ହିନ୍ଦୀ ଗୀତ ଦେଲା ପରିଚୟ, ସୋସିଆଲ ମିଡିଆ ଷ୍ଟାର କିଲି ପଲ୍‌ଙ୍କୁ ସମ୍ମାନିତ କଲା ଭାରତ

ନୂଆଦିଲ୍ଲୀ : ବଲିଉଡ୍‌ର ଲୋକପ୍ରିୟ ହିନ୍ଦୀ ଗୀତକୁ ଲିପ୍‌ସିଂକ୍ କରି ଭିଡିଓ କରୁଥିବା ତାଞ୍ଜାନିଆର ସୋସିଆଲ ମିଡିଆ ଷ୍ଟାର କିଲି ପଲ୍‌ଙ୍କୁ ସମ୍ମାନିତ କରିଛି ଭାରତ । ତାଞ୍ଜାନିଆ ସ୍ଥିତ ଭାରତୀୟ ଉଚ୍ଚ ଆୟୋଗ ପଲ୍‌ଙ୍କୁ ନିମନ୍ତ୍ରଣ କରି ସମ୍ମାନିତ କରିଛନ୍ତି । କିଲି ପଲ୍ ଭାରତୀୟ ଗୀତର ଲିପ୍ ସିଂକ୍ କରି ସାରା ବିଶ୍ୱରେ ଲୋକପ୍ରିୟ ହୋଇଛନ୍ତି । ସୋସିଆଲ ମିଡିଆରେ ତାଙ୍କର ଲକ୍ଷାଧିକ ଫ୍ୟାନ୍ ଫଲୋୟର୍ସ ଅଛନ୍ତି । କେବଳ ଏତିକି ନୁହେଁ, ସୋସିଆଲ ମିଡିଆରେ ଅନେକ ବଲିଉଡ୍ ଷ୍ଟାର ମଧ୍ୟ ତାଙ୍କୁ ଫଲୋ କରୁଛନ୍ତି । ତାଞ୍ଜାନିଆରେ ଭାରତୀୟ ଉଚ୍ଚାୟୁକ୍ତ ବିନୟ ପ୍ରଧାନ କିଲି ପଲ୍‌ଙ୍କୁ ସମ୍ମାନିତ କରିଛନ୍ତି । ଏହି ଫଟୋକୁ ସେ ନିଜ ଟ୍ୱିଟର ପେଜ୍‌ରେ ସେୟାର କରିଛନ୍ତି । ଫଟୋରେ ବିନୟା ପ୍ରଧାନ ଭାରତର ଦୂତାବାସ କାର୍ଯ୍ୟାଳୟରେ ପଲଙ୍କୁ ସମ୍ମାନିତ କରୁଥିବାର ଦେଖାଯାଇଛି । ଏହି ପୋଷ୍ଟରେ ସେ କ୍ୟାପସନ୍ ଦେଇଛନ୍ତି । ଆଜି ତାଞ୍ଜାନିଆ ଭାରତୀୟ ଉଚ୍ଚାୟୋଗକୁ ଜଣେ ବିଶେଷ ଅତିଥି କିଲ ପଲ୍ ଆସିଥିଲେ । ସେ ଭାରତୀୟ ଫିଲ୍ମର ଲୋକପ୍ରିୟ ଗୀତରେ ଭିଡିଓ କରି ଲକ୍ଷ ଲକ୍ଷ ଭାରତୀୟଙ୍କ ହୃଦୟ ଜିତିଛନ୍ତି । ପଲ୍ ମଧ୍ୟ ସୋସିଆଲ ମିଡିଆ ପ୍ଲାଟଫର୍ମ ଇନ୍‌ଷ୍ଟାଗ୍ରାମ୍‌ରେ ଭାରତୀୟ ଉଚ୍ଚାୟୋଗଙ୍କୁ ଧନ୍ୟବାଦ ଜଣାଇଛନ୍ତି । ସେ ଲେଖିଛନ୍ତି, ଭାରତୀୟ ଉଚ୍ଚାୟୋଗ ଆପଣଙ୍କୁ ବହୁତ ବହୁତ ଧନ୍ୟବାଦ । ପ୍ରକାଶ ଯେ ଫିଲ୍ମ ଶେରଶାହର ଗୀତ ‘ରାତା ଲମ୍ବିୟା’ରେ ଲିପ୍‌ସିଂକ୍ କରି ପଲ୍ ଗତ ବର୍ଷ ଚର୍ଚ୍ଚାକୁ ଆସିଥିଲେ । ଏହି ଭିଡିଓରେ ସେ ଭଉଣୀ ନୀନା ପଲ୍‌ଙ୍କ ସହ ନଜର ଆସିଥିଲେ । ତା’ ପରଠାରୁ କିଲି ପଲ୍ ଚର୍ଚ୍ଚାରେ ରହି ଆସିଛନ୍ତି । ସୋସିଆଲ ମିଡିଆରେ ତାଙ୍କର ୨୨ ଲକ୍ଷ ଫଲୋୟର୍ସ ଅଛନ୍ତି । ଅଭିନେତା ଆୟୁଷ୍ମାନ୍ ଖୁରାନା, ଗୁଲ ପନାଗ ଓ ରିଚା ଚଡ୍ଡାଙ୍କ ସମେତ ଅନେକ ଲୋକପ୍ରିୟ ଭାରତୀୟ ଫିଲ୍ମ ଷ୍ଟାର ତାଙ୍କୁ ସୋସିଆଲ ମିଡିଆରେ ଫଲୋ କରିଛନ୍ତି ।