ତୃତୀୟ ଲହର ପାଇଁ ରାଜ୍ୟ ସରକାରଙ୍କ ଆଗୁଆ ପଦକ୍ଷେପ, କୋଭିଡ୍ କେୟାର ସର୍ଭିସ ପାଇଁ ଏସ୍‌ଓପି ଜାରି

ଭୁବନେଶ୍ୱର : ରାଜ୍ୟରେ ସମ୍ଭାବ୍ୟ ତୃତୀୟ ଲହର ପାଇଁ ରାଜ୍ୟ ସରକାର ଆଗୁଆ ପଦକ୍ଷେପ ନେଇଛନ୍ତି । କରୋନାର ତୃତୀୟ ଲହର ଶିଶୁ ଓ କିଶୋରଙ୍କୁ ଅଧିକ ପ୍ରଭାବିତ କରିପାରେ ବୋଲି ବିଶେଷଜ୍ଞଙ୍କ ସତର୍କ ସୂଚନାକୁ ଦୃଷ୍ଟିରେ ରଖି ରାଜ୍ୟ ସରକାର ଶିଶୁଙ୍କ ସ୍ୱାସ୍ଥ୍ୟକୁ ନେଇ ଚିନ୍ତା ପ୍ରକଟ କରିଛନ୍ତି । ତୃତୀୟ ଲହର ସମୟରେ ଶିଶୁ ଓ କିଶୋରଙ୍କ ପାଇଁ କୋଭିଡ କେୟାର ସର୍ଭିସ ଲାଗି ଏସ୍‌ଓପି ଜାରି କରିଛନ୍ତି ରାଜ୍ୟ ସରକାର । ରାଜ୍ୟ ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ କୁମାର ମହାପାତ୍ର ଏନେଇ ମେଡିକାଲ କଲେଜ ଅଧ୍ୟକ୍ଷ, ଜିଲ୍ଲାପାଳ, ସିଡିଏମଓ ଓ ପିଏଚଓଙ୍କୁ ଚିଠି ଲେଖିଛନ୍ତି । ଶ୍ରୀ ମହାପାତ୍ର ଉକ୍ତ ଚିଠିରେ ଉଲ୍ଲେଖ କରିଛନ୍ତି ଯେ, ତୃତୀୟ ଲହରରେ ଛୋଟପିଲା ସଂକ୍ରମିତ ହେବା ସମ୍ଭାବନା ଥିବାରୁ ଏବେଠୁ ପଦକ୍ଷେପ ନେବା ଜରୁରୀ । ବର୍ତ୍ତମାନ ଥିବା କୋଭିଡ୍ ହସ୍ପିଟାଲରେ ସ୍ୱତନ୍ତ୍ର ଶିଶୁ ବିଭାଗ ପାଇଁ ବ୍ୟବସ୍ଥା କରିବାକୁ ଶ୍ରୀ ମହାପାତ୍ର କହିଛନ୍ତି । ସବୁ ଜିଲ୍ଲା ଓ ଉପଖଣ୍ଡ ହସ୍ପିଟାଲରେ ୧୦ଟି ଆଇସୋଲେସନ ବେଡ୍ ରହିବ । ସେହିପରି ୭ଟି ମେଡିକାଲ କଲେଜରେ ୬୪ ଏନଆଇସିୟୁ ସହ ମୋଟ ୧୫୫ ବେଡ୍ ପ୍ରସ୍ତୁତ ପାଇଁ ବ୍ୟବସ୍ଥା କରିବାକୁ ସେ କହିଛନ୍ତି । ଏହାବ୍ୟତୀତ ଆଇସିୟୁ ବ୍ୟବସ୍ଥା ଥିବା ସବୁ ସିସିସିରେ ୧୫% ବେଡ୍ ପିଲାଙ୍କ ପାଇଁ ଉଦ୍ଦିଷ୍ଟ ରହିବ । ପର୍ଯ୍ୟାପ୍ତ ଔଷଧ, ଅକ୍ସିଜେନ ମହଜୁଦ ରଖିବାକୁ ପଡ଼ିବ । ସ୍ୱତନ୍ତ୍ର କୋଭିଡ଼ ବ୍ଲକ ପ୍ରସ୍ତୁତ କରିବାକୁ କଟକ ଶିଶୁଭବନ ଅଧୀକ୍ଷକଙ୍କୁ ନିର୍ଦ୍ଦେଶ ଦିଆଯାଇଛି । ସେ ଆହୁରି ବି କହିଛନ୍ତି ଯେ, ଡିଏମ୍‌ଇଟିଙ୍କ ନେତୃତ୍ୱରେ ଗଠିତ କମିଟିର ରିପୋର୍ଟ ଆଧାରରେ ଏଭଳି ସୁପାରିଶ କରାଯାଇଛି । ସାଧାରଣ ୱାର୍ଡରେ ଶିଶୁଙ୍କୁ ଆଇସୋଲେସନରେ ରଖିବା ଏକ ଚ୍ୟାଲେଞ୍ଜ । ଜିଲ୍ଲା ହସ୍ପିଟାଲରେ ୧୦ଟି ଲେଖାଏଁ ଆଇସୋଲେସନ ୱାର୍ଡ ରହିବ । ଲକ୍ଷଣ ଥିବା ଶିଶୁଙ୍କୁ କୋଭିଡ କେୟାର ଫ୍ୟାସିଲିଟିକୁ ପଠାଯିବ । ଶିଶୁଙ୍କ କୋଭିଡ୍ କେସ୍ ବଢ଼ିବା ଅଞ୍ଚଳ ଉପର ସ୍ୱତନ୍ତ୍ର ଧ୍ୟାନ ଦିଆଯିବ । ଶିଶୁଭବନରେ ସ୍ୱତନ୍ତ୍ର କୋଭିଡ୍ ବ୍ଲକ ପ୍ରତିଷ୍ଠା ପାଇଁ ବିଚାର କରାଯିବ । ଏଥିପାଇଁ ଅଧୀକ୍ଷକ ରୂପରେଖ ପ୍ରସ୍ତୁତ କରିବେ । ସିଏଚ୍‌ସି ସ୍ତରରେ ୨ରୁ ୪ଟି ଲେଖାଏଁ ବେଡ୍ ରହିବ । ୭ଟି ମେଡିକାଲରେ କେତେ ଲେଖାଏଁ ବେଡ୍ ରହିବ ସେନେଇ ଗାଇଡଲାଇନରେ ଉଲ୍ଲେଖ ରହିଛି । ୬୪ଟି ଏନ୍‌ଆଇସିୟୁ, ୯୪ଟି ଏସ୍‌ଏନ୍‌ସିୟୁ, ୪୪ଟି ଏଚ୍‌ଡିୟୁ ବେଡ୍ ପାଇଁ ପ୍ରସ୍ତାବ ରହିଛି । ସେହିପରି ୧୫୫ଟି ଆଇସୋଲେସନ ବେଡ୍ ରଖିବାକୁ ପ୍ରସ୍ତାବ ରହିଛି । ରାଜ୍ୟରେ ୧୦ ହଜାର ୭୩୬ ବେଡ୍ ଏବଂ ୪୦୭୨ ଆଇସିୟୁ ବେଡ୍ ସମ୍ଭାବ୍ୟ ତୃତୀୟ ଲହରବେଳେ ଶିଶୁଙ୍କ ପାଇଁ ନିର୍ଦ୍ଧାରିତ କରି ରଖିବାକୁ ସମ୍ପୃକ୍ତ ନିର୍ଦ୍ଦେଶନାମାରେ ସ୍ପଷ୍ଟ ଭାବେ କୁହାଯାଇଛି ।