେ କହିଛନ୍ତି, ଜଳସମ୍ପଦ ଦାୟିତ୍ବରେ ଥିବା ମୁଖ୍ୟମନ୍ତ୍ରୀ ଏତେ ବଡ଼ ବନ୍ୟା ପରେ ବି ନିରବ କାହିଁକି? ଯଦି ସଠିକ୍ ଜଳ ପରିଚାଳନା କରାଯାଇଥିଲା, ମୁଖ୍ୟମନ୍ତ୍ରୀ ତଥ୍ୟପ୍ରମାଣ ସହ ସାମନାକୁ ଆସୁନାହାନ୍ତି କାହିଁକି? ଯେତେବେଳେ ବି ତାଙ୍କ ସରକାର ଅଡ଼ୁଆରେ ପଡ଼େ, ସେ କେନ୍ଦ୍ର ହେଉ କି ରାଜ୍ୟ, ସରକାରର ମୁଖ୍ୟମାନେ କିମ୍ବା ବିଭାଗର ରାଜନୈତିକ ମୁଖ୍ୟମାନେ ସାମନାକୁ ନ ଆସି ଅମଲାତନ୍ତ୍ରୀମାନଙ୍କ ପଛପଟେ ଲୁଚିବା ପସନ୍ଦ କରନ୍ତି। ଏ ଥର ମଧ୍ୟ ସେୟା ହିଁ କରୁଛନ୍ତି ଜଳସମ୍ପଦ ବିଭାଗ ଦାୟିତ୍ବରେ ଥିବା ମୁଖ୍ୟମନ୍ତ୍ରୀ। ଆଇଏମଡିର ବାରମ୍ବାର ସତର୍କ ସୂଚନା ସତ୍ତ୍ବେ କାହିଁକି ଡ୍ୟାମ୍‌ଗୁଡ଼ିକରୁ ପାଣି ନିଷ୍କାସନ କରାଯାଇ ନ ଥିଲା? ଜଳସମ୍ପଦ ବିଭାଗର ଓ୍ବେବ୍‌ସାଇଟରେ ସ୍ପଷ୍ଟ ଉଲ୍ଲେଖ ଅଛି, ୨୩ରୁ ୨୮ ତାରିଖ ଯାଏ ଦୈନିକ ମାତ୍ର ୭ ହଜାର କ୍ୟୁସେକ ଜଳ ନିଷ୍କାସିତ ହେଉଥିଲା। ହଠାତ ତାହା ୨୯-୩୦ ତାରିଖ ୧ ଲକ୍ଷ ୪୦ ହଜାର କ୍ୟୁସେକ୍‌ରେ ପହଞ୍ଚିବା କେଉଁ ପ୍ରକାରର ସଠିକ୍ ଜଲ ପରିଚାଳନା? ଯଦି ପୂର୍ବଥର ମାନଙ୍କ ଭଳି ଏ ଥର ମଧ୍ୟ ଡ୍ୟାମ୍‌ଗୁଡ଼ିକର ଜଳସ୍ତର ବନ୍ୟା ପୂର୍ବରୁ ୫୦ ପ୍ରତିଶତକୁ ଖସାଇ ଅଣାଯାଇଥା’ନ୍ତା ଏହି ମନୁଷ୍ୟକୃତ ବନ୍ୟାକୁ ରୋକାଯାଇପାରିଥା’ନ୍ତା ବୋଲି ଅଭିଯୋଗର କ’ଣ ଉତ୍ତର ଅଛି ବୋଲି ଶ୍ରୀ ଦାସ ପ୍ରଶ୍ନ କରିଛନ୍ତି। ସତର୍କ ସୂଚନା ସତ୍ତ୍ବେ ଡ୍ୟାମ୍‌ଗୁଡ଼ିକର ଜଳସ୍ତର ବନ୍ୟା ପୂର୍ବରୁ ୬୫ରୁ ୮୦ ପ୍ରତିଶତ ରଖିବା କେଉଁ ପ୍ରକାର ଜଳ ପରିଚାଳନା? ଏହି ପ୍ରଶ୍ନଗୁଡ଼ିକର ସିଧା ଉତ୍ତର ନ ରଖି ‘ଏହା ମନୁଷ୍ୟକୃତ ନୁହେଁ ଓ କିଛି ଭୁଲ୍ ନିଷ୍ପତ୍ତି ନିଆଯାଇ ନ ଥିଲା’ ବୋଲି ମୁହଁଟାଣ କରିବା ଆଦୌ ଗ୍ରହଣୀୟ ନୁହେଁ ବୋଲି ଶ୍ରୀ ଦାସ କହିଛନ୍ତି।

ଅନ୍ୟ ପକ୍ଷରେ ‘ସରକାର ବର୍ତ୍ତମାନ ପ୍ରଭାବିତ ଅଞ୍ଚଳରେ ପୁନରୁଦ୍ଧାର କାର୍ଯ୍ୟକୁ ସର୍ବାଧିକ ଗୁରୁତ୍ୱ ଦେଉଛନ୍ତି. ବିଦ୍ୟୁତ, ପାନୀୟ ଜଳ ଏବଂ ଯୋଗାଯୋଗ ବ୍ୟବସ୍ଥାକୁ ଅତି ଶୀଘ୍ର ସ୍ବାଭାବିକ କରିବା ପାଇଁ ଟିମ୍ କାମ କରୁଛି ତଥା ବନ୍ୟା ଯୋଗୁଁ ହୋଇଥିବା ଧନଜୀବନ ଓ ଫସଲ ହାନିର ସଠିକ୍ ଆକଳନ କରାଯାଇ ପ୍ରଭାବିତ ଲୋକଙ୍କୁ ଖୁବ୍ ଶୀଘ୍ର କ୍ଷତିପୂରଣ ଯୋଗାଇ ଦିଆଯିବ’ ବୋଲି ମୁଖ୍ୟ ଶାସନ ସଚିବଙ୍କ ଦୃଢ଼ୋକ୍ତିକୁ କଂଗ୍ରେସ ପକ୍ଷରୁ ଖଣ୍ଡନ କରାଯାଇଛି। ପିସିସି ଗଣମାଧ୍ୟମ ଅଧ୍ୟକ୍ଷ ଅରବିନ୍ଦ ଦାସ କହିଛନ୍ତି, ପିସିସିର ଏକ ତଥ୍ୟ ଅନୁଧ୍ୟାନକାରୀ ଟିମ୍ ୩ ଦିନିଆ ଗସ୍ତରେ ଯାଇ ଫେରିବା ପରେ ପିସିସି ସଭାପତି ମଧ୍ୟ ନିଜେ ୩ ଦିନ କାଳ ଅକ୍ଳାନ୍ତ ପରିଶ୍ରମ କରି ବନ୍ୟାକ୍ଳୀଷ୍ଟଙ୍କୁ ଭେଟିଥିଲେ। କା୍ଁଭାଁ କେଉଁଠି କେମିତି ସରକାରୀ ସ୍ତରରେ ପୁନରୁଦ୍ଧାର ଓ ରିଲିଫ୍ ବଣ୍ଟନ କାର୍ଯ୍ୟ ହେଉଥିବା ଦେଖିଲେ। ଅଧିକାଂଶ ଜାଗାରେ ପ୍ରଶାସନ ପହଞ୍ଚିପାରି ନ ଥିବା ପିସିସିର ଦୁଇଟି ଯାକ ଟିମ୍ ଦେଖିଥିବା ଶ୍ରୀ ଦାସ ପ୍ରକାଶ କରିଥିଲେ। ତେବେ ସରକାର ଆଗକୁ ଯଥାଶିଘ୍ର ରିଲିଫ୍ ଓ ଥଇଥାନ କାର୍ଯ୍ୟକୁ ପ୍ରାଥମିକତା ଦେଇ ଗଂଜାମବାସୀଙ୍କୁ ଦୁର୍ଗତିରୁ ଉଦ୍ଧାର କରନ୍ତୁ ବୋଲି ପିସିସି ଗଣମାଧ୍ୟମ ଅଧ୍ୟକ୍ଷ କହିଛନ୍ତି। ଶ୍ରୀ ଦାସ ସୂଚନା ଦେଇ କହିଛନ୍ତି, ପିସିସି ସଭାପତିଙ୍କ ନିର୍ଦ୍ଦେଶ କ୍ରମେ ସେବାଦଳ ମୁଖ୍ୟ ଶୁଭେନ୍ଦୁ ମହାନ୍ତି ଓ ସାଧାରଣ ସଂପାଦକ ସତ୍ୟବ୍ରତ ନାୟକଙ୍କ ସମେତ ଉକ ପ୍ରତିନିଧି ଦଳ ପୁଣି ଗଂଜାମ ଗସ୍ତକରି କଂଗ୍ରେସ ପକ୍ଷରୁ ରିଲିଫ୍ ବଣ୍ଟନ ଆାରମ୍ଭ କରିଛନ୍ତି।

The post ଗଞ୍ଜାମ ବନ୍ୟା ପରିସ୍ଥିତି ଏବଂ ପରିଚାଳନା ଉପରେ ମୁଖ୍ୟମନ୍ତ୍ରୀ କାହିଁକି ସ୍ପଷ୍ଟୀକରଣ ଦେଉନାହାନ୍ତି? appeared first on ONA KHABAR.

ଭୁବନେଶ୍ୱର: ଓଡ଼ିଶା ଏବଂ ଜାପାନର ତୋତ୍ତୋରି ପ୍ରିଫେକ୍‌ଚର୍‌ (ରାଜ୍ୟ) ମଧ୍ୟରେ ଆଞ୍ଚଳିକ, ଆର୍ଥିକ, ସାଂସ୍କୃତିକ ଏବଂ ଶିକ୍ଷାଗତ ସମ୍ପର୍କକୁ ଆହୁରି ମଜବୁତ କରିବା ପାଇଁ ଆଜି ସ୍ଥାନୀୟ ଲୋକସେବା ଭବନସ୍ଥିତ କନଭେନ୍ସନ୍ ସେଣ୍ଟରଠାରେ ଏକ ଐତିହାସିକ ‘ମୈତ୍ରୀ ସମ୍ପର୍କ ଚୁକ୍ତି’ (Friendship Agreement) ସ୍ୱାକ୍ଷରିତ ହୋଇଯାଇଛି। ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ ଏବଂ ତୋତ୍ତୋରି ପ୍ରିଫେକ୍‌ଚର୍‌’ର ଗଭର୍ଣ୍ଣର ଶ୍ରୀ ଶିଞ୍ଜୀ ହିରାଇଙ୍କ ଉପସ୍ଥିତିରେ ଏହି ଦ୍ୱିପାକ୍ଷିକ ବୁଝାମଣା ପତ୍ର ସ୍ୱାକ୍ଷର କରାଯାଇଛି। ଏହି ବୁଝାମଣା ଫଳରେ ଓଡ଼ିଶାର ଯୁବବର୍ଗଙ୍କ ପାଇଁ ବୈଦେଶିକ ନିଯୁକ୍ତି, MSME ଏବଂ ଷ୍ଟାର୍ଟଅପ୍ କ୍ଷେତ୍ରରେ ବିନିଯୋଗ, କୌଶଳ ବିକାଶ ଏବଂ ପର୍ଯ୍ୟଟନର ବ୍ୟାପକ ବିକାଶ ପାଇଁ ନୂତନ ଦିଗ ଉନ୍ମୋଚିତ ହୋଇଛି।

ସୂଚନା ଯୋଗ୍ୟ ଯେ ଏହି କାର୍ଯ୍ୟକ୍ରମ ଅବସରରେ ଦୁଇଟି ଗୁରୁତ୍ୱପୂର୍ଣ୍ଣ ବୁଝାମଣା ପତ୍ର (MoU) ସ୍ୱାକ୍ଷରିତ ହୋଇଛି। ପ୍ରଥମ ବୁଝାମଣା ପତ୍ରଟି ‘ଷ୍ଟାର୍ଟଅପ୍ ଓଡ଼ିଶା’ ଏବଂ ତୋତ୍ତୋରି ପ୍ରିଫେକ୍‌ଚର୍‌ ମଧ୍ୟରେ ସ୍ୱାକ୍ଷରିତ ହୋଇଛି, ଯାହା ଦ୍ୱାରା ଉଭୟ ଅଞ୍ଚଳ ମଧ୍ୟରେ ବ୍ୟବସାୟିକ, ନିବେଶକ ସଂଯୋଗ ଏବଂ MSME ସଂସ୍ଥାଗୁଡ଼ିକ ମଧ୍ୟରେ ସୁଦୃଢ଼ ସହଯୋଗିତା ଗଢ଼ିଉଠିବ। ଦ୍ୱିତୀୟ ବୁଝାମଣା ପତ୍ରଟି ଓଡ଼ିଶାର ‘ୱାର୍ଲ୍ଡ ସ୍କିଲ୍ ସେଣ୍ଟର’ (WSC), ତୋତ୍ତୋରି ପ୍ରିଫେକ୍‌ଚର୍‌ ଏବଂ ‘ନିହନ୍ ଏଜୁଟେକ୍’ ମଧ୍ୟରେ ସ୍ୱାକ୍ଷରିତ ହୋଇଛି, ଯାହା ଓଡ଼ିଶାର ଦକ୍ଷ ଯୁବଶକ୍ତି ପାଇଁ ଜାପାନରେ ବୈଦେଶିକ ନିଯୁକ୍ତିର ବ୍ୟାପକ ସୁଯୋଗ ସୃଷ୍ଟି କରିବ।ଏହି ସମାରୋହରେ ଅଭିଭାଷଣ ରଖି ଜାପାନୀ ଭାଷାରେ “କୋନିଚିୱା” ଅର୍ଥାତ୍ ‘ହେଲୋ’ କହି ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ ତୋତ୍ତୋରିର ଗଭର୍ଣ୍ଣର ଶିଞ୍ଜୀ ହିରାଇ ଏବଂ ଆଗତ ପ୍ରତିନିଧିମଣ୍ଡଳୀଙ୍କୁ ମହାପ୍ରଭୁ ଶ୍ରୀଜଗନ୍ନାଥଙ୍କ ପବିତ୍ର ଭୂମିକୁ ସ୍ୱାଗତ କରିଥିଲେ।

ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି ଯେ, ଭାରତ ଏବଂ ଜାପାନ ମଧ୍ୟରେ ଗଭୀର ବିଶ୍ୱାସ, ପରସ୍ପର ପ୍ରତି ସମ୍ମାନ ଏବଂ ବହୁ ପୁରାତନ ସଭ୍ୟତାଗତ ସମ୍ପର୍କ ରହିଛି। ଆଜିର ଏହି ମୈତ୍ରୀ ଚୁକ୍ତି ଓଡ଼ିଶା ଏବଂ ତୋତ୍ତୋରି ମଧ୍ୟରେ ସେହି ଐତିହାସିକ ସମ୍ପର୍କକୁ ପ୍ରାଦେଶିକ ସ୍ତରକୁ ନେଇ ଏ ସମ୍ପର୍କକୁ ଆହୁରି ଗଭୀର କରିବା ସହିତ ଦୁଇ ଅଞ୍ଚଳର ଜନସାଧାରଣ, ଅନୁଷ୍ଠାନ ଓ ସମୁଦାୟକୁ ନିକଟତର କରିବ ବୋଲି ଶ୍ରୀ ମାଝୀ କହିଛନ୍ତି।ରାଜ୍ୟର ଶିଳ୍ପ ଅଭିବୃଦ୍ଧି ଓ ନିବେଶ ସମ୍ପର୍କରେ ବକ୍ତବ୍ୟ ରଖି ମୁଖ୍ୟମନ୍ତ୍ରୀ କହିଛନ୍ତି ଯେ, ଇଣ୍ଡୋ ନିସିନ୍, ନିପନ୍ ଷ୍ଟିଲ୍, ଜେ.ଏଫ୍.ଇ. ଷ୍ଟିଲ୍, କ୍ରୋସାକି, TYK, ୟୋକୋହାମା, ଆଇ.ଏଚ୍.ଆଇ. ଏବଂ ଟୋରେ ଭଳି ପ୍ରମୁଖ ଜାପାନୀ ଶିଳ୍ପ ସଂସ୍ଥାଗୁଡ଼ିକ ଓଡ଼ିଶାର ଶିଳ୍ପ ଇକୋ-ସିଷ୍ଟମ ଉପରେ ଗଭୀର ଆସ୍ଥା ପ୍ରକଟ କରିଛନ୍ତି। ଏହି ସଂସ୍ଥାଗୁଡ଼ିକ ରାଜ୍ୟକୁ ନୂତନ ପୁଞ୍ଜିନିବେଶ, ଆଧୁନିକ ପ୍ରଯୁକ୍ତିବିଦ୍ୟା ଏବଂ ଓଡ଼ିଆ ଯୁବବର୍ଗଙ୍କ ପାଇଁ ବ୍ୟାପକ କର୍ମସଂସ୍ଥାନର ସୁଯୋଗ ଆଣିଦେଇଛନ୍ତି। ଏଥିସହିତ ତୋତ୍ତୋରିର ବ୍ୟବସାୟିକ ନେତୃବୃନ୍ଦଙ୍କୁ ଓଡ଼ିଶାର MSME, ଷ୍ଟାର୍ଟଅପ୍, ଶିଳ୍ପ କ୍ଲଷ୍ଟର ଏବଂ ଦକ୍ଷ ଯୁବଶକ୍ତିର ସାମର୍ଥ୍ୟକୁ ଅନୁଧ୍ୟାନ କରିବା ପାଇଁ ସେ ଆମନ୍ତ୍ରଣ ଜଣାଇବା ସହ ନୂତନ ବିଚାରକୁ ସ୍ଥାୟୀ ସହଯୋଗିତାରେ ପରିଣତ କରିବା ପାଇଁ ଓଡ଼ିଶା ସରକାର ସମସ୍ତ ପ୍ରକାରର ସହଯୋଗ ଯୋଗାଇଦେବେ ବୋଲି ପ୍ରତିଶ୍ରୁତି ଦେଇଛନ୍ତି।

ଉଭୟ ଅଞ୍ଚଳ ମଧ୍ୟରେ ଥିବା ସାଂସ୍କୃତିକ ଓ ଭୌଗୋଳିକ ସାଦୃଶ୍ୟ ଉପରେ ଆଲୋକପାତ କରି ମୁଖ୍ୟମନ୍ତ୍ରୀ ଦର୍ଶାଇଛନ୍ତି ଯେ, ଓଡ଼ିଶା ଏବଂ ତୋତ୍ତୋରି ଦୁଇଟିଯାକ ଅଞ୍ଚଳ ମନୋରମ ସମୁଦ୍ରକୂଳ, ଉର୍ବର କ୍ଷେତ ଏବଂ ପାର୍ବତ୍ୟ ମାଳା ଦ୍ୱାରା ସମୃଦ୍ଧ। ଓଡ଼ିଶାର ପଟ୍ଟଚିତ୍ର, ଚାନ୍ଦୁଆ ଓ ପ୍ରସ୍ତର କଳା ଏବଂ ତୋତ୍ତୋରିର ପାରମ୍ପରିକ ହସ୍ତଶିଳ୍ପ ସୂକ୍ଷ୍ମତା ଓ ନିଷ୍ଠାର ପ୍ରତୀକ ଅଟନ୍ତି। ପର୍ଯ୍ୟଟନ କ୍ଷେତ୍ରରେ ସହଯୋଗିତା ବୃଦ୍ଧି କରିବା ପାଇଁ ଜାପାନର ପ୍ରତିନିଧିମାନେ ଓଡ଼ିଶାର ବୌଦ୍ଧ ଐତିହ୍ୟସ୍ଥଳୀ ରତ୍ନଗିରି, ଉଦୟଗିରି ଓ ଲଳିତଗିରି ପରିଦର୍ଶନ କରିବା ସହ ଓଡ଼ିଶାର ପର୍ଯ୍ୟଟକମାନେ ତୋତ୍ତୋରିର ସମୁଦ୍ରକୂଳ, ପର୍ବତ ଓ ସ୍ୟାଣ୍ଡ ଡ୍ୟୁନ୍ସ (ବାଲୁକା ସ୍ତୂପ) ଅନୁଭବ କରିପାରିବେ ବୋଲି ସେ ଆଶା ବ୍ୟକ୍ତ କରିଛନ୍ତି।ମୁଖ୍ୟମନ୍ତ୍ରୀ ଆହୁରି ମଧ୍ୟ କହିଛନ୍ତି ଯେ, ଆଜି ସ୍ୱାକ୍ଷରିତ ହୋଇଥିବା ଏହି ଚୁକ୍ତି ଦୁଇ ଅଞ୍ଚଳ ମଧ୍ୟରେ ଜ୍ଞାନ, ସଂସ୍କୃତି, ବିଶ୍ୱାସ ଏବଂ ସୁଯୋଗର ଏକ ଜୀବନ୍ତ ସେତୁ ପାଲଟିବ, ଯାହା ଆଗାମୀ ଅନେକ ପିଢ଼ି ପର୍ଯ୍ୟନ୍ତ ଦୁଇ ଅଞ୍ଚଳର ଜନସାଧାରଣଙ୍କ ଜୀବନଶୈଳୀକୁ ସମୃଦ୍ଧ କରିଚାଲିବ।

ତୋତ୍ତୋରି ପ୍ରିଫେକ୍‌ଚର୍‌ର ଗଭର୍ଣ୍ଣର ଶ୍ରୀ ଶିଞ୍ଜୀ ହିରାଇ ନିଜ ବକ୍ତବ୍ୟ ଆରମ୍ଭରେ ଓଡ଼ିଆ ଭାଷାରେ “ମୁଁ ଓଡ଼ିଶାକୁ ଭଲପାଏ” ବୋଲି କହି ଉପସ୍ଥିତ ସମସ୍ତଙ୍କ ହୃଦୟ ଜିଣିଥିଲେ। ଓଡ଼ିଶାର ବିକାଶମୂଳକ ପ୍ରଚେଷ୍ଟାକୁ ଉଚ୍ଚ ପ୍ରଶଂସା କରିବା ସହ ଉଭୟ ଅଞ୍ଚଳ ମଧ୍ୟରେ ସମ୍ପର୍କକୁ ଅଧିକ ସୁଦୃଢ଼ କରିବା ପାଇଁ ସେ ନିଜର ଦୃଢ଼ ପ୍ରତିବଦ୍ଧତା ପ୍ରକାଶ କରିଥିଲେ। ଆର୍ଥିକ ସହଯୋଗ, ସାଂସ୍କୃତିକ ଆଦାନପ୍ରଦାନ ଏବଂ ବ୍ୟବସାୟ ଓ ଜନସାଧାରଣଙ୍କ ମଧ୍ୟରେ ଗଭୀର ଭାଗିଦାରୀ ମାଧ୍ୟମରେ ଏକ ସ୍ଥାୟୀ ସମ୍ପର୍କ ଗଢ଼ିତୋଳିବାର ଆବଶ୍ୟକତା ଉପରେ ସେ ଗୁରୁତ୍ୱାରୋପ କରିଥିଲେ। ଓଡ଼ିଶା ଏବଂ ତୋତ୍ତୋରି ମଧ୍ୟରେ ମିଳିତ ସହଯୋଗିତାର ବ୍ୟାପକ ସମ୍ଭାବନା ରହିଛି ଏବଂ ଏହା ଦ୍ୱିପାକ୍ଷିକ ଅଭିବୃଦ୍ଧି ପାଇଁ ନୂତନ ମାର୍ଗ ପ୍ରଶସ୍ତ କରିବ ବୋଲି ଗଭର୍ଣ୍ଣର ଶ୍ରୀ ହିରାଇ ପ୍ରକାଶ କରିଥିଲେ।କାର୍ଯ୍ୟକ୍ରମରେ ଓଡ଼ିଶାର ଶିଳ୍ପ, ଦକ୍ଷତା ବିକାଶ ମନ୍ତ୍ରୀ ଶ୍ରୀ ସମ୍ପଦ ଚନ୍ଦ୍ର ସ୍ୱାଇଁ ଶିଳ୍ପ ସମୃଦ୍ଧି ସହ କୌଶଳ ବିକାଶର ସମନ୍ୱୟ ଉପରେ ଗୁରୁତ୍ୱାରୋପ କରିଥିଲେ। ସେ କହିଥିଲେ ଯେ, ତୋତ୍ତୋରି ପ୍ରିଫେକ୍‌ଚର୍‌ ସହିତ ଓଡ଼ିଶାର ଏହି ମୈତ୍ରୀ ଭାଗିଦାରୀ ଆମର ଶିଳ୍ପ ସହଯୋଗିତା, ପ୍ରଯୁକ୍ତିବିଦ୍ୟା ବିନିମୟ ଏବଂ ପୁଞ୍ଜିନିବେଶ ସମ୍ପର୍କକୁ ସୁଦୃଢ଼ କରିବା ସହ ଦକ୍ଷତା ବିକାଶ ଓ କାରିଗରୀ ଶିକ୍ଷା କ୍ଷେତ୍ରକୁ ଅଧିକ ଆଗକୁ ନେଇଯିବ।

ଏହି ଅବସରରେ ଓଡ଼ିଶାର ସୁକ୍ଷ୍ମ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ (MSME), ମତ୍ସ୍ୟ ଓ ପ୍ରାଣୀସମ୍ପଦ ବିକାଶ ମନ୍ତ୍ରୀ ଶ୍ରୀ ଗୋକୁଳାନନ୍ଦ ମଲ୍ଲିକ ନିଜ ବକ୍ତବ୍ୟରେ କହିଥିଲେ ଯେ ପ୍ରଯୁକ୍ତିବିଦ୍ୟା ସହଯୋଗିତା, ଯୁଗ୍ମ ଉତ୍ପାଦ ବିକାଶ, ଉତ୍ପାଦନ ସଂଯୋଗ, ବଜାର ପ୍ରବେଶ ଏବଂ ଉତ୍ତମ ବ୍ୟବସାୟିକ ପଦ୍ଧତିର ବିନିମୟ ମାଧ୍ୟମରେ ଓଡ଼ିଶାର MSME ଓ ଷ୍ଟାର୍ଟଅପ୍‌ଗୁଡ଼ିକ ତୋତ୍ତୋରି ସହିତ ଗୁରୁତ୍ୱପୂର୍ଣ୍ଣ ବ୍ୟବସାୟିକ ସମ୍ପର୍କ ଗଢ଼ିତୋଳିବାର ବ୍ୟାପକ ସମ୍ଭାବନା ରହିଛି। ଏହି ଉଚ୍ଚସ୍ତରୀୟ କାର୍ଯ୍ୟକ୍ରମରେ କୋଲକାତାସ୍ଥିତ ଜାପାନର କନ୍‌ସୁଲ୍-ଜେନେରାଲ୍‌ ମିଷ୍ଟର ଇଷିକାୱା ୟୋସିହିସା, ଓଡ଼ିଶାର ମୁଖ୍ୟ ଶାସନ ସଚିବ ଶ୍ରୀମତୀ ଅନୁ ଗର୍ଗ ପ୍ରମୁଖ ବିଶିଷ୍ଟ ଶିଳ୍ପପତି, ଶିକ୍ଷକ ଓ ଛାତ୍ରଛାତ୍ରୀମାନେ ଉପସ୍ଥିତ ଥିଲେ। କାର୍ଯ୍ୟକ୍ରମରେ ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀ ହେମନ୍ତ ଶର୍ମାଙ୍କ ସ୍ୱାଗତ ଭାଷଣ ଦେଇଥିବାବେଳେ ଶିଳ୍ପ ବିଭାଗ ନିର୍ଦ୍ଦେଶିକା ଶ୍ରୀମତୀ ଆବୋଲି ସୁନୀଲ ନରାବନେ ଧନ୍ୟବାଦ ଜ୍ଞାପନ କରିଥିଲେ।ସୂଚନାଯୋଗ୍ୟ ଯେ, ଜାପାନର ତୋତ୍ତୋରି ପ୍ରଦେଶର ଗଭର୍ଣ୍ଣର ମିଷ୍ଟର ଶିଞ୍ଜୀ ହିରାଇ ଏହି ମୈତ୍ରୀ ଚୁକ୍ତି ପାଇଁ ଓଡିଶାକୁ ଏକ ୮୦ ଜଣିଆ ପ୍ରତିନିଧି ଦଳ ନେଇ ଆସିଛନ୍ତି। ଏହି ପ୍ରତିନିଧି ଦଳରେ ତୋତ୍ତୋରିର ବିଭିନ୍ନ ଶିଳ୍ପ ସଂସ୍ଥା, ବୈଷୟିକ ଅନୁଷ୍ଠାନ, ବ୍ୟାଙ୍କ, ଆର୍ଥିକ ସଂସ୍ଥା ଏବଂ ବାଣିଜ୍ୟ ବ୍ୟବସାୟିକ ସଂସ୍ଥାର ସଦସ୍ୟମାନେ ଅଛନ୍ତି। ଚୁକ୍ତି ସ୍ୱାକ୍ଷରିତ ପରେ ଏହି ଦଳ ଭୁବନେଶ୍ୱର ସ୍ଥିତ ୱାର୍ଲ୍ଡ ସ୍କିଲ୍ ସେଣ୍ଟର ପରିଦର୍ଶନରେ ଯାଇ ସେଠାରେ ଛାତ୍ରଛାତ୍ରୀ, ଫାକଲ୍‌ଟି ମେମ୍ବର୍‌ସ ଏବଂ ଅଧିକାରୀ ମାନଙ୍କ ସହିତ ମତ ବିନିମୟ କରିଥିଲେ।

The post ଓଡ଼ିଶା-ଜାପାନ ସମ୍ପର୍କରେ ନୂଆ ଅଧ୍ୟାୟ: ତୋତ୍ତୋରି ପ୍ରିଫେକ୍‌ଚର୍‌ ସହ ଐତିହାସିକ ‘ମୈତ୍ରୀ ସମ୍ପର୍କ ଚୁକ୍ତି’ ସ୍ୱାକ୍ଷରିତ appeared first on ONA KHABAR.

ଭୁବନେଶ୍ୱର : ଆସନ୍ତା ନଭେମ୍ବର ୧୫ରେ ମହାନ ସ୍ୱାଧୀନତା ସଂଗ୍ରାମୀ ‘ଧରତୀ ଆବା’ ଭଗବାନ ବିର୍ସା ମୁଣ୍ଡାଙ୍କ ୧୫୧ତମ ଜନ୍ମଜୟନ୍ତୀ ଏବଂ ୨୨ରେ ଶହୀଦ ଲକ୍ଷ୍ମଣ ନାୟକଙ୍କ ୧୨୭ତମ ଜନ୍ମଜୟନ୍ତୀ ପାଳନ କରିବ ବିଜେପି । ଏହି ଅବସରରେ ନଭେମ୍ବର ୧୧ ରୁ ୨୨ ପର୍ଯ୍ୟନ୍ତ ‘ଜନଜାତୀୟ ଗୌରବ ଦିବସ’ ଭାବେ ପାଳିତ ହେବାକୁ ଯାଉଛି। ମାନ୍ୟବର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱ ଏବଂ ରାଷ୍ଟ୍ରୀୟ ଅଧ୍ୟକ୍ଷ ଶ୍ରୀ ନୀତିନ ନବୀନଙ୍କ ମାର୍ଗଦର୍ଶନରେ ଭାରତୀୟ ଜନତା ପାର୍ଟି ନଭେମ୍ବର ୧୧ ରୁ ୨୨ ତାରିଖ ପର୍ଯ୍ୟନ୍ତ ପ୍ରତ୍ୟେକ ଆଦିବାସୀ ବହୁଳ ଜିଲ୍ଲା, ବିଧାନସଭା ନିର୍ବାଚନମଣ୍ଡଳୀରେ ‘ଜନଜାତୀୟ ଗୌରବ ଦିବସ’ ପାଳନ କରୁଛି ବୋଲି ବିଜେପି ଅନୁସୁଚିତ ଜନଜାତି ମୋର୍ଚ୍ଚା ରାଜ୍ୟ ସଭାପତି ତଥା ପୂର୍ବତନ ବିଧାୟକ ଶ୍ରୀ କାନ୍ଦ୍ରା ସୋରେନ କହିଛନ୍ତି । ରାଜ୍ୟ କାର୍ଯ୍ୟାଳୟରେ ଆଜି ଅନୁଷ୍ଠିତ ସାମ୍ବାଦିକ ସମ୍ମିଳନୀରେ କାର୍ଯ୍ୟକ୍ରମଗୁଡ଼ିକର ବିସ୍ତୃତ ସୂଚନା ଦିଆଯିବା ସହ ଆଦିବାସୀ ସମାଜର କଲ୍ୟାଣ ପାଇଁ ହୋଇଥିବା ଐତିହାସିକ ପଦକ୍ଷେପଗୁଡ଼ିକୁ ଉପସ୍ଥାପନ କରାଯାଇଛି। ୧୮୭୫ ମସିହା ନଭେମ୍ବର ୧୫ ତାରିଖରେ ଝାଡ଼ଖଣ୍ଡର ଉଲିହାତୁଠାରେ ଜନ୍ମଗ୍ରହଣ କରିଥିବା ଭଗବାନ ବିର୍ସା ମୁଣ୍ଡା ବ୍ରିଟିଶ ଶୋଷଣ ବିରୁଦ୍ଧରେ ଆଦିବାସୀମାନଙ୍କୁ ଏକତ୍ରିତ କରି ‘ଉଲଗୁଲାନ୍‌’ (ମହାବିଦ୍ରୋହ)ର ନେତୃତ୍ୱ ନେଇଥିଲେ ଏବଂ “ଆବୁଆ ଦିସମ୍ ଆବୁଆ ରାଜ”ର ନାରା ଦେଇଥିଲେ। ଜଳ, ଜଙ୍ଗଲ, ଜମି ଓ ଆଦିବାସୀ ସ୍ୱାଭିମାନର ସୁରକ୍ଷା ପାଇଁ ମାତ୍ର ୨୫ ବର୍ଷ ବୟସରେ ସେ ଶହୀଦ ହୋଇଥିଲେ। ତାଙ୍କରି ବଳିଦାନକୁ ଶ୍ରଦ୍ଧାଞ୍ଜଳି ଜଣାଇ ମୋଦୀ ସରକାର ତାଙ୍କ ଜନ୍ମଜୟନ୍ତୀକୁ ‘ଆଦିବାସୀ ଗୌରବ ଦିବସ’ ଭାବେ ଘୋଷଣା କରୁଛନ୍ତି ବୋଲି ଶ୍ରୀ ସୋରେନ କହିଛନ୍ତି ।

ଏହି ସାମ୍ବାଦିକ ସମ୍ମିଳନୀରେ ଉପସ୍ଥିତ ଥିବା ମାନ୍ୟବର ମନ୍ତ୍ରୀ ଶ୍ରୀ ନିତ୍ୟାନନ୍ଦ ଗଣ୍ଡ କହିଛନ୍ତି ଯେ, ଦେଶର ୭୫ଟି ବିଶେଷ ଭାବେ ଦୁର୍ବଳ ଆଦିବାସୀ ଗୋଷ୍ଠୀ (ପିଭିଟିଜି) ଙ୍କ ବିକାଶ ପାଇଁ ପିଏମ୍‌-ଜନମନ ଯୋଜନା କାର୍ଯ୍ୟକାରୀ ହୋଇଛି। ଏହି ଯୋଜନାରେ ୪.୮୨ ଲକ୍ଷ ଗୃହ ସ୍ୱୀକୃତି, ୭୯୯୨ କିମି ରାସ୍ତା ନିର୍ମାଣ ଏବଂ ୧.୩୫ ଲକ୍ଷରୁ ଉର୍ଦ୍ଧ୍ୱ ଘରକୁ ବିଜୁଳି ସଂଯୋଗୀକରଣ ସରିଛି। ଧରତୀ ଆବା ଜନଜାତୀୟ ଗ୍ରାମ ଉତ୍କର୍ଷ ଅଭିଯାନରେ ୭୯.୧୫୬ କୋଟି ଅଟକଳରେ ୬୩,୦୦୦ ଗ୍ରାମର ୫ କୋଟିରୁ ଉର୍ଦ୍ଧ୍ୱ ଆଦିବାସୀ ଜନଜାତିଙ୍କ ନିକଟରେ ୧୭ଟି ମନ୍ତ୍ରାଳୟର ଯୋଜନା ଏକକାଳୀନ ପହଞ୍ଚାଯାଉଛି। ଗୁଣାତ୍ମକ ଶିକ୍ଷା ପାଇଁ ୭୨୮ଟି ଏକଲବ୍ୟ ମଡେଲ ଆବାସିକ ବିଦ୍ୟାଳୟ ସ୍ଥାପନ ହେଉଛି। ୩,୯୫୮ ବନଧନ କେନ୍ଦ୍ର ଜରିଆରେ ୧୧.୮୩ ଲକ୍ଷ ଲୋକ ଜୀବିକା ସହ ଯୋଡ଼ି ହୋଇଛନ୍ତି। ୨୦୧୪-୧୫ରେ ଜନଜାତି ମନ୍ତ୍ରାଳୟର ବଜେଟ୍ ୪,୪୯୭.୯୬ କୋଟି ଥିବା ବେଳେ ୨୦୨୫-୨୬ରେ ତାହା ୨୩୧% ବୃଦ୍ଧି ପାଇ ୧୪,୯୨୬ କୋଟିରେ ପହଞ୍ଚିଛି। ୧୯୯୯ରେ ଅଟଳ ବିହାରୀ ବାଜପେୟୀଙ୍କ ସରକାର ଅମଳରେ ସ୍ୱତନ୍ତ୍ର ଆଦିବାସୀ ମନ୍ତ୍ରାଳୟ ଗଠନ ହୋଇଥିଲା। ମୋଦୀ ସରକାରଙ୍କ ସମୟରେ ଶ୍ରୀମତୀ ଦ୍ରୌପଦୀ ମୁର୍ମୁ ଦେଶର ପ୍ରଥମ ଜନଜାତି ମହିଳା ରାଷ୍ଟ୍ରପତି ଭାବେ ଅଭିଷିକ୍ତ ହୋଇଛନ୍ତି। ଓଡ଼ିଶାର ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ, ଛତିଶଗଡ଼ ମୁଖ୍ୟମନ୍ତ୍ରୀ ଶ୍ରୀ ବିଷ୍ଣୁ ଦେବ ସାଏ ଏବଂ ଅରୁଣାଚଳ ପ୍ରଦେଶ ମୁଖ୍ୟମନ୍ତ୍ରୀ ଶ୍ରୀ ପେମା ଖାଣ୍ଡୁ ଆଦିବାସୀ ସମାଜର ପ୍ରତିନିଧିତ୍ୱ କରୁଛନ୍ତି। ଜାମ୍ମୁ-କାଶ୍ମୀରରେ ୩୭୦ ଧାରା ଉଚ୍ଛେଦ ପରେ ୯ଟି ଅନୁସୂଚିତ ଜନଜାତି ସଂରକ୍ଷିତ ବିଧାନସଭା ଆସନ ସୃଷ୍ଟି କରାଯାଇଛି ବୋଲି ମନ୍ତ୍ରୀ ଶ୍ରୀ ଗଣ୍ଡ କହିଛନ୍ତି ।

ଓଡ଼ିଶାର ୧୨ଟି ଅନୁସୂଚିତ ଜନଜାତି ବହୁଳ ଜିଲ୍ଲାରେ ପାର୍ଟି ପକ୍ଷରୁ ବ୍ୟାପକ କାର୍ଯ୍ୟକ୍ରମ ଆୟୋଜିତ ହେବ। ରାଜ୍ୟର ୨୩ଟି ଆଇଟିଡିଏ ବ୍ଲକରେ ମୁଖ୍ୟମନ୍ତ୍ରୀ ଜନଜାତି ଜୀବିକା ମିଶନ କାର୍ଯ୍ୟକ୍ଷମ ଅଛି। ନଭେମ୍ବର ୧୧ – ୧୮ ତାରିଖ ପର୍ଯ୍ୟନ୍ତ ଅନୁଷ୍ଠିତ ହେବାକୁ ଥିବା ଜନଜାତୀୟ ଗୌରବ ସପ୍ତାହ କାର୍ଯ୍ୟକ୍ରମ ସୂଚୀ ସଂପର୍କରେ ସୁଚନା ଦେଇ ଶ୍ରୀ କାନ୍ଦ୍ରା କହିଛନ୍ତି ଯେ, ଏଥିସହିତ ରାଜ୍ୟସ୍ତରୀୟ ଶହୀଦ ଲକ୍ଷ୍ମଣ ନାୟକ ଜନ୍ମ ଜୟନ୍ତୀ ମଧ୍ୟ ନିଷ୍ଠାର ସହ ପାଳିତ ହେବ। ୧୨ ନଭେମ୍ବର ୧୨ ତାରିଖ ଦିନ ରାଷ୍ଟ୍ରପତି ଭବନରେ ମାନ୍ୟବର ରାଷ୍ଟ୍ରପତି ଶ୍ରୀମତୀ ଦ୍ରୌପଦୀ ମୁର୍ମୁ ୨୦୦ଟି ଏକଲବ୍ୟ ବିଦ୍ୟାଳୟ ଛାତ୍ରଛାତ୍ରୀ ଓ ପିଭିଟିଜି ପ୍ରତିନିଧିଙ୍କ ସହ ଆଲୋଚନା କରିବେ । ନଭେମ୍ବର ୧୨ ଓ ୧୩, ଦୁଇ ଦିନ ଧରି ନୂଆଦିଲ୍ଲୀଠାରେ ଅନୁଷ୍ଠିତ ରାଷ୍ଟ୍ରୀୟ ଜନଜାତି ସାହିତ୍ୟ ଉତ୍ସବ ଅନୁଷ୍ଠିତ ହେବ। ସଂସଦ ଭବନ ଓ ଭଗବାନ ବୀର୍ସା ମୁଣ୍ଡାଙ୍କ ଜନ୍ମସ୍ଥଳୀ ଉଲିହାତୁରେ ୧୫ ତାରିଖ ଦିନ ପୁଷ୍ପାଞ୍ଜଳି ଅର୍ପଣ କରାଯିବ। ସେହିପରି ଏହି ଅବସରରେ ଗୌରବ ଯାତ୍ରା, ସାଂସ୍କୃତିକ କାର୍ଯ୍ୟକ୍ରମ, ସ୍ଥାନୀୟ ଆଦିବାସୀ ଗୁଣୀଜନଙ୍କୁ ସମ୍ବର୍ଦ୍ଧନା ଏବଂ ସିକଲ୍ ସେଲ୍ ଆନିମିଆ ସ୍ୱାସ୍ଥ୍ୟ ଶିବିର ଆୟୋଜନ କରାଯିବ। “ସବକା ସାଥ, ସବକା ବିକାଶ, ସବକା ବିଶ୍ୱାସ, ସବକା ପ୍ରୟାସ’ ମନ୍ତ୍ରକୁ ପାଥେୟ କରି ମୋଦୀ ସରକାର ଆଦିବାସୀ ସମାଜକୁ ସମ୍ମାନ, ସୁରକ୍ଷା ଓ ସମୃଦ୍ଧି ପ୍ରଦାନ କରୁଛନ୍ତି। ଆସନ୍ତା ନଭେମ୍ବର ୧୫ ତାରିଖରେ ନିଜ ନିଜ ଗ୍ରାମ ଓ ଅଞ୍ଚଳରେ ଭଗବାନ ବୀର୍ସା ମୁଣ୍ଡା ଏବଂ ସ୍ଥାନୀୟ ଆଦିବାସୀ ଜନନାୟକମାନଙ୍କୁ ଶ୍ରଦ୍ଧାଞ୍ଜଳି ଜଣାଇବାକୁ ସମସ୍ତ ନାଗରିକଙ୍କୁ ଅନୁରୋଧ କରାଯାଉଛି। ଗଣମାଧ୍ୟମ ପ୍ରତିନିଧିମାନଙ୍କୁ ଏହି ଗୌରବମୟ ଗାଥା ଜନସାଧାରଣଙ୍କ ନିକଟରେ ପହଞ୍ଚାଇବା ପାଇଁ ଶ୍ରୀ କାନ୍ଦ୍ରା ଅନୁରୋଧ କରିଛନ୍ତି । ଏହି ସାମ୍ବାଦିକ ସମ୍ମିଳନୀରେ ବରିଷ୍ଠ ନେତ୍ରୀ ସୁଶ୍ରୀ ସୁକେଶୀ ଓରାମ ଏବଂ ଅନୁସୁଚିତ ଜନଜାତି ମୋର୍ଚ୍ଚା ରାଜ୍ୟ ସାଧାରଣ ସଂପାଦକ ଶ୍ରୀ ଗଙ୍ଗାରାମ ସୋରେନ ଉପସ୍ଥିତ ଥିଲେ ।

The post ଆଦିବାସୀ ସମାଜ ଭୋଟ୍ ବ୍ୟାଙ୍କ ନୁହେଁ, ଭାରତର ଆତ୍ମା: କାନ୍ଦ୍ରା ସୋରେନ appeared first on ONA KHABAR.

ଭୁବନେଶ୍ୱର: ରାଜ୍ୟକୁ ବିକଶିତ କରିବାକୁ ହେଲେ ସରକାରଙ୍କ ଯୋଜନାକୁ ଜନସାଧାରଣଙ୍କ ଆଗରେ ସର୍ବବ୍ୟାପୀ, ସର୍ବସ୍ପଶୀ ଏବଂ ଅନ୍ତ୍ୟୋଦୟ ହେବା ଉଚିତ୍‌। ୨୦୨୪ରେ ସରକାର ଆସିବା ପରେ ସରକାରଙ୍କ ସମସ୍ତ ଯୋଜନା ସର୍ବସ୍ପର୍ଶୀ, ସର୍ବବ୍ୟାପୀ ଓ ଅର୍ନ୍ତ୍ୟୋଦୟ କରିବାକୁ ଆମେ ସଦାସର୍ବଦା ଚେଷ୍ଟିତ ଅଛୁ। ସାମାଜିକ ସୁରକ୍ଷା ତଥା ଭିନ୍ନକ୍ଷମ ସଶକ୍ତିକରଣ ଏକ ସମ୍ବେଦନଶୀଳ ବିଭାଗ ଅଟେ। ଏହି ପ୍ରସଙ୍ଗକୁ ନେଇ ରାଜନୀତି କରିବା ଅନୁଚିତ୍ ଅଟେ। ସମାଜର ଅନ୍ତିମ ଧାଡିରେ ଥିବା ନିଷ୍ପେସିତ, ପ୍ରପିଡିତ ବ୍ୟକ୍ତିମାନଙ୍କ କଲ୍ୟାଣ କରିବାକୁ ଏହି ବିଭାଗକୁ ତତ୍କାଳୀନ ବିଜେଡି ସରକାର ଏକ ରାଜନୈତିକ ଖେଳନା ଭାବେ ବ୍ୟବହାର କରୁଥିଲେ। ଆମ ସରକାର ଆସିବା ପରେ ମୋହନ ମାଝୀଙ୍କ ସରକାର ଲୋକପ୍ରିୟ ହୋଇଛନ୍ତି । ଭତ୍ତା ବଣ୍ଟନକୁ ସର୍ବବ୍ୟାପୀ, ସର୍ବସ୍ପର୍ଶୀ ଓ ଅନ୍ତ୍ୟୋଦୟ କରିବାକୁ ବିଜେପି ସରକାର ସଦାସର୍ବଦା ବଦ୍ଧପରିକର । ଗତକାଲି ବାଲେଶ୍ୱରଠାରେ ମାନ୍ୟବର ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ ରାଜ୍ୟର ଅପେକ୍ଷାରତ ୫,୦୫,୮୩୧ ଜଣ ହିତାଧିକାରୀଙ୍କୁ ଏକକାଳୀନ ଭତ୍ତା ପ୍ରଦାନ କରି ଏକ ଐତିହାସିକ ପଦକ୍ଷେପ ଗ୍ରହଣ କରିଛନ୍ତି। ପୂର୍ବରୁ ମଧୁବାବୁ ପେନସନ ଯୋଜନା ଓ ଜାତୀୟ ସାମାଜିକ ସହାୟତା କାର୍ଯ୍ୟକ୍ରମ ଅଧୀନରେ ୫୬,୧୮,୩୩୬ ଜଣଙ୍କୁ ଭତ୍ତା ମିଳୁଥିବା ବେଳେ, ରାଜ୍ୟରେ ଏବେ ଭତ୍ତା ପାଉଥିବା ହିତାଧିକାରୀଙ୍କ ସଂଖ୍ୟା ୬୧,୨୪,୧୬୭ କୁ ପହଂଚିଛି । ବର୍ତ୍ତମାନ ରାଜ୍ୟରେ ଭତ୍ତା ପାଇଁ ଆଉ କୌଣସି ଆବେଦନକାରୀ ଅପେକ୍ଷାରତ ନାହାନ୍ତି। ନୂତନ ଆବେଦନ ପାଇଁ ଉନ୍ମୋଚିତ ହୋଇଥିବା ‘ୟୁପିଏମ୍‌ପି’ ବା “ୟୁନିଫାଏଡ୍ ପେନସନ୍ ମ୍ୟାନେଜମେଣ୍ଟ ପୋର୍ଟାଲ’ ମାଧ୍ୟମରେ ଆବେଦନର ମାସକ ମଧ୍ୟରେ ବୃଦ୍ଧବୃଦ୍ଧା, ଯେକୌଣସି ବୟସର ବିଧବା, ଭିନ୍ନକ୍ଷମ, ସ୍ୱାମୀ ପରିତ୍ୟକ୍ତା, କୋଭିଡ୍‌/ଏଡ୍ସ ପ୍ରପୀଡ଼ିତ ଏବଂ ଟ୍ରାନ୍ସଜେଣ୍ଡର ଭଳି ଯୋଗ୍ୟ ହିତାଧିକାରୀଙ୍କ ଆକାଉଣ୍ଟକୁ ସିଧାସଳଖ ପ୍ରାପ୍ୟ ଟଙ୍କା ପହଂଚିବ । ଏହାକୁ ବିରୋଧୀ ଦଳମାନେ ସହ୍ୟ କରିପାରୁନାହାଁନ୍ତି ବୋଲି ମାନ୍ୟବର ବିଧାୟକ ଶ୍ରୀ ସନ୍ତୋଷ ଖଟୁଆ କହିଛନ୍ତି । ରାଜ୍ୟ କାର୍ଯ୍ୟାଳୟଠାରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ଶ୍ରୀ ଖଟୁଆ କହିଛନ୍ତି ଯେ; ୨୦୧୯ ରୁ ୨୦୨୪ ମଧ୍ୟରେ ବିଜେଡି ସରକାର ୫ ବର୍ଷରେ ସମୁଦାୟ ୧୬,୪୬୦ କୋଟି ଟଙ୍କା ପ୍ରଦାନ କରିଥିଲେ। କିନ୍ତୁ ବର୍ତ୍ତମାନର ବିଜେପି ସରକାର ଶାସନକୁ ଆସିବାର ମାତ୍ର ଅଢ଼େଇ ବର୍ଷ ମଧ୍ୟରେ ୨୦,୬୫୫ କୋଟି ଟଙ୍କା ପ୍ରଦାନ ସାରିଛନ୍ତି। ଆଗାମୀ ଅଢ଼େଇ ବର୍ଷ ମଧ୍ୟରେ ଆହୁରି ୨୨,୧୬୭ କୋଟି ଟଙ୍କା ପ୍ରଦାନ କରାଯିବ। ଅର୍ଥାତ୍ ୨୦୨୪ ରୁ ୨୦୨୯ ମଧ୍ୟରେ ଆମ ସରକାର ଭତ୍ତା ବାବଦରେ ସମୁଦାୟ ୪୨,୮୨୨ କୋଟି ଟଙ୍କା ପ୍ରଦାନ କରିବେ, ଯାହାକି ପୂର୍ବ ସରକାରଙ୍କ ତୁଳନାରେ ଅଢ଼େଇ ଗୁଣରୁ ଅଧିକ।

ଭତ୍ତା ବାବଦରେ କେନ୍ଦ୍ରୀୟ ସହାୟତା ବର୍ଷକୁ ପାଖାପାଖି ୫ଶହ ୯୫କୋଟି ଟଙ୍କା ଆସେ, ଯାହା ପୂର୍ବ ବିଜେଡି ସରକାରରେ ଆସୁଥିଲା ଏବଂ ବର୍ତମାନ ମଧ୍ୟ ଆସୁଛି। କିନ୍ତୁ ରାଜ୍ୟ ସରକାର ଆବଶ୍ୟକତାକୁ ଉପଲବ୍ଧି କରି ଏହି ଯୋଜନାକୁ ସର୍ବବ୍ୟାପୀ, ସର୍ବସ୍ପର୍ଶୀ କରିବା ପାଇଁ ୬୦ବର୍ଷ ଅତିକ୍ରମ କରିବା ମାତ୍ରେ ଆପେ ଆପେ ତାଲିକାଭୁକ୍ତ ହେବା ଏବଂ ନୂତନ ହିତାଧିକାରୀଙ୍କୁ ଘରେ ବସି ରହି ଡିଜିଟାଲ ପ୍ଲାର୍ଟଫର୍ମ ଜରିଆରେ ଆବେଦନ କରି ସମସ୍ତ ସୁବିଧା ପାଇବା ଉପରେ ଗୁରୁତ୍ୱ ଦେଇଛନ୍ତି । ଗୋଟିଏ ସରକାର ଯେତେବେଳେ ସରକାରକୁ ଆସେ ସେ ବଜେଟ୍‌କୁ ଅନୁଧ୍ୟାନ କରି ତା ଆୟକୁ ଦେଖି ବ୍ୟୟ କରେ। ଅତ୍ୟଧିକ ଟିକସ ବସାଇବା ବିଜେଡି ସରକାରର ଢାଂଚା ଥିଲା। ଆମେ ବଜେଟ୍ ର ଲୋକଙ୍କ ସୁବିଧା ପାଇଁ ସମସ୍ତ ବ୍ୟବସ୍ଥା କରିଛୁ। ବିଜେପି ଦେଇଥିବା ପ୍ରତିଶ୍ରୁତିକୁ ପାଳନ କରିଛି। ତେଣୁ ଗତ କାଲି ଲୋକପ୍ରିୟ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନିଷ୍ପତି ଏକ ଐତିହାସିକ ଦିନ ଅଟେ। ଏହି ନିଷ୍ପତିକୁ ଆମେ ସ୍ୱାଗତ କରୁଛୁ। ଏହି ପ୍ରସଙ୍ଗକୁ ନେଇ ବିଜେଡି ରାଜନୀତି କରିବା ଏବଂ ବିଭ୍ରାନ୍ତ ସୃଷ୍ଟି କରିବା ଅତ୍ୟନ୍ତ ଲଜ୍ଜାଜନକ ଅଟେ ବୋଲି ଶ୍ରୀ ଖଟୁଆ କହିଛନ୍ତି।

୨୦୧୩ ମସିହା ପର୍ଯ୍ୟନ୍ତ ଏମବିପିୱାଇ ଯୋଜନା ଅଧିନରେ ୩୦୦ଟଙ୍କା ଭତ୍ତା ପ୍ରଦାନ କରାଯାଉଥିଲା। ୨୦୧୩ ମସିହା ପରେ ୨୦୧୮ ମସିହା ପର୍ଯ୍ୟନ୍ତ ଏହି ଭତ୍ତା ରାଶି ୬୦ ରୁ ୭୯ ବର୍ଷ ୩୦୦ଟଙ୍କା ଏବଂ ୮୦ରୁ ଉର୍ଦ୍ଧ୍ୱଙ୍କୁ ୫୦୦ଟଙ୍କା ପ୍ରଦାନ କରାଯାଇଥିଲା। ନିର୍ବାଚନକୁ ଆଖି ଆଗରେ ରଖି ବିଜେଡି ସରକାର ୨୦୧୯ ମସିହାରୁ ୨୦୨୪ ମସିହା ପର୍ଯ୍ୟନ୍ତ ଏହି ପରିମାଣ ୬୦ବୟସରୁ ୭୯ବୟସର ବ୍ୟକ୍ତିମାନଙ୍କୁ ୫୦୦ଟଙ୍କା ଏବଂ ୮୦ ବୟସରୁ ଉର୍ଦ୍ଧ୍ୱ ବ୍ୟକ୍ତିମାନଙ୍କୁ ୭୦୦ ଟଙ୍କା ପ୍ରଦାନ କରିଥିଲେ। ପୁଣି ଥରେ ନିଜ ରାଜନୈତିକ ସ୍ୱାର୍ଥ କାରଣରୁ ସାଧାରଣ ନିର୍ବାଚନ ପୂର୍ବରୁ ଗତ ୨୦୨୪ମସିହା ଫେବୃଆରୀରେ ୬୦ବୟସରୁ ୮୦ବୟସ ପର୍ଯ୍ୟନ୍ତ ୧୦୦୦ ଟଙ୍କା ଓ ୮୦ ବୟସରୁ ଉର୍ଦ୍ଧ୍ୱ ହିତାଧିକାରୀମାନଙ୍କୁ ୧୨୦୦ଟଙ୍କା ଭତା ରାଶି ପ୍ରଦାନ କରୁଥିଲେ। ୨୦୨୪ ମସିହା ଜୁନରେ ଆମ ଲୋକପ୍ରିୟ ବିଜେପି ସରକାର ଶାସନକୁ ଆସିବା ପରେ ଏହାକୁ ସମୀକ୍ଷା କରି ଦେଖିଲେ ଯେ, ଏହି ଯୋଜନା ସର୍ବବ୍ୟାପୀ, ସର୍ବସ୍ପର୍ଶୀ ହେଉନାହିଁ। ସଶକ୍ତିକରଣ ଓ ଭିନ୍ନକ୍ଷମରେ ଭତା ପାଇବାପାଇଁ ବହୁତ ଲୋକ ଅପେକ୍ଷା କରି ରହିଛନ୍ତି। ଏହାକୁ ସରକାର ସମ୍ବେଦନଶୀଳତାର ସହ ନେଇ ଅପକ୍ଷୋରତ ୫ଲକ୍ଷ ୫ହଜାର ୮୩୧ଜଣଙ୍କୁ ଏକକାଳୀନ ଗତକାଲି ମାନ୍ୟବର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ବାଲେଶ୍ୱରରୁ ପ୍ରଦାନ କରିଛନ୍ତି। ଏମବିପିୱାଇ ଏବଂ ଏନଏସିପିୱାଇ ଜରିଆରେ ଆସୁଥିବା ଭତ୍ତା ଟଙ୍କାକୁ ଏକାଠି କରି ହିତାଧିକାରୀଙ୍କ ଆକାଉଂଟରେ ଜମା କରିବା ପାଇଁ ଆବଶ୍ୟକୀୟ ଆଇଟି ବା ପ୍ରଯୁକ୍ତି ପ୍ଲାଟଫର୍ମରେ ସମସ୍ୟା ଦେଖାଯାଉଥିଲା । ବର୍ତ୍ତମାନ ଏହି ତୃଟି ବା ସମସ୍ୟାର ସମାଧାନ ହୋଇଛି, ଆଗକୁ ସମସ୍ୟା ସୃଷ୍ଟି ହେବ ନାହିଁ ଶ୍ରୀ ଖଟୁଆ କହିଛନ୍ତି ।

ସାମ୍ବାଦିକ ସମ୍ମିଳନୀରେ ଭଟଲୀ ବିଧାୟକ ଶ୍ରୀ ଇରାଶିଶ୍ ଆଚାର୍ଯ୍ୟ ବିଜେଡି ସରକାରଙ୍କ ପୂର୍ବ କାର୍ଯ୍ୟଶୈଳୀକୁ ସମାଲୋଚନା କରି କହିଛନ୍ତି ଯେ, ଓଡିଶାରେ ଦୀର୍ଘ ଦିନ ଧରି ଗତ ନବୀନ ବାବୁଙ୍କ ସରକାର ଆଡବାୟା ରାଜା ଦୋହଲିକ୍‌ଙ୍କ ଶାସନ ଚଲାଉଥିଲେ। ଜଣେ ମରିବା ପର୍ଯ୍ୟନ୍ତ ସୁବିଧା ପାଇବା ପାଇଁ ଅପେକ୍ଷା କରି ରହିବା ଅତ୍ୟନ୍ତ ଦୁର୍ଭାଗ୍ୟଜନକ ଥିଲା ପୂର୍ବ ସରକାର ସମୟରେ ଲୋକମାନେ ଜୀବନସାରା ଭତ୍ତା ପାଇଁ ଅପେକ୍ଷା କରି ରହୁଥିଲେ ଏବଂ ଦଳୀୟ ଭିତ୍ତିରେ ଭତ୍ତା ବଣ୍ଟନ ହେଉଥିଲା। ଏହାର ଅନ୍ତ ଘଟାଇ ଗତକାଲି ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ “ସବ୍‌କା ସାଥ୍‌, ସବ୍‌କା ବିଶ୍ୱାସ, ସବ୍‌କା ପ୍ରୟାସ’ ଏବଂ ପଣ୍ଡିତ ଦୀନଦୟାଲ ଉପାଧ୍ୟାୟଙ୍କ ଅନ୍ତୋଦୟ ନୀତିକୁ ଆଧାର କରି ଦଳ ମତ ନିର୍ବିଶେଷରେ ସମସ୍ତ ଯୋଗ୍ୟ ବ୍ୟକ୍ତିଙ୍କୁ ତାଙ୍କ ନାର୍ଯ୍ୟ ଅଧିକାର ପ୍ରଦାନ କରି ପବିତ୍ର ଜଗନ୍ନାଥଙ୍କ ଭୂମିରେ କ୍ରୁରତାର ବ୍ୟବସ୍ଥାକୁ ସମାପନା କରିଛନ୍ତି । ଏହାକୁ ଆମେ ସମସ୍ତେ ସ୍ୱାଗତ କରୁଛୁ। ସରକାରୀ ସୁବିଧାରୁ କେହି ବି ବଞ୍ଚିତ ହେବେ ନାହିଁ — ଏହା ହିଁ ଆମ ସରକାରଙ୍କ ଲକ୍ଷ୍ୟ ଓ ପାର୍ଟିର ବିଚାରଧାରା ବୋଲି ଶ୍ରୀ ଆଚାର୍ଯ୍ୟ କହିଛନ୍ତି । ଏହି ଅବସରରେ ମୁଖପାତ୍ର ଦିଲୀପ ମଲ୍ଲିକ ଏବଂ ଗଣମାଧ୍ୟମ ରାଜ୍ୟ ସଂଯୋଜକ ଶ୍ରୀ ସୁଜିତ ଦାସ ପ୍ରମୁଖ ଉପସ୍ଥିତ ଥିଲେ ।

The post ସମସ୍ତ ଯୋଗ୍ୟ ହିତାଧିକାରୀ ତତ୍କାଳ ଭତ୍ତା ପାଇବାର ଯୁଗ ଆରମ୍ଭ : ସନ୍ତୋଷ ଖଟୁଆ appeared first on ONA KHABAR.