ବ୍ରହ୍ମପୁର : ସୋମବାର ରାତିରୁ ବିଡିଓଙ୍କୁ ଭେଟିବାକୁ ଯାଇ ୨ ଦିନ ହେବ ନିଖୋଜ ରହିଛନ୍ତି ଜିଆର୍ଏସ୍ । ଖୋଜାଖୋଜି କଲେ ମଧ୍ୟ ତାଙ୍କ ପତ୍ତା ମିଳିବା ସମ୍ଭବପର ହୋଇପାରି ନାହିଁ । ଏନେଇ ତାଙ୍କ ପତ୍ନୀ ଥାନାର ଦ୍ୱାରସ୍ଥ ହୋଇଛନ୍ତି । ଏପରି ଏକ ଅଭାବନୀୟ ଘଟଣା ଗଞ୍ଜାମ ଜିଲ୍ଲା ପୁରୁଷୋତ୍ତମପୁରରେ ଘଟିଛି । ନିଖୋଜ ବ୍ୟକ୍ତି ଜଣକ ହେଲେ ପୁରୁଷୋତ୍ତମପୁର ବ୍ଲକ୍ ସୁନାଥର ଓ ଶୋଳଘର ଜିଆର୍ଏସ୍ ସ୍ୱାଗତ ପଣ୍ଡା । ଶ୍ରୀ ପଣ୍ଡା ପ୍ରାୟ ବର୍ଷେ ହେବ ପୁରୁଷୋତ୍ତମପୁର କଂସାରୀ ସାହିରେ ଘରଭଡ଼ା ନେଇ ପରିବାର ସହ ରହୁଥିଲେ ।
ତାଙ୍କ ନିଜ ଘର ଛତ୍ରପୁର ଜେନାପଲ୍ଲୀରେ । ସୋମବାର ରାତି ପ୍ରାୟ ୯ଟାରେ ବିଡିଓଙ୍କୁ ଭେଟିବା ପାଇଁ ଘରୁ ବାହାରି ଯାଇଥିଲେ । ମାତ୍ର ବିଳମ୍ବିତ ରାତ୍ରି ପର୍ଯ୍ୟନ୍ତ ଘରକୁ ଫେରିନଥିଲେ । ଏପରିକି ପତ୍ନୀ ଫୋନ୍ କଲେ ମଧ୍ୟ ମୋବାଇଲ୍ ସୁଇଚ୍ ଅଫ୍ ରହିଥିଲା । ବହୁ ଖୋଜାଖୋଜି ପରେ ତାଙ୍କ ପତ୍ନୀ ପୁରୁଷୋତ୍ତମପୁର ଥାନାରେ ଅଭିଯୋଗ କରିବା ପରେ ପୋଲିସ ଏକ ମିସିଂ କେସ୍ ରୁଜୁ କରି ଖୋଳତାଡ଼ ଜାରି ରଖିଛି ।
