ମେଷ : ପାରିବାରିକ ଶାନ୍ତି ମିଳିବ। କର୍ମକ୍ଷେତ୍ରରେ ପ୍ରମୋଶନ ହୋଇପାରେ। ବ୍ୟବସାୟରେ ଲାଭାବନ୍ ହେବ। ସ୍ୱାସ୍ଥ୍ୟ ଭଲ ରହିବ। ବନ୍ଧୁ ମିଳନର ଯୋଗ ଅଛି। ମହିଳାମାନେ ଧର୍ମକାର୍ଯ୍ୟରେ ସମୟ କାଟିବେ। ବିଦ୍ୟାର୍ଥୀମାନେ କୃତକାର୍ଯ୍ୟ ହେବେ।

ବୃଷ : ପରିବାରରେ ସମ୍ପତିକୁ ନେଇ ଭାତୃ ବିବାଦ ଲାଗିପାରେ। କର୍ମକ୍ଷେତ୍ରରେ ସହକର୍ମୀମାନେ ଅସୁବିଧାରେ ପକାଇପାରନ୍ତି। ବ୍ୟବସାୟରେ ନିଜ ଲୋକମାନେ ହଇରାଣରେ ପକାଇବେ। ମହିଳା ଓ ବିଦ୍ୟାର୍ଥୀମାନେ ଅପମାନିତ କରିପାରନ୍ତି।

ମିଥୁନ : ଆପଣ ଗବେଷଣା ଉଦ୍ଦେଶ୍ୟରେ ଲିପ୍ତ ରହିବେ। ଶରୀର ଅସୁସ୍ଥ ରହିବ। କର୍ମକ୍ଷେତ୍ରରେ ସମ୍ମାନ ବୃଦ୍ଧି ପାଇବ ଯୋଗ ଅଛି। ପରିବାରରେ ଶାନ୍ତି ଦେଖାଦେବ। ବ୍ୟବସାୟରେ ଯଥେଷ୍ଟ ଲାଭ ହୋଇପାରେ। ମହିଳା ଓ ଛାତ୍ରଛାତ୍ରୀମାନେ ଦୁଃଖ ପାଇବେ।

କର୍କଟ : କର୍ମକ୍ଷେତ୍ରରେ ଅଶାନ୍ତି ଦେଖାଦେବ। ପରିବାରେ କଳହ ସୃଷ୍ଟି ହେବ। ସ୍ୱାସ୍ଥ୍ୟ ଭଲ ରହିନପାରେ। ବ୍ୟବସାୟରେ ସତର୍କତା ସହ ଚଳନ୍ତୁ। କ୍ଷତିଗ୍ରସ୍ତ ହେବାର ସମ୍ଭାବନା ଅଛି। ମହିଳା ଓ ବିଦ୍ୟାର୍ଥୀମାନେ ଅପମାନିତ ହେବେ।

ସିଂହ : ଆର୍ଥିକ ପରିସ୍ଥିତି ସ୍ୱଚ୍ଛଳ ରହିବ। ସ୍ୱାସ୍ଥ୍ୟଭଲ ରହି ନପାରେ। ପାରିବାରିକ ଅସୁବିଧା ସୃଷ୍ଟି ହେବ। ମହିଳା ଓ ଛାତ୍ରଛାତ୍ରୀମାନେ ବିଫଳ ହେବ।

କନ୍ୟା : କର୍ମକ୍ଷେତ୍ରରେ ସଫଳତା ପାଇବେ। ବ୍ୟବସାୟରେ ଲାଭବାନ୍ ହେବେ। ପରିବାରରେ ଶାନ୍ତି ମିଳିବ। ସ୍ୱାସ୍ଥ୍ୟ ଭଲ ରହିବ। ବନ୍ଧୁମାନ ସାହାଯ୍ୟ କରିପାରନ୍ତି। ଛାତ୍ରଛାତ୍ରୀମାନେ ବିଶେଷ ଉପକୃତ ହେବେ। ମହିଳାମାନେ ଅତ୍ୟନ୍ତ ଖୁସି ହେବେ।

ତୁଳା : କର୍ମକ୍ଷେତ୍ରରେ ଅଯଥା ଶତ୍ରୁତା ସୃଷ୍ଟି ହେବ। ବ୍ୟବସାୟରେ ଅପମାନିତ ହୋଇପାରନ୍ତି। ସ୍ୱାସ୍ଥ୍ୟ ଖରାପ ହୋଇପାରେ। ପାରିବାରିକ କଳହ ଲାଗିପାରେ। ଖର୍ଚ୍ଚାନ୍ତରେ ପଡ଼ି ବ୍ୟସ୍ତ ହୋଇପାରନ୍ତି। ମହିଳା ଓ ଛାତ୍ରୀମାନେ ଖୁସିରେ ସମୟ କାଟିବେ।

ବିଛା : ମାନସିକ ଚିନ୍ତା ଦୂର ହେବ। ଭୂଲ ସିଦ୍ଧାନ୍ତ ନେଇ ଖର୍ଚ୍ଚନ୍ତାରେ ପଡ଼ିବେ। ସତପ୍ରେରଣା ପାଇପାରନ୍ତି। ଆଗ୍ରହ ହରାଇବେ। ଉତ୍ସବାଦିରେ ଯୋଗ ଦେବେ। ଆଳସ୍ୟ ଅନୁଭବ କରିବେ।

ଧନୁ : ବ୍ୟବସାୟରେ ଆୟ ଓ ବ୍ୟୟ ବଢ଼ିବ। ଆଶା ସଫଳ ହେବ। ଅଭିଜ୍ଞତା କାମରେ ଲଗାଇବେ। ଅଚାନକ ବିବାଦରେ ପଡ଼ିପାରନ୍ତି। ବନ୍ଧୁ ପ୍ରତି ସନ୍ଦେହ ସୃଷ୍ଟି ହେବ। କାର୍ଯ୍ୟରେ ଉନ୍ନତି ଘଟିପାରେ।

ମକର : ଆଜି ଯେକୌଣସି କାମରେ ଆବେଦନ କରି ମଧ୍ୟ ସହାୟତା ମିଳିବ ନାହିଁ। କାର୍ଯ୍ୟରେ ଉନ୍ନତି ଘଟିପାରେ। ଦିନସାରା ଅଶାନ୍ତିରେ ରହିପାରନ୍ତି। ସତର୍କ ଅବଲମ୍ବନ କରିବେ।

କୁମ୍ଭ : ତର ତର ହୋଇ କ୍ଷତିରେ ପଡ଼ିବେ। ଅଟକିଥିବା କାର୍ଯ୍ୟରେ ଆଗେଇବେ। ଆର୍ଥିକ ସମସ୍ୟା ଦେଖାଦେବ। ନିଜ କାର୍ଯ୍ୟରେ ସମୀକ୍ଷା କରିବେ। ଆତ୍ମବିଶ୍ୱାସ ହରାଇପାରନ୍ତି।

ମୀନ : ବିଶୃଙ୍ଖଳା ଭିତରେ କାର୍ଯ୍ୟ ହେବ ନାହିଁ। ଚାପରେ ପଡ଼ି କାର୍ଯ୍ୟ କରିବେ। ଦକ୍ଷତାର ଉପଯୋଗ କରିବେ। ଆକସ୍ମିକ କଳହରେ ପଡ଼ିବେ। ଚିନ୍ତାରୁ ମୁକ୍ତି ପାଇବେ। ମହିଳା ଓ ଛାତ୍ରଛାତ୍ରୀମାନେ ଚିନ୍ତାରୁ ମୁକ୍ତି ପାଇବେ।

The post ଆଜିର ଦିନଟି ଆପଣଙ୍କର କେମିତି କଟିବ, ଆସନ୍ତୁ ଜାଣିବା…. appeared first on ONA KHABAR.

ଭୁବନେଶ୍ୱର: ଜୟଦେବ ନିର୍ବାଚନମଣ୍ଡଳୀର ବିଜେଡିର ସମସ୍ତ ନେତା ଓ କର୍ମୀ ଆଜି ନବୀନ ନିବାସରେ ଦଳ ସଭାପତି ତଥା ମାନ୍ୟବର ବିରୋଧୀ ଦଳ ନେତା ଶ୍ରୀ ନବୀନ ପଟ୍ଟନାୟକଙ୍କୁ ଭେଟି ଦଳର ସଂଗଠନ ସଂପର୍କରେ ଆଲୋଚନା କରିଥିଲେ । ଦଳ ବିରୋଧୀ କାର୍ଯ୍ୟରେ ସଂପୃକ୍ତ ଥିବା ସ୍ଥାନୀୟ ବିଧାୟକଙ୍କ ବିରୋଧରେ ନିଆଯାଇଥିବା କାର୍ଯ୍ୟାନୁଷ୍ଠାନକୁ ସ୍ୱାଗତ କରିବା ସହ ଆଗାମୀ ଦିନରେ ସଂଗଠନକୁ ସୁଦୃଢ କରିବା ପାଇଁ ସମସ୍ତେ ସଂକଳ୍ପ ନେଇଥିଲେ । ଏହି ଅବସରରେ ଜୟଦେବ ନିର୍ବାଚନମଣ୍ଡଳୀକୁ ଆସିବା ପାଇଁ ପୁଷ୍ପଗୁଚ୍ଛ ଓ ଫଳ ଭାର ଦେଇ ସଭାପତିଙ୍କୁ ନିମନ୍ତ୍ରଣ କରିଥିଲେ । ୯୦ ଦଶକଠାରୁ ପ୍ରବାଦ ପୁରୁଷ ବିଜୁ ପଟ୍ଟନାୟକ ଓ ପରେ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହ ଜୟଦେବ ନିର୍ବାଚନ ମଣ୍ଡଳୀର ଜନସାଧାରଣ ରହିଆସିଛନ୍ତି ଓ ଆଗାମୀ ଦିନରେ ମଧ୍ୟ ରହିବେ ବୋଲି ପ୍ରତିଶ୍ରୁତି ଦେଇଥିଲେ । ଏହା ପୂର୍ବରୁ ଶଙ୍ଖ ଭବନ ପରିସରରେ ଅନୁଷ୍ଠିତ ଏକ କର୍ମୀ ସମ୍ମିଳନୀରେ ଦଳର ଉପସଭାପତି ଶ୍ରୀ ପ୍ରତାପ ଜେନା, ବିଧାୟକ ଶ୍ରୀ ଅନନ୍ତ ନାରାୟଣ ଜେନା ଓ ଜୟଦେବ ନିର୍ବାଚନମଣ୍ଡଳୀର ଦଳର ସମସ୍ତ ନେତୃମଣ୍ଡଳୀ ଉଦ୍ବୋଧନ ଦେଇଥିଲେ । ଏହା ପରେ ଏକ ବର୍ଣ୍ଣାଢ୍ୟ ଶୋଭାଯାତ୍ରାରେ ଶଙ୍ଖ ଭବନଠାରୁ ନବୀନ ନିବାସ ପର୍ଯ୍ୟନ୍ତ ଏକ ହଜାରରୁ ଉଦ୍ଧ୍ୱର୍ କର୍ମୀ ଓ ନେତା ଯାଇଥିଲେ । ଏହି ଶୋଭାଯାତ୍ରାରେ ବିଜେଡି ମୁଖପାତ୍ର ତଥା ଗଣମାଧ୍ୟମ ସଂଯୋଜକ ଡ.ଲେନିନ ମହାନ୍ତି ଓ ଡ. ପି୍ରୟବ୍ରତ ମାଝୀ, ତୁମ୍ବନାଥ ପଣ୍ଡା, ଭାଗ୍ୟଲକ୍ଷ୍ମୀ ମିଶ୍ର, ସୋଲାର ମିଶ୍ର, ତି୍ରବିକ୍ରମ ଦାସ, ପ୍ରତାପ ନାୟକ, ତ୍ରିଲୋକ୍ୟ ମହାପାତ୍ର, ଚିନୁ ପଟ୍ଟନାୟକ, ଦୁର୍ଗା ମିଶ୍ର ଓ ମଙ୍ଗରାଜ ବେହେରା ପ୍ରମୁଖ ରହିଥିଲେ ।

The post ଜୟଦେବ ନିର୍ବାଚନମଣ୍ଡଳୀର ବିଜେଡି କର୍ମୀ ଓ ନେତା ନବୀନଙ୍କୁ ଭେଟିଲେ appeared first on ONA KHABAR.

ଭୁବନେଶ୍ୱର: ରାଜ୍ୟର ମୁଖ୍ୟମନ୍ତ୍ରୀଙ୍କଠାରୁ ଆରମ୍ଭ କରି ପୁରା କ୍ୟାବିନେଟ ନିର୍ବାଚନ ଫଳାଫଳର ଖୁସିରେ ଝାଲମୁଢି ଖାଇ ଖୁସି ମନାଉଥିବା ବେଳେ ରାଜ୍ୟର ନିରୀହ ଲୋକମାନେ ଅପରାଧର ଶିକାର ହେଊଛନ୍ତି। ମବ୍ ଲିଞ୍ଚିଂ ପରେ ମବ୍ ଲିଞ୍ଚିଂ ଓ ହତ୍ୟା ଦୁଷ୍କର୍ମ ଭଳି ଘଟଣାମାନ ଓଡିଶାକୁ ଦୋହଲାଇ ଦେଇଛି। ବିପର୍ଯ୍ୟସ୍ତ ଆଇନ ଶୃଙ୍ଖଳା ବ୍ୟବସ୍ଥା ଓ ଅପରାଧଗୁଡିକ ଓଡିଶାକୁ ସମଗ୍ର ଦେଶରେ ଏକ ଲଜ୍ୟାଜନକ ସ୍ଥିତିରେ ପହଞ୍ଚାଇଥିବା ବେଳେ ମଉଜ, ମଜଲିସରେ ମାତିଛନ୍ତି ମୁଖ୍ୟମନ୍ତ୍ରୀ ତଥା ପୂରା କ୍ୟାବିନେଟ । ଗୁରୁବାର ଅପରାହ୍ନରେ ଭୁବନେଶ୍ୱରର ବାଲିଅନ୍ତା ଥାନା ଅନ୍ତର୍ଗତ ବେଣୁପୁର ଅଞ୍ଚଳରେ ଦୁଇଜଣ ଯୁବତୀଙ୍କ ଉପରେ ଅସଦାଚରଣ କରାଯାଇଥିବା ଅଭିଯୋଗରେ ସ୍ପଷ୍ଟ ଦିବାଲୋକରେ ସ୍ଥାନୀୟ ଲୋକଙ୍କ ଆକ୍ରମଣରେ ଜଣେ ଯୁବକଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ଜଣେ ଗୁରୁତର ଆହତ ହୋଇଛନ୍ତି। ପ୍ରଦେଶ କଂଗ୍ରେସ ସଭାପତି ଶ୍ରୀ ଭକ୍ତ ଚରଣ ଦାସ ଏହି ଘଟଣାର ଉଚ୍ଚସ୍ତରୀୟ ତଦନ୍ତ ଦାବି କରି ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଦାବି କରିଛନ୍ତି।

ଶ୍ରୀ ଦାସ୍ ଏକ ପ୍ରେସ ବିବୃତିରେ ଅଭିଯୋଗ କରିଛନ୍ତି ଯେ ଏହି ଘଟଣା ସମଗ୍ର ଦେଶରେ ଏକ ନିନ୍ଦନୀୟ ସ୍ଥିତି ଊପୁଜାଇଛି। ଓଡିଶାରେ ଏକ ଜଙ୍ଗଲରାଜ୍ ଚାଲିଛି। ପୂର୍ବରୁ ରାଜ୍ୟରେ ଏଭଳି ବହୁ ଅମାନବୀୟ ଘଟଣା ଘଟିଚାଲିଥିଲେ ମଧ୍ୟ ରାଜ୍ୟର ଡବଲ ଇଂଜିନ ସରକାର ଏଗୁଡିକୁ ନିୟନ୍ତ୍ରଣ କରିବାକୁ ସଂପୂର୍ଣ୍ଣ ବିଫଳ ହୋଇଛନ୍ତି। ପୂରା ହାତବାନ୍ଧି ବସିଛନ୍ତି। ଦୁଷ୍କର୍ମ ଅଭିଯୋଗ(ତଦନ୍ତ ସାପେକ୍ଷ) ଘଟଣାରେ ସ୍ପଷ୍ଟ ଦିବାଲୋକରେ ଜଣଙ୍କୁ ହତ୍ୟା କରାଯାଇପାରେ, ଏହା ହିଁ ସୂଚାଇ ଦେଇଛି ଯେ ରାଜ୍ୟରେ କିଭଳି ଆଇନ, ଶୃଙ୍ଖଳା ପରିସ୍ଥିତି ଉପୁଜିଛି। କିଛି ଦିନ ତଳେ କଣାସ ବର୍ବର ଆକ୍ରମଣ ଘଟଣା ଯେଊଁଥିରେ କିଛି ଯୁବକ ଅନ୍ୟ ଜଣେ ଯୁବକଙ୍କ ଶରୀର ଉପରେ ବୁଲେଟ ଗାଡି ଚଢାଇ ହତ୍ୟା କରିବାକୁ ଉଦ୍ୟମ କରିଥିଲେ। ସେହିଭଳି ଅନ୍ୟ ଏକ ଘଟଣାରେ ଢେଙ୍କାନାଳ ଜିଲ୍ଲାରେ ଜଣେ ମହିଳାଙ୍କୁ ଦୁଷ୍କର୍ମ କରିବା ପରେ ଆକ୍ରମଣ କରି ସଂପୃକ୍ତ ଯୁବତୀ ଜଣଙ୍କୁ ଜଙ୍ଗଲରେ ଫୋପାଡି ଦେଇ ଚାଲିଥିଲେ। ରାଜ୍ୟରେ ନାରୀମାନଙ୍କ ଉପରେ ଉଦବେଗଜନକ ଅତ୍ୟାଚାର ଓ ଶାସକଦଳର ଛତ୍ରଛାୟାରେ ଏହି ଗୁଣ୍ଡାରାଜ୍ ଚାଲିଛି।

ତଥ୍ୟ ଅନୁଯାୟୀ ଜୁନ୍ 2024 ରୁ ଫେବୃଆରୀ 2026 ମଧ୍ୟରେ ରାଜ୍ୟରେ 54ଟି ସାମ୍ପ୍ରଦାୟିକ ଦଙ୍ଗା ଏବଂ 7ଟି ମବ୍ ଲିଞ୍ଚିଂ ଘଟଣା ଘଟିଛି। ତିନିଦିନ ତଳେ କଳାହାଣ୍ଡି ଜୟପାଟଣା ବ୍ଲକ୍ ଅଧୀନସ୍ଥ ତଳଗୁଡ଼ା ଗ୍ରାମର ଜଣେ ଦଳିତ ଯୁବକଙ୍କୁ ଗୋରୁ ଚମଡ଼ା କାରବାର କରୁଥିବା ଅଭିଯୋଗରେ ବଜରଙ୍ଗ ଦଳର କର୍ମୀମାନେ ପିଟିପିଟି ଦରମରା କରିବା ସମଗ୍ର ଦେଶରେ ଚାଞ୍ଚଲ୍ୟ ସୃଷ୍ଟି କରିଛି। ଜାନୁଆରୀ 2026ରେ ବାଲେଶ୍ବର ଜିଲ୍ଲାରେ ଗୋରୁ ଚୋରା ଚାଲାଣ ସନ୍ଦେହରେ ଜଣେ 35 ବର୍ଷୀୟ ମୁସଲିମ ବ୍ୟକ୍ତି ସେଖ ମୁକଦର ମହମ୍ମଦଙ୍କୁ ଏକ ଏକ ମବ୍ ଲିଞ୍ଚିଂରେ ହତ୍ୟା କରାଯାଇଥିଲା। ମୟୂରଭଞ୍ଜ ଜିଲ୍ଲାରେ ଜଣେ 14 ବର୍ଷୀୟ ବାଳକକୁ ଛେଳି ଚୋରି କରୁଥିବା ସନ୍ଦେହରେ ହତ୍ୟା କରାଯାଇଥିଲା; ୧୧ ଜଣଙ୍କୁ ଗିରଫ କରାଯାଇଥିଲା। ପଶ୍ଚିମବଙ୍ଗର ଜଣେ ପ୍ରବାସୀ ଶ୍ରମିକଙ୍କୁ ସମ୍ବଲପୁରରେ ଏକ ମୋବ୍ ଦ୍ୱାରା ପିଟି ପିଟି ହତ୍ୟା କରାଯାଇଥିଲା। ସେ ଜଣେ ଅବୈଧ ବାଂଲାଦେଶୀ ପ୍ରବାସୀ ବୋଲି ଅଭିଯୋଗ କରି ଏହି ଆକ୍ରମଣ କରିଥିଲେ। ସେହିଭଳି ଖୋର୍ଦ୍ଧା ଜିଲ୍ଲାରେ ଜଣେ ସରକାରୀ ରେଳ ପୋଲିସ (GRP) କନଷ୍ଟେବଳଙ୍କୁ କିଛି ଲୋକ ପିଟି ପଟିପିଟି ହତ୍ୟା କରିଥିଲେ। ଗତବର୍ଷ ଜୁନ୍‌ ମାସରେ ଗଂଜାମ ଜିଲ୍ଲାର ଖରୀଗୁମ୍ମା ଗ୍ରାମରେ ଦୁଇଜଣ ଦଳିତ ଯୁବକଙ୍କୁ ଗୋରୁଚାଲାଣ ଅଭିଯୋଗରେ ଯେପରି ସେମାନଙ୍କ କାନ୍ଧରେ ହଳ ଲଗାଇ ସେମାନଙ୍କ ମୁଣ୍ଡର ଅଧାଚୁଟି କାଟି ନର୍ଦ୍ଦମା ପାଣି ପିଆଇବା ସହ ଘାସ ଖାଇବାକୁ ବାଧ୍ୟ କରାଗଲା, ତାହା ଯେ କୌଣସି ସଭ୍ୟ ସଭାଜ ପାଇଁ ଲଜ୍ଜା।

ମହିଳାଙ୍କ ବିରୋଧରେ ରାଜ୍ୟରେ ଗତ ଜୁନ୍ ୨୦୨୪ ରୁ ଜୁଲାଇ ୨୦୨୫ ମଧ୍ୟରେ ୩୭,୦୦୦ ରୁ ଅଧିକ ଅପରାଧିକ ମାମଲା ପଞ୍ଜିକୃତ ହୋଇଛି। ୨୦୨୫ ମସିହାରେ ଏହି ଅପରାଧ ୫.୬% ବୃଦ୍ଧି ପାଇଛି। ରାଜ୍ୟବ୍ୟାପୀ ବଳାତ୍କାର ମାମଲା ବୃଦ୍ଧି ପାଇଥିବାବେଳେ ଭୁବନେଶ୍ୱର ଭଳି ସହରାଞ୍ଚଳରେ ତୀବ୍ର ବୃଦ୍ଧି ଘଟିଛି। ବାଲେଶ୍ୱର, ଢେଙ୍କାନାଳ, ଦେବଗଡ଼, ରାୟଗଡ଼ା,ପୁରୀ,ମୟୁରଭଞ୍ଜ ଓ ସମ୍ବଲପୁର ଭଳି ଜିଲ୍ଲାଗୁଡିକରେରେ ଏଭଳି ଘଟଣା ବୃଦ୍ଧି ପାଇବା ସୂଚିତ କରୁଛି। ଏହି ଘଟଣାଗୁଡ଼ିକରୁ ସ୍ପଷ୍ଟ ଜଣା ପଡୁଛି ଯେ ରାଜ୍ୟରେ ଏହି ବିଜେପି ଶାସନରେ କିଭଳି ଏକ ଭୟର ବାତାବରଣ ଓ ଅରାଜକତାର କଳା ଅଧ୍ୟାୟ ସୃଷ୍ଟି କରିଛି। ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତି ଉତ୍କଟ ଆକାରର ଧାରଣ କରିଛି ଏବଂ ରାଜ୍ୟର ଡବଲ ଇଂଜିନ ସରକାର ଏଥିରେ ସଂପୂର୍ଣ୍ଣ ବିଫଳ ହୋଇଛନ୍ତି। ଗତ ମାସକରୁ ଦୁଇ ମାସ ମଧ୍ୟରେ ରାଜ୍ୟରେ ଆଶାତୀତ ଭାବେ ଅପରାଧ ବୃଦ୍ଧି ପାଇଛି। ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତିରେ ତୁରନ୍ତ ସୁଧାର ଆଣିବା ସହ ଅପରାଧ ନିୟନ୍ତ୍ରଣ ପାଇଁ ରୋଜ୍ୟ ସରକାର ତୁରନ୍ତ କୌଣସି ଠୋସ୍ ପଦକ୍ଷେପ ନ ନେଲେ ଏହା ଆଗକୁ ଆହୁରି ବଢିବ। ତେଣୁ ସରକାର ତୁରନ୍ତ ଦୃଷ୍ଟି ଦେବାକୁ ରାଜ୍ୟ କଂଗ୍ରେସ ସଭାପତି ଶ୍ରୀ ଦାସ୍ ଦାବି କରିଛନ୍ତି।

The post ରାଜ୍ୟରେ ହୁ-ହୁ ହୋଇ ବଢିଚାଲିଛି ଅପରାଧ: ଭକ୍ତ appeared first on ONA KHABAR.

ବିଗୁଡିଛି ଆଇନ ଶୃଙ୍ଖଳା ପରିସ୍ଥିତି; ମୁଖ୍ୟମନ୍ତ୍ରୀଙ୍କ ଇସ୍ତଫା ଦାବି କଲା ବିଜୁ ଯୁବ-ଛାତ୍ର ଜନତା ଦଳ
ଭୁବନେଶ୍ୱର: ଓଡ଼ିଶାରେ ଦିନକୁ ଦିନ ବିଗୁଡୁଥିବା ଆଇନ ଶୃଙ୍ଖଳା ପରିସ୍ଥିତି, ବୃଦ୍ଧି ପାଉଥିବା ଅପରାଧ ଏବଂ ସାଧାରଣ ଜନତାଙ୍କ ମନରେ ସୃଷ୍ଟି ହେଉଥିବା ଭୟ ଓ ଅସୁରକ୍ଷାର ବାତାବରଣ ବିରୋଧରେ ଆଜି ବିଜୁ ଯୁବ ଜନତା ଦଳ ଓ ବିଜୁ ଛାତ୍ର ଜନତା ଦଳ ପକ୍ଷରୁ ମୁଖ୍ୟମନ୍ତ୍ରୀଙ୍କ ବାସଭବନ ଘେରାଉ କରାଯିବା ସହିତ ମୁଖ୍ୟମନ୍ତ୍ରୀଙ୍କ ଇସ୍ତଫା ଦାବି କରାଯାଇଛି । ବିଜୁ ଜନତା ଦଳର ସଭାପତି ଶ୍ରୀ ନବୀନ ପଟ୍ଟନାୟକଙ୍କ ନିଦେ୍ର୍ଦଶକ୍ରମେ ବିଜୁ ଯୁବ ଜନତା ଦଳର ସଭାପତି ଶ୍ରୀ ଚିନ୍ମୟ ସାହୁ ଏବଂ ବିଜୁ ଛାତ୍ର ଜନତା ଦଳର ସଭାନେତ୍ରୀ ଇପ୍ସିତା ସାହୁଙ୍କ ନେତୃତ୍ୱରେ ଆୟୋଜିତ ଏହି ଆନେ୍ଦାଳନରେ ବହୁ ସଂଖ୍ୟକ ଯୁବ ଓ ଛାତ୍ର କର୍ମୀ ଯୋଗଦେଇ ରାଜ୍ୟରେ ଶାନ୍ତି, ସୁରକ୍ଷା ଓ ସୁସ୍ଥ ଶାସନ ବ୍ୟବସ୍ଥା ପାଇଁ ସ୍ୱର ଉଠାଇଥିଲେ । ବର୍ତ୍ତମାନ ସରକାରଙ୍କ ଅବହେଳା ଏବଂ ବିଫଳତା କାରଣରୁ ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତି ଚିନ୍ତାଜନକ ହୋଇପଡ଼ିଛି । ମହିଳା, ଯୁବକ, ଛାତ୍ରଛାତ୍ରୀ ଏବଂ ସାଧାରଣ ଲୋକ ନିଜକୁ ଅସୁରକ୍ଷିତ ମନେ କରୁଛନ୍ତି । ଅପରାଧୀମାନଙ୍କ ମନୋବଳ ବୃଦ୍ଧି ପାଉଥିବାବେଳେ ସାଧାରଣ ଲୋକଙ୍କ ସୁରକ୍ଷା ପ୍ରତି ସରକାର ଗୁରୁତ୍ୱ ଦେଉନଥିବା ଅତ୍ୟନ୍ତ ଦୁର୍ଭାଗ୍ୟଜନକ ।

ଏପରି ପରିସ୍ଥିତିରେ ରାଜ୍ୟ ସରକାର ତୁରନ୍ତ କଠୋର ପଦକ୍ଷେପ ନେଇ ଲୋକମାନଙ୍କ ଭରସା ପୁନଃସ୍ଥାପନ କରିବା ସହିତ ରାଜ୍ୟରେ ଶାନ୍ତି ଓ ସୁରକ୍ଷା ସୁନିଶ୍ଚିତ କରିବା ଆବଶ୍ୟକ ବୋଲି ଦଳ ପକ୍ଷରୁ ଦାବି କରାଯାଇଛି । ବିଜୁ ଯୁବ ଜନତା ଦଳ ଓ ବିଜୁ ଛାତ୍ର ଜନତା ଦଳ ସ୍ପଷ୍ଟ କରିଦେଇଛି ଯେ, ଓଡ଼ିଶାବାସୀଙ୍କ ସୁରକ୍ଷା ଓ ଅଧିକାର ପ୍ରସଙ୍ଗରେ କୌଣସି ପ୍ରକାର ଅବହେଳା ସହିତ ସାଲିସ କରାଯିବ ନାହିଁ ଏବଂ ରାଜ୍ୟବାସୀଙ୍କ ହକ୍ ପାଇଁ ଆନେ୍ଦାଳନ ଆଗାମୀ ଦିନରେ ଆହୁରି ଜୋରଦାର କରାଯିବ । ବିଜେଡିର ଏହି ଘେରାଉ କାର୍ଯ୍ୟକ୍ରମରେ ଏସ୍.କେ.ଅମୀର ଅହମଦ, ସୋଫିଆ ଆଲାମ, ଶୁଭ୍ରଜିତ ପାଢ଼ୀ, ଦୀପକ ଜେନା, ସ୍ମୃତି ପଟ୍ଟନାୟକ, ସତ୍ୟଜିତ ପଟ୍ଟନାୟକ, ଆଶିଷ ସାହୁ, ମନୋଜ ସେନାପତି, ଅରୂପ ଶ୍ରୀଚନ୍ଦନ, ରକି ଦାସ, ସମିମ ଅଖତାର, ତାବି୍ରଜ୍ ଖାନ୍, ଦିବ୍ୟସିଂହ ସେଠୀ, ଶୁଭମ ଶୁଭଦର୍ଶୀ ଖଟୁଆ, ଅମ୍ୱିକା ପ୍ରସାଦ ଦାସ, ସଂଜିତ ମହାନ୍ତି, ସୌମ୍ୟରଞ୍ଜନ ତ୍ରିପାଠୀ, ବିଜୟୀ କେତନ ସାହୁ, ଅଭିନାଶ ଠାକୁର, ଅବିନାଶ ପ୍ରଧାନ, ସ୍ୱାଗତିକା ମହାନ୍ତି, ସୁଚିସ୍ମିତା ବେହେରା, ସୌମ୍ୟସାର୍ଥକ ରାୟ, ମନୋଜ ମହାନ୍ତି, ସୁଦୀପ୍ତ କେଶରୀ ସାମଲ, ଜଗମୋହନ ବଳିୟାରସିଂ, ଶ୍ରୀ ଚନ୍ଦନ ପାତ୍ର, ଜ୍ଞାନ ରଞ୍ଜନ ମାନସିଂ, ଦୀପକ ବେହେରା, ବିଶ୍ୱ ରଞ୍ଜନ ଭୂୟାଁ, ପ୍ରଦୀପ୍ତ ବିଶ୍ୱାଳ, ଚିନ୍ମୟ ପଣ୍ଡା, ବିସ୍ମୟ ଷ୍ଟାଲିନ୍, ମହମ୍ମଦ ସାହିଦୁଲ୍ଲା, ଏସ୍କେ ନୱାଜ୍, ପ୍ରକିତ ଦାସ, ସୌମ୍ୟ ଶ୍ରୀସିଂହ, ଏସ୍କେ ରିହାନ, ଲକ୍ଷ୍ମୀଧର ସାହୁ, ଆଲୋକ, ସହିଦ ଗୁର୍ଫାନ୍, ଜୟଦେବ ପଣ୍ଡା, ସିପୁଲ ସ୍ୱାଇଁ ଓ ଫତିମା ଖତୁନ ପ୍ରମୁଖ ରହିଥିଲେ ।

The post ବିଜୁ ଯୁବ ଓ ଛାତ୍ର ଜନତା ଦଳ ପକ୍ଷରୁ ମୁଖ୍ୟମନ୍ତ୍ରୀଙ୍କ ବାସଭବନ ଘେରାଉ appeared first on ONA KHABAR.

ଭୁବନେଶ୍ୱର:  ବିଜୁ ପଟ୍ଟନାୟକ ବୈଷୟିକ ବିଶ୍ୱବିଦ୍ୟାଳୟ (ବିପିୟୁଟି) ପକ୍ଷରୁ ଆୟୋଜିତ ଏବଂ ଶିକ୍ଷା ଓ ଅନୁସନ୍ଧାନ (ସୋଆ) ଡିମ୍‌ଡ ଟୁ ବି ବିଶ୍ୱବିଦ୍ୟାଳୟ ଠାରେ ଶୁକ୍ରବାର ଅନୁଷ୍ଠିତ ଏକ ଦିନିକିଆ ସମ୍ମିଳନୀରେ ଓଡ଼ିଶାର ୩୭ଟି ବିଭିନ୍ନ ବିଶ୍ୱବିଦ୍ୟାଳୟ ଏବଂ ଅନୁଷ୍ଠାନର କୁଳପତି, ପ୍ରଶାସକ ଏବଂ ଶିକ୍ଷାବିତ୍‌ମାନେ ଯୋଗ ଦେଇ ଉଚ୍ଚ ଶିକ୍ଷାର ବିକାଶ ଏବଂ ବିଶ୍ୱ ସ୍ତରରେ ଅନୁଷ୍ଠାନଗୁଡ଼ିକୁ ପ୍ରତିଷ୍ଠିତ କରିବାର ବିଭିନ୍ନ ଦିଗ ନେଇ ଆଲୋଚନା ଓ ବିଚାରବିମର୍ଷ କରିଛନ୍ତି । ଟାଇମ୍ସ ହାୟର ଏଜୁକେସନ୍ (ଟିଏଚ୍‌ଇ) ଓଡ଼ିଶା ରିଜିଓନାଲ୍ କନ୍‌କ୍ଲେଭରେ ବକ୍ତାମାନେ ବିଶ୍ୱ ସ୍ତରରେ ଓଡ଼ିଶାର ଶିକ୍ଷା ଓ ଗବେଷଣା କ୍ଷେତ୍ରକୁ କିଭଳି ଅଧିକ ବିକଶିତ କରାଯାଇ ପାରିବ ସେ ନେଇ ବକ୍ତବ୍ୟ ରଖିଥିଲେ । ଏହି ସମ୍ମିଳନୀରେ ବିପିୟୂୁଟିର କୁଳପତି ପ୍ରଫେସର ଅମୀୟ କୁମାର ରଥ ଯୋଗ ଦେଇ ନିଜ ବକ୍ତବ୍ୟରେ ଶିକ୍ଷାର ଗୁଣବତା ଉପରେ ଅଧିକ ଗୁରୁତ୍ୱ ଦେବାର ଆବଶ୍ୟକତା ରହିଛି ବୋଲି କହିଥିଲେ । ବିଶ୍ୱର ପ୍ରତିଷ୍ଠିତ ଶିକ୍ଷାନୁଷ୍ଠାନ ଗୁଡ଼ିକ ସମ୍ପର୍କରେ ଅଧିକ ତଥ୍ୟ ହାସଲ କରିବା ନିମନ୍ତେ ଏହି କାର୍ଯ୍ୟକ୍ରମରେ ବିଭିନ୍ନ ବିଶ୍ୱବିଦ୍ୟାଳୟର ପ୍ରତିନିଧିମାନଙ୍କୁ ନିମନ୍ତ୍ରଣ କରାଯାଇଥିବା ସେ କହିଥିଲେ । କାର୍ଯ୍ୟକ୍ରମରେ ସୋଆର କୁଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦ ଏବଂ ଓଡ଼ିଶା ୟୁନିଭର୍ସଟି ଅଫ ଟେକ୍ନୋଲଜି ଆଣ୍ଡ ରିସର୍ଚ୍ଚ (ଓୟୁଟିଆର)ର କୁଳପତି ପ୍ରଫେସର ବିଭୁତି ଭୂଷଣ ବିଶ୍ୱାଳ ଉପସ୍ଥିତ ଥାଇ ନିଜର ବକ୍ତବ୍ୟ ରଖିଥିଲେ । ପ୍ରଫେସର ନନ୍ଦ କହିଥିଲେ ଯେ ଅତ୍ୟାଧୁନିକ ବୈଷୟିକ ଜ୍ଞାନକୌଶଳର ଆବିର୍ଭାବ ବିଶ୍ୱବିଦ୍ୟାଳୟର ଶିକ୍ଷା କ୍ଷେତ୍ରରେ ଏକ ପରିବର୍ତନ ଆଣିଛି । ଏଥି ନିମନ୍ତେ ଅନେକ ଆହ୍ୱାନର ସମ୍ମୁଖୀନ ହେବାକୁ ପଡ଼ୁଛି । ବିଶ୍ୱବିଦ୍ୟାଳୟ ଗୁଡ଼ିକ ଏକକ ଅନୁଷ୍ଠାନ ନୁହନ୍ତି ମାତ୍ର ସମାଜ ସହ ଯୋଡ଼ି ହୋଇ ରହିବା ଆବଶ୍ୟକ ବୋଲି ପ୍ରଫେସର ନନ୍ଦ କହିଥିଲେ ।

ପ୍ରଫେସର ବିଶ୍ୱାଳ କହିଥିଲେ ଯେ ଟିଏଚ୍‌ଇ ଏବଂ କ୍ୟୁଏସ୍ ଭଳି ର‌୍ୟାଙ୍କିଙ୍ଗ ପ୍ରକ୍ରିୟା ଭାରତର ଶିକ୍ଷାନୁଷ୍ଠାନ ଗୁଡ଼ିକୁ ବିଶ୍ୱ ସ୍ତରରେ ଚିହ୍ନିତ ହେବା ପାଇଁ ସହାୟକ ହେଉଛି । ଟିଏଚ୍‌ଇର ଜେନେରାଲ ମ୍ୟାନେଜର ଏବଂ ସିନିୟର ରିଜିଓନାଲ୍ ଡାଇରେକ୍ଟର (ଏସିଆ) ଶ୍ରୀ ରିତିନ୍ ମାଲହୋତ୍ରା ଶିକ୍ଷା କ୍ଷେତ୍ରରେ ଉତ୍କର୍ଷତା ଏବଂ ଗବେଷଣା ମାପଦଣ୍ଡର ବିଶ୍ୱସ୍ତରୀୟ ପରିସ୍ଥିତି ସମ୍ପର୍କରେ ବକ୍ତବ୍ୟ ରଖିଥିଲେ । କାର୍ଯ୍ୟକ୍ରମରେ ସୋଆର ଛାତ୍ର ମଙ୍ଗଳ ଡିନ୍ ପ୍ରଫେସର ଜ୍ୟୋତି ରଞ୍ଜନ ଦାସ ଧନ୍ୟବାଦ ଅର୍ପଣ କରିଥିଲେ । ସମ୍ମିଳନୀରେ ଦୁଇଟି ପର୍ଯ୍ୟାୟରେ ଆଲୋଚନା ଏବଂ ଗୋଟିଏ ସାମୁହିକ ଆଲୋଚନା ରଖାଯାଇଥିବା ବେଳେ ଗୁଣବତା ଭିତିକ ଶିକ୍ଷା, ବୈଷୟିକ ଏବଂ ଗବେଷଣା କ୍ଷେତ୍ରରେ ବିଶ୍ୱର ଶ୍ରେଷ୍ଠ ବିଶ୍ୱବିଦ୍ୟାଳୟ ଗୁଡ଼ିକ ସହିତ କିଭଳି ଆନ୍ତର୍ଜାତିକ ସହଭାଗିତା ଏବଂ ଭାଗିଦାରୀ କରାଯାଇ ପାରିବ ସେ ନେଇ ଆଲୋଚନା କରାଯାଇଥିଲା । ଏହି ସମ୍ମିଳନୀରେ ଓଡ଼ିଆ ବିଶ୍ୱବିଦ୍ୟାଳୟର କୁଳପତି ପ୍ରଫେସର ସତ୍ୟନାରାୟଣ ଆଚାର୍ଯ୍ୟ, କେନ୍ଦ୍ରୀୟ ବିଶ୍ୱବିଦ୍ୟାଳୟ ଝାଡ଼ଖଣ୍ଡର ପୂର୍ବତନ କୁଳପତି ପ୍ରଫେସର କେ.ବି ଦାସ ଏବଂ ଇନ୍ଦିରା ଗାନ୍ଧି ଇନ୍‌ଷ୍ଟିଚ୍ୟୁଟ୍ ଅଫ୍ ଟେକ୍ନୋଲଜି (ଆଇଜିଆଇଟି), ସାରଙ୍ଗର ନିର୍ଦ୍ଦେଶକ ପ୍ରଫେସର ବିଭୁ ପ୍ରସାଦ ପାଣିଗ୍ରାହୀ ଯୋଗ ଦେଇଥିଲେ ।

The post ସୋଆ ପକ୍ଷରୁ ଦିନିକିଆ ଟିଏଚ୍‌ଇ ଓଡ଼ିଶା ରିଜିଓନାଲ୍ କନ୍‌କ୍ଲେଭ୍ ଆୟୋଜିତ appeared first on ONA KHABAR.

ଭୁବନେଶ୍ୱର : ଖୋର୍ଦ୍ଧା ଜିଲ୍ଲା ବାଲିଅନ୍ତାରେ ଜଣେ ପୁଲିସ କର୍ମୀଙ୍କୁ ପୋଲିସ ଆଖି ଆଗରେ ଭିଡ ପିଟିିପିଟି ମାରି ଦେବାକୁ ନେଇ ସାରା ରାଜ୍ୟରେ ଚହଳ ସୃଷ୍ଟି ହୋଇଛି। ଏହି ବିଷୟକୁ ନେଇ କଂଗ୍ରେସ ଭବନରେ ଏକ ସାମ୍ବାଦିକ ସମ୍ମିଳନୀରେ ଅନୁଷ୍ଠିତ ହୋଇଥିଲା। ଏହି ସାମ୍ବାଦିକ ସମ୍ମିଳନୀରେ ଯୋଗଦେଇ ପିସିସି ମୁଖପାତ୍ର ସୋନାଲୀ ସାହୁ ସରକାରଙ୍କୁ କଟୁ ଭାଷାରେ ସମାଲୋଚନା କରି କହିଛନ୍ତି ଯେ ଓଡିଶାରେ ତାଲିବାନୀ ଶାସନ ଚାଲୁଛି ପ୍ରତ୍ଯେକ ଦିନ ରାଜ୍ଯରେ ଦୁଷ୍କର୍ମ, ଗଣ ଦୁଷ୍କର୍ମ, ହତ୍ଯା ଓ ଡକାୟତି ବୃଦ୍ଧିପାଇ ପରିସ୍ଥିତି ଅସମ୍ଭାଳ ହେଲାଣି କିନ୍ତୁ ବିଜେପି ନେତା ମନ୍ତ୍ରୀ ବିଧାୟକ ଓ ସାଂସଦ ଝାଲମୁଢୀ ଖାଉଛନ୍ତି। କିଛି ଦିନ ତଳେ ପୁରୀର କଣାସରେ ଜଣେ ଯୁବକଙ୍କୁ ଗୋଡେଇ ଗୋଡେଇ ଦିନ ଦ୍ବିପ୍ରହରରେ ହତ୍ଯା ଉଦ୍ଯମ କରାଗଲା। ପୁଣି ହିଞ୍ଜିଳିକାଟୁ ଥାନା ଅନ୍ତର୍ଗତ ଅଗସ୍ତି ନୂଆଗାଁର ତିନି ବର୍ଷ ଶୁଶୁ ର ମା ସ୍ବାମୀ ନିର୍ଯ୍ୟାତିତ ପୂଜା ସ୍ବାଇଁଙ୍କୁ ତାଙ୍କ ସ୍ବାମୀ ତାଙ୍କୁ ଘରୁ ତଡି ଦେଇଥିବା ବେଳେ ତାଙ୍କ ସ୍ବାମୀ କେଖରିଡା ଗାଁର ଜିଣ୍ଟୁ ଗୌଡ ଙ୍କ ଘରଆଗରେ ଧାରଣାରେ ବସିଥିଲେ ଏଥିରେ ଜିଣ୍ଟୁ ଗୌଡ ଙ୍କ ସାନଭାଇ ଉତ୍ଯକ୍ତ ହୋଇ ତିନି ବର୍ଷର ଶିଶୁ ଆଗରେ ମାକୁ ଅତି ନିର୍ମମ ଭାବରେ ଟାଙ୍ଗଆରେ ହାଣି ହତ୍ଯା କଲା। ଠିକ୍ ସେଭଳି ପୁଣି ଏକ ହୃଦୟ ବିଦାରକ ଘଟଣା ଘଟିଛି ବାଲିଅନ୍ତା ଥାନା ଅଞ୍ଚଳରେ। ବେଣୁପୁର ଅଞ୍ଚଳରେ ଓଲଟପୁର ଥାନା ଅନ୍ତର୍ଗତ ମୌରାପୁରର ସୌମ୍ୟରଞ୍ଜନ ସ୍ବାଇଁଙ୍କୁ ଦୁଇଜଣ ଯୁବତୀ ଙ୍କୁ ଅସଦାଚରଣ କରିବାକୁ ନେଇ ଉପସ୍ଥିତ ଭିଡ ସୌମ୍ୟଙ୍କୁ ହାତଗୋଡ ବାନ୍ଧି ପିଟିପିଟି ମାରିଦେଲେ। ଏଭଳି ଗୋଟିଏ ପରେ ଗୋଟିଏ ମର୍ମନ୍ତୁତ ଘଟଣା ଘଟିଚାଲିଥିଲେ ମଧ୍ୟ ସରକାର ପ୍ରତିକ୍ରିୟାହିନ ହୋଇ ବସିରହିଛନ୍ତି। ଖୋଦ୍ ମୁଖ୍ଯମନ୍ତ୍ରୀଙ୍କ ହାତରେ ଗୃହ ବିଭାଗ ରହିଛି ଓ ପୂର୍ବତନ ପୋଲିସ ଡିଜି ପ୍ରକାଶ ମିଶ୍ର ବିଭାଗୀୟ ପରାମର୍ଶଦାତା କହିଛନ୍ତି। ତଥାପି ଆଇନ ଶୃଙ୍ଖଳା ପରିସ୍ଥିତି ଅବନତିର କାରଣ କଣ ।

କାରଣ ହେଉଛି ସରକାର ଦିଲ୍ଲୀ ରୁ ଚାଲିଛି। ପ୍ରଥମ କଥା ହେଲା ରାଜ୍ଯରେ ମହିଳା ଅସୁରକ୍ଷିତ ମହିଳାଙ୍କୁ ସୁରକ୍ଷା ଦେବାରେ ପୋଲିସ ସଂପୂର୍ଣ୍ଣ ବିଫଳ। ଯେତେବେଳେ ଦୁଇଜଣ ଯୁବକ ଏହି ଦୁଇଜଣ ଯୁବତୀଙ୍କୁ ଅସଦାଚରଣ କଲେ ସେତେବେଳେ ଯୁବତୀଙ୍କ ଭିତରୁ ଜଣେ ୧୧୨ ପୁଲିସ ହେଲ୍ପଲାଇନକୁ କଲ କରିଥିଲେ। କିନ୍ତୁ ପୋଲିସ ଘଟଣାସ୍ଥଳରେ ନପହଞ୍ଚିବାରୁ ଯୁବତୀ ମାନେ ଗାଁ ଲୋକଙ୍କୁ ଫୋନକଲ କରି ଡାକିଥିଲେ। ଗାଁଲୋକେ ପହଞ୍ଚି ସେମାନେ ମଧ୍ୟ ୧୧୨ କୁ କଲ କରିଥିଲେ ତଥାପି ମଧ୍ୟ ପୋଲିସ ନ ଆସିବାରୁ ଜମାହୋଇଥିବା ଉତ୍ଯକ୍ତ ଭିଡ ସଂଘବଦ୍ଧ ଭାବରେ ମାଡମାରିଲେ ଯେତେବେଳେ ଘଟଣା ଉଗ୍ରରୂପ ଧାରଣ କଲା ପୋଲିସ ଆସି ପହଞ୍ଚିଲା ତେବେ ପ୍ରଶ୍ନ ଉଠୁଛି ଏତେ ସମୟ ଧରି ପୋଲିସ କରୁଥିଲା କଣ । ଯଦି ଘଟଣା ଘଟି ସାରିଲା ପରେ ତେବେ ପୋଲିସ ପ୍ଲାଟୁନ ସହିତ କାହିଁକି ଆସିଲାନାହିଁ। ପ୍ରଶ୍ନ ଉଠୁଛି ଇଆରଏସଏସ ବା ଏମରଜେନ୍ସି ରେସପନ୍ସ ସର୍ପୋଟ ସିଷ୍ଟମ କଣ୍ଟ୍ରୋଲରୁମ କାହା କଣ୍ଟ୍ରୋଲ ରେ ଅଛି। ଦିଲ୍ଲୀ, ବିହାର ନା ୟୁପି ? କେତେଥର ୧୧୨ କୁ କଲ କରାଯାଇଛି ତାର ଯାଞ୍ଚହେଉ । ପୋଲିସ କଣ ନେତା ମନ୍ତ୍ରୀ ବିଧାୟକ ସାଂସଦଙ୍କୁ କେବଳ ସୁରକ୍ଷା ଦେବାକୁ ନିଯୁକ୍ତ କରାଯାଇଛି କି ? ପୋଲିସ ର ଅବହେଳା ପାଇଁ ଗୋଟିଏ ପରେ ଗୋଟିଏ ଜୀବନ ଦୀପ ଲିଭିଯାଉଛି। ରାଜ୍ଯରେ ଆଇନ ଶୃଙ୍ଖଳା ବୋଲି ଆଉ କିଛି ନାହିଁ ରାଜ୍ଯସରକାର ସାଧାରଣ ଜନତାଙ୍କ ସୁରକ୍ଷାକୁ ସଂପୂର୍ଣ୍ଣ ଜଳାଞ୍ଜଳି ଦେଇସାରିଲେଣି ବୋଲି ଶ୍ରୀମତି ସାହୁ ନିଜ ବକ୍ତବ୍ଯରେ ପ୍ରକାଶ କରିଛନ୍ତି। ଏହି ସାମ୍ବାଦିକ ସମ୍ମିଳନୀରେ ବରିଷ୍ଠ ମୁଖପାତ୍ର ମନୋରଞ୍ଜନ ଦାସ ମଧ୍ୟ ଉପସ୍ଥିତ ରହିଥିଲେ ।

The post ରାଜ୍ୟର ଆଇନ ଶୃଙ୍ଖଳା ପରିସ୍ଥିତି ଅସମ୍ଭାଳ, ଏପଟେ ନେତା ମନ୍ତ୍ରୀ ଝାଲମୁଢି ଖାଇବାରେ ବ୍ୟସ୍ତ appeared first on ONA KHABAR.

ଭୁବନେଶ୍ୱର: ଗ୍ରାମୀଣ ବିଦ୍ୟୁତକରଣ ବ୍ୟବସ୍ଥାକୁ ସଦୃଢ଼ କରିବା ଦିଗରେ ଏକ ପ୍ରମୁଖ ପଦକ୍ଷେପ ସ୍ୱରୂପ, ନର୍ଦର୍ଣ୍ଣ ଓଡ଼ିଶା ଡିଷ୍ଟ୍ରିବ୍ୟୁସନ ଲିମିଟେଡ୍ (TPNODL) ପକ୍ଷରୁ ମୟୂରଭଞ୍ଜ ଜିଲ୍ଲାର ଦେଉଳି ଠାରେ ଏକ ନୂତନ ୩୩/୧୧ କେଭି ୧୦ ଏମଭିଏ (MVA) ପ୍ରାଥମିକ ସବଷ୍ଟେସନ କାର୍ଯ୍ୟକ୍ଷମ କରାଯାଇଛି। ମାନ୍ୟବର ଉପମୁଖ୍ୟମନ୍ତ୍ରୀ ତଥା ଶକ୍ତି ମନ୍ତ୍ରୀ ଶ୍ରୀ କନକ ବର୍ଦ୍ଧନ ସିଂହଦେଓ ଆଭାସି ମାଧ୍ୟମରେ ଏହି ସବଷ୍ଟେସନର ଉଦଘାଟନ କରିଛନ୍ତି, ଯାହା ଅଞ୍ଚଳର ଭିତ୍ତିଭୂମି ବିକାଶ କ୍ଷେତ୍ରରେ ଏକ ମାଇଲଖୁଣ୍ଟ ସାବ୍ୟସ୍ତ ହୋଇଛି। ଏହି ନୂତନ ସବଷ୍ଟେସନ ଦ୍ୱାରା ୬ଟି ପଞ୍ଚାୟତ ଯଥା ଚୁହାଟା, କାନିମହୁଲି, ନୂଆଗାଁ, ଝାଲିଆମରା, ଆଳକୁଦା ଏବଂ ଦେଉଳିର ୧୫,୦୦୦ରୁ ଅଧିକ ପରିବାର ଉପକୃତ ହେବେ। ସ୍ଥାନୀୟ ବାସିନ୍ଦା ଭୋଲଟେଜ୍ ଗୁଣବତ୍ତାରେ ଉନ୍ନତି, ଘରୋଇ ଏବଂ କୃଷି କାର୍ଯ୍ୟ ପାଇଁ ସ୍ଥିର ବିଦ୍ୟୁତ ସେବା, ବାରମ୍ବାର ବିଦ୍ୟୁତ କାଟ୍ ସମସ୍ୟାରୁ ମୁକ୍ତି ପାଇବେ ।

ଉଦଘାଟନୀ ଅବସରରେ ଉପମୁଖ୍ୟମନ୍ତ୍ରୀ ଶ୍ରୀ ସିଂହଦେଓ କହିଛନ୍ତି ଯେ, ଏହି ସବଷ୍ଟେସନ କେବଳ ବିଦ୍ୟୁତ ବ୍ୟବସ୍ଥାକୁ ସଦୃଢ଼ କରିବ ନାହିଁ, ବରଂ ପରିବାରଗୁଡ଼ିକୁ ସ୍ଥାୟୀ ଶକ୍ତି ସମାଧାନ ଆପଣେଇବାରେ ସାହାଯ୍ୟ କରିବ। ମୁଁ ଉପଭୋକ୍ତାମାନଙ୍କୁ ପିଏମ୍ ସୂର୍ଯ୍ୟଘର ମାଗଣା ବିଜୁଳି ଯୋଜନାର ସୁଯୋଗ ନେଇ ବିଦ୍ୟୁତ ଖର୍ଚ୍ଚ କମାଇବା ସହ ସ୍ୱଚ୍ଛ ଶକ୍ତିକୁ ପ୍ରୋତ୍ସାହିତ କରିବାକୁ ଅନୁରୋଧ କରୁଛି। ଗୃହ ଓ ନଗର ଉନ୍ନୟନ ମନ୍ତ୍ରୀ ଡଃ କୃଷ୍ଣ ଚନ୍ଦ୍ର ମହାପାତ୍ର କହିଛନ୍ତି ଯେ, ନିରନ୍ତର ବିଦ୍ୟୁତ ସେବା ଗ୍ରାମୀଣ ବିକାଶର ମେରୁଦଣ୍ଡ ଏବଂ ଏହା ମୟୂରଭଞ୍ଜର ଲୋକମାନଙ୍କ ଜୀବନଶୈଳୀରେ ସକାରାତ୍ମକ ପରିବର୍ତ୍ତନ ଆଣିବ। TPNODL ର ସିଇଓ ଶ୍ରୀ ଗଜାନନ କାଲେ କହିଛନ୍ତି ଯେ ଦେଉଳି ପ୍ରକଳ୍ପ ଅଞ୍ଚଳର ବର୍ଦ୍ଧିତ ଶକ୍ତି ଚାହିଦା ପୂରଣ କରିବା ଦିଗରେ ଏକ ରଣନୀତିକ ପଦକ୍ଷେପ। ଏହି ପ୍ରକଳ୍ପଟି TPNODL ର ବରିଷ୍ଠ ଅଧିକାରୀ, ଯଥା ଚିଫ୍ ପ୍ରୋଜେକ୍ଟ ଶ୍ରୀ ପ୍ରଦୀପ କୁମାର ମହାନ୍ତି ଏବଂ ଅଧୀକ୍ଷଣ ଯନ୍ତ୍ରୀ ଶ୍ରୀ ଦେବଦତ୍ତ ପଣ୍ଡାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ସମ୍ପନ୍ନ ହୋଇଛି।

The post ଆଭାସି ମାଧ୍ୟମରେ ମୟୂରଭଞ୍ଜର ନୂତନ TPNODL ସବଷ୍ଟେସନ ଉଦଘାଟନ କଲେ ଉପମୁଖ୍ୟମନ୍ତ୍ରୀ appeared first on ONA KHABAR.

ଭୁବନେଶ୍ୱର:  ରାଜ୍ୟରେ ମହିଳା ଓ ଶିଶୁ ବିକାଶ ଧାରାକୁ ଅଧିକ ବ୍ୟାପକ କରିବା ପାଇଁ ଏକ ବଡ଼ ପଦକ୍ଷେପ ସ୍ୱରୂପ ମାନ୍ୟବର ଉପମୁଖ୍ୟମନ୍ତ୍ରୀ ଶ୍ରୀମତୀ ପ୍ରଭାତୀ ପରିଡ଼ା ରାଜ୍ୟର ସମସ୍ତ ନିର୍ବାଚନମଣ୍ଡଳୀର ବିଧାୟକମାନଙ୍କୁ ପତ୍ର ଲେଖିଛନ୍ତି। ମହିଳା ଓ ଶିଶୁ ବିକାଶ ମନ୍ତ୍ରୀ ଭାବରେ ସେ ନିର୍ବାଚନମଣ୍ଡଳୀଗୁଡ଼ିକରେ ଅଙ୍ଗନୱାଡ଼ି କେନ୍ଦ୍ରର ଗୃହ ନିର୍ମାଣ ଓ ଏହାର ବିକାଶ ପ୍ରକ୍ରିୟାରେ ସକ୍ରିୟ ସହଯୋଗ କରିବାକୁ ସମସ୍ତ ଜନପ୍ରତିନିଧିଙ୍କୁ ଆହ୍ୱାନ କରିଛନ୍ତି। ବିଶେଷ କରି ନିଜ ନିଜର ନିର୍ବାଚନମଣ୍ଡଳୀରେ ଚାଲୁଥିବା କାର୍ଯ୍ୟରେ ମହିଳାମାନଙ୍କ ଭାଗିଦାରୀ ସୁନିଶ୍ଚିତ କରିବା ଉପରେ ସେ ଏହି ଚିଠିରେ ଗୁରୁତ୍ୱାରୋପ କରିଛନ୍ତି। ଶ୍ରୀମତୀ ପରିଡ଼ା ତାଙ୍କ ପତ୍ରରେ ଉଲ୍ଲେଖ କରିଛନ୍ତି ଯେ, ଅଙ୍ଗନୱାଡ଼ି କେନ୍ଦ୍ରଗୁଡ଼ିକର ବିକାଶ ଓ ନିର୍ମାଣ କାର୍ଯ୍ୟ ଯେପରି ସମୟାନୁବର୍ତ୍ତୀ ଏବଂ ଗୁଣାତ୍ମକ ଭାବେ ସମାପ୍ତ ହୁଏ, ସେଥିପାଇଁ ବିଧାୟକମାନେ ନିଜ ନିଜ ସ୍ତରରେ ତଦାରଖ କରିବା ଆବଶ୍ୟକ। ସୂଚନାଯୋଗ୍ୟଯେ, ଆର୍ଥିକ ବର୍ଷ ୨୦୨୪-୨୫ ଏବଂ ୨୦୨୫-୨୬ ମଧ୍ୟରେ ଅଙ୍ଗନବାଡ଼ି କେନ୍ଦ୍ର (AWC) ଭିତ୍ତିଭୂମି ସୁଦୃଢ଼ୀକରଣ ପଦକ୍ଷେପ ଅଧୀନରେ ସମୁଦାୟ ୩,୨୯୩ଟି ନୂତନ ଅଙ୍ଗନବାଡ଼ି ଗୃହ ଉଦ୍‌ଘାଟିତ ହୋଇ ହସ୍ତାନ୍ତର ହୋଇଥିବା ବେଳେ ICDS ଯୋଜନା ଅଧୀନରେ ଓଡ଼ିଶାର ୧୨,୧୪୦ଟି ଅଙ୍ଗନବାଡ଼ି କେନ୍ଦ୍ରକୁ ସକ୍ଷମ ଅଙ୍ଗନବାଡ଼ିରେ ରୂପାନ୍ତରିତ କରାଯାଇଛି।

The post ଅଙ୍ଗନୱାଡ଼ି କେନ୍ଦ୍ରର ବିକାଶ ପାଇଁ ରାଜ୍ୟର ସମସ୍ତ ବିଧାୟକଙ୍କୁ ଚିଠି ଲେଖିଲେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା appeared first on ONA KHABAR.

ଭୁବନେଶ୍ଵର: ଆଜି ଭୁବନେଶ୍ୱରସ୍ଥିତ ପୋଲିସ ସେବା ଭବନଠାରେ ଓଡ଼ିଶା ପୋଲିସର ମହିଳା ଓ ଶିଶୁ ଅପରାଧ ନିରାକରଣ ଶାଖା ଏବଂ ୟୁନିସେଫର ମିଳିତ ସହଯୋଗରେ ପ୍ରୟାସରେ “ଜୁଭେଣ୍ଟିକା- କିଶୋର କିଶୋରୀମାନଙ୍କ ସହ ପୋଲିସର ସଚେତନତା ଓ ସମ୍ପର୍କ କାର୍ଯ୍ୟକ୍ରମ” ଅନୁଷ୍ଠିତ ହୋଇଛି। ଏହି ଅବସରରେ ମୁଖ୍ୟ ଅତିଥି ଭାବେ ରାଜ୍ୟ ଆରକ୍ଷୀ ମହାନିର୍ଦ୍ଦେଶକ ଶ୍ରୀ ଯୋଗେଶ ବାହାଦୁର ଖୁରାନିଆ ଯୋଗଦେଇ କାର୍ଯ୍ୟକ୍ରମର ଶୁଭାରମ୍ଭ କରିବା ସହ “JUVENTICA” ମାଧ୍ୟମରେ ଓଡ଼ିଶା ପୋଲିସ ଶିଶୁ ଓ କିଶୋର-କିଶୋରୀମାନଙ୍କ ପାଇଁ ପୋଲିସ ବ୍ୟବସ୍ଥାକୁ ଅଧିକ ସହଜ, ସୁରକ୍ଷିତ ଓ ବନ୍ଧୁତ୍ୱପୂର୍ଣ୍ଣ କରିବାକୁ ଉଦ୍ୟମ କରାଯାଉଛି ବୋଲି ମତବ୍ୟକ୍ତ କରିଥିଲେ । ରାଜ୍ୟବ୍ୟାପୀ ଏହି କାର୍ଯ୍ୟକ୍ରମରେ ପ୍ରାୟ ୫୫୫ ପୋଲିସ ଥାନାର ପ୍ରାୟ ୧୫,୦୦୦ରୁ ଅଧିକ କିଶୋର-କିଶୋରୀ ଅଂଶଗ୍ରହଣ କରିଥିଲେ। Advika Clubs ର କିଶୋର-କିଶୋରୀମାନଙ୍କ ସହ Anganwadi Workers ଓ Para Legal Volunteers ମଧ୍ୟ ଏଥିରେ ସାମିଲ ହୋଇଥିଲେ।  ବର୍ତ୍ତମାନ ସମୟରେ ବହୁ ସଂଖ୍ୟାରେ କିଶୋର-କିଶୋରୀ ସାମାଜିକ ଗଣମାଧ୍ୟମର ନକରାତ୍ମକ ବିଷୟବସ୍ତୁ ଉପଭୋଗ କରିବାରେ ସମୟ ଅତିବାହିତ କରୁଛନ୍ତି । ସବୁବେଳେ ସାମାଜିକ ଗଣମାଧ୍ୟମରୁ ଶିକ୍ଷଣୀୟ ବିଷୟବସ୍ତୁ ଗ୍ରହଣ କରି ଭବିଷ୍ୟତ ଉଜ୍ଵଳ କରିବାକୁ ସେ ପରାମର୍ଶ ଦେଇଥିଲେ । ଏହା ବ୍ୟତୀତ ବିଭିନ୍ନ ସମୟରେ ସେମାନେ ସାଇବର ଅପରାଧ ସହିତ ସାମାଜିକ ସମସ୍ୟାର ଶିକାର ହୋଇ ମାନସିକ ଚାପର ସମ୍ମୁଖୀନ ହେଉଛନ୍ତି। ଏହି ପରିସ୍ଥିତିରେ ସେମାନଙ୍କୁ ନୈତିକ ଶିକ୍ଷା ଦେବା ସହ ସେମାନଙ୍କ କଥାକୁ ଧ୍ୟାନର ସହ ଶୁଣି ସଠିକ୍ ପରାମର୍ଶ ଓ ନୈତିକ ସମର୍ଥନ ପ୍ରଦାନ କରିବା ମଧ୍ୟ ଆମ ସମସ୍ତଙ୍କ ପ୍ରମୁଖ ଦାୟିତ୍ୱ ବୋଲି ଡିଜିପି ମତବ୍ୟକ୍ତ କରିଥିଲେ।

ସେ ଆହୁରି କହିଥିଲେ ଯେ, ଏହି ପ୍ରୟାସ ଯୁବ ପିଢ଼ି ଓ ପୋଲିସ ମଧ୍ୟରେ ବିଶ୍ୱାସ ଓ ସହଯୋଗ ବଢ଼ାଇବାରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ। ସେ ସମସ୍ତ କିଶୋର-କିଶୋରୀମାନଙ୍କୁ ନିର୍ଭୟରେ ପୋଲିସ ସହ ଯୋଗାଯୋଗ କରି ନିଜ ସମସ୍ୟା ଜଣାଇବାକୁ ଅନୁରୋଧ କରିଥିଲେ। ଏହା ବ୍ୟତୀତ କିଶୋର-କିଶୋରୀମାନଙ୍କ ସହ ସୁସମ୍ପର୍କ ସ୍ଥାପନ କରି ସେମାନଙ୍କ ସୁରକ୍ଷା ଓ ମଙ୍ଗଳ ପ୍ରତି ଅଧିକ ସଚେତନ ଓ ଯତ୍ନବାନ ହେବା ପାଇଁ ସମସ୍ତ ପୋଲିସ ଅଧିକାରୀମାନଙ୍କୁ ଆହ୍ୱାନ କରିଥିଲେ। ଏହି କାର୍ଯ୍ୟକ୍ରମ ମାଧ୍ୟମରେ ରାଜ୍ୟରେ ଶିଶୁ ଓ କିଶୋର-କିଶୋରୀମାନଙ୍କ ପାଇଁ ଏକ ସୁରକ୍ଷିତ, ସକାରାତ୍ମକ ପରିବେଶ ସୃଷ୍ଟି ହେବ ବୋଲି ଆଶା ପ୍ରକାଶ କରିଥିଲେ । ଏହି ଅବସରରେ ଡିଜିପି ଆଭାଷୀ ମାଧ୍ୟମରେ ବିଭିନ୍ନ ଜିଲ୍ଲାର କିଶୋର-କିଶୋରୀମାନଙ୍କ ସହ ଭାବ ବିନିମୟ କରିଥିଲେ । ଆଜିର ଏହି କାର୍ଯ୍ୟକ୍ରମରେ ଡିଜିପି(କ୍ରାଇମବ୍ରାଞ୍ଚ) ଶ୍ରୀ ବିନୟତୋଷ ମିଶ୍ର, ଅତିରିକ୍ତ ଆରକ୍ଷୀ ମହାନିର୍ଦ୍ଦେଶକ( ଆଧୁନିକୀକରଣ) ଶ୍ରୀ ସୌମେନ୍ଦ୍ର ପ୍ରିୟଦର୍ଶୀ, ଅତିରିକ୍ତ ଆରକ୍ଷୀ ମହାନିର୍ଦ୍ଦେଶକ( ରେଳବାଇ ଓ ଉପକୂଳ ସୁରକ୍ଷା) ଶ୍ରୀ ଅରୁଣ କୁମାର ବୋଥ୍ରା, ଅତିରିକ୍ତ ଆରକ୍ଷୀ ମହାନିର୍ଦ୍ଦେଶକ( ମହିଳା ଓ ଶିଶୁ ଅପରାଧ ନିରାକରଣ ଶାଖା) ଶ୍ରୀମତୀ ଏସ. ସାଇନିଙ୍କ ସମେତ ବରିଷ୍ଠ ପୋଲିସ ଅଧିକାରୀ ଉପସ୍ଥିତ ଥିଲେ ।

The post ୫୫୫ ପୋଲିସ ଥାନାରେ ଅଂଶଗ୍ରହଣ କଲେ ୧୫,୦୦୦ରୁ ଅଧିକ କିଶୋର-କିଶୋରୀ appeared first on ONA KHABAR.

ବଲାଙ୍ଗୀର: ବଲାଙ୍ଗୀର ଜିଲ୍ଲା ତୁରେକେଲା ବ୍ଲକ ଅନ୍ତର୍ଗତ ଧମାନଡଙ୍ଗା ପଞ୍ଚାୟତର କନ୍ଧବାହାଲ ଗାଁରେ କିଡନୀ ରୋଗ ଆତଙ୍କ। ଅନେକ ବର୍ଷ ହେଲା କିଡନୀ ରୋଗରେ ଲୋକ ଆକ୍ରାନ୍ତ ହୋଇ ରହିଥିବା ବେଳେ ବର୍ଷକ ଭିତରେ ୨୫ ରୁ ଅଧିକ ମୃତ୍ୟୁ ହୋଇଥିବା ଆଶ୍ଚର୍ଯ୍ୟ କରିଛି ।  ଶୁଦ୍ଧ ପିଇବା ପାଣି ମୁନ୍ଦାଏ ପାଇଁ ଲୋକେ ହନ୍ତସନ୍ତ ହେଉଥିବା ବେଳେ, ସ୍ୱାସ୍ଥ୍ୟ ବିଭାଗର ନିଘା ନଥିବା ଅଭିଯୋଗ ହୋଇଛି।ବଲାଙ୍ଗୀର ଜିଲ୍ଲା ତୁରେକେଲା ବ୍ଲକ ଧମାନଡ଼ଙ୍ଗା ପଞ୍ଚାୟତ କନ୍ଧବାହାଲ ଗାଁରେ କାୟା ମେଲାଉଛି କିଡନି ରୋଗ। ବର୍ଷକ ଭିତରେ ୨୫ରୁ ଅଧିକ ଜଣଙ୍କ କିଡନିରେ ମୃତ୍ୟୁ ହୋଇସାରିଥିବା ବେଳେ ଏବେବି ୫୦ରୁ ଅଧିକ ଆକ୍ରାନ୍ତ ଥିବା ଅଭିଯୋଗ ହୋଇଛି। ଗାଁର ପରାଭୁଏ ପଡା, ସ୍କୁଲ ପଡା ଓ ବସ୍ତି ଅଞ୍ଚଳରେ ସ୍ଥିତି ସଙ୍ଗୀନ। ଘରେ ଘରେ ଦେଖିବାକୁ ମିଳୁଛନ୍ତି କିଡ୍‌ନି ରୋଗୀ। ଗାଁରେ ସ୍ୱଚ୍ଛ ପିଇବା ପାଣିର ଅଭାବ ହିଁ ମାରାତ୍ମକ ରୋଗର କାରଣ ସାଜିଥିବା ଅଭିଯୋଗ ହୋଇଛି ।

The post ବଲାଙ୍ଗୀର କନ୍ଧବାହାଲରେ କିଡ୍‌ନି ରୋଗ ଆତଙ୍କ appeared first on ONA KHABAR.