କଂଗ୍ରେସ କାର୍ଯ୍ୟକାରୀ କମିଟି (ସିଡବ୍ଲସି) ସଦସ୍ୟ ରାମଚନ୍ଦ୍ର ଖୁଣ୍ଟିଆଙ୍କୁ ବାଦ
ଭୁବନେଶ୍ୱର : କଂଗ୍ରେସ ସଭାନେତ୍ରୀ ସୋନିଆ ଗାନ୍ଧି ଶୁକ୍ରବାର ଦଳୀୟ ସଂଗଠନରେ ବଡ଼ ଧରଣର ପୁନର୍ବିନ୍ୟାସ କରିଛନ୍ତି । ଓଡ଼ିଶା ପ୍ରଭାରୀ ଥିବା ଦଳର ସାଧାରଣ ସମ୍ପାଦକ ଜିତେନ୍ଦ୍ର ସିଂହଙ୍କୁ ବଦଳାଇ ସାଂସଦ ଡ. ଚେଲ୍ଲା କୁମାରଙ୍କୁ ଏହି ଗୁରୁ ଦାୟିତ୍ୱ ଦିଆଯାଇଛି । ଏହା ସହିତ କଂଗ୍ରେସ କାର୍ଯ୍ୟକାରୀ କମିଟି (ସିଡବ୍ଲସି) ସଦସ୍ୟ ଓ ତେଲାଙ୍ଗାନା ପ୍ରଭାରୀ ଥିବା ବରିଷ୍ଠ କଂଗ୍ରେସ ନେତା ରାମଚନ୍ଦ୍ର ଖୁଣ୍ଟିଆଙ୍କୁ ବାଦ ଦିଆଯାଇଛି । ଅନ୍ୟ ପକ୍ଷେରେ ଦଳର ରାଷ୍ଟ୍ରୀୟ ମୁଖପାତ୍ର ଥିବା ପୂର୍ବତନ କେନ୍ଦ୍ରମନ୍ତ୍ରୀ ଭକ୍ତଚରଣ ଦାସଙ୍କୁ ମିଜୋରାମ ଓ ମଣିପୁର ପ୍ରଭାରୀ ଭାବେ ଦାୟିତ୍ୱ ମିଳିବା ସହ ସିଡବ୍ଲୁସିର ସ୍ଥାୟୀ ନିମନ୍ତ୍ରିତ ସଦସ୍ୟ ଭାବେ ନିଯୁକ୍ତ କରାଯାଇଛି । ୨୦୧୯ ନିର୍ବାଚନ ପୂର୍ବରୁ ଓଡ଼ିଶାର ପ୍ରଭାରୀ ଦାୟିତ୍ୱ ନେଇଥିବା ଜତେନ୍ଦ୍ର ସିଂହଙ୍କୁ ଆସାମ ପ୍ରଭାରୀ ଭାବେ ନିଯୁକ୍ତ ହୋଇଛନ୍ତି । ଓଡ଼ିଶାର ନୂଆ ପ୍ରଭାରୀ ଦାୟିତ୍ୱ ପାଇଥିବା ଚେଲ୍ଲା କୁମାର ୨୦୧୯ ନିର୍ବାଚନରେ ତାମିଲନାଡୁର କ୍ରିଷନଗିରି ଲୋକସଭା ନର୍ବାଚନମଣ୍ଡଳୀରୁ ନିର୍ବାଚିତ ହୋଇଛନ୍ତି । କଂଗ୍ରେସର ଜଣେ ଦକ୍ଷ ସଂଗଠକ ଭାବେ ତାମିଲନାଡୁରେ ତାଙ୍କର ଖାତି ରହିଛି । ଅନ୍ୟ ପକ୍ଷରେ ଓଡ଼ିଶାର ପ୍ରବୀଣ କଂଗ୍ରେସ ନେତା ଭକ୍ତ ଦାସ ଏଆଇସିସି ସଭାନେତ୍ରୀଙ୍କ ବିଶ୍ୱାସଭାଜନ ହୋଇପାରିଛନ୍ତି । ସେଥିପାଇଁ ତାଙ୍କୁ ଦୁଇଟି ରାଜ୍ୟର ସଂଗଠନ ସମ୍ଭାଳିବା ପାଇଁ ଏଆସିସି ସଭାନେତ୍ରୀ ମନୋନୀତ କରିଛନ୍ତି । ଏହି ଦାୟିତ୍ୱ ପାଇବା ପରେ ଶ୍ରୀ ଦାସ କହିଛନ୍ତି, କଂଗ୍ରେସ ସଂଗଠନକୁ ଅଧିକ ମଜବୁତ କରିବା ପାଇଁ ଶ୍ରମତୀ ଗାନ୍ଧୀ ଯେଉଁ ଦାୟିତ୍ୱ ଦେଇଛନ୍ତି, ତାହା ନିଷ୍ଠାର ସହ ପାଳନ କରିବି ।
ସେପଟେ ସୋନିଆଙ୍କ ନୂଆ ଟିମ୍ରେ ଦଳର ବରିଷ୍ଠ ନେତା ଗୁଲାମ ନବୀ ଆଜାଦ, ହେମାତିଲାଲ ଭୋରା, ଅମ୍ବିକା ସୋନି ଏବଂ ମଲିକାର୍ଜୁନ ଖଡେଗେଙ୍କୁ ସାଧାରଣ ସମ୍ପାଦକ ପଦରୁ ହଟାଇ ଦିଆଯାଇଛି । ଏହା ସହିତ ୯ ନୂଆ ସାଧାରଣ ସମ୍ପାଦକଙ୍କୁ ନିଯୁକ୍ତି ମିଳିଥିବା ବେଳେ କଂଗ୍ରେସ କାର୍ଯ୍ୟକାରଣୀରେ କେତେକ ପରିବର୍ତ୍ତନ ମଧ୍ୟ କରାଯାଇଛି । ସୋନିଆ ତାଙ୍କୁ ପରାମର୍ଶ ଦେବା ଲାଗି ଏକ କମିଟି ମଧ୍ୟ ଗଠନ କରିଛନ୍ତି ।
ଗାନ୍ଧୀ ପରିବାରକୁ ଟାର୍ଗେଟ କରି ଗତ ମାସ ସୋନିଆଙ୍କୁ ୨୩ଜଣ ନେତାଙ୍କ ‘ପତ୍ର ବୋମା’ ପରେ ଶୁକ୍ରବାର ଏଭଳି ପୁର୍ନଗଠନ କରାଯାଇଥିଲା । ଯେଉଁ ନେତା ଏହି ପତ୍ରରେ ଦସ୍ତଖତ କରିଥିଲେ ସେମାନଙ୍କ ମଧ୍ୟରେ ଥିଲେ ଗୁଲାମ ନବୀ ଆଜାଦ । ତେବେ ଆଜାଦଙ୍କୁ କାର୍ଯ୍ୟକାରୀ କମିଟିରେ ରାଖାଯାଇଛି । ଅନ୍ୟତମ ଅସନ୍ତୁଷ୍ଟ ନେତା ଜୀତିନ ପ୍ରସାଦଙ୍କୁ କାର୍ଯ୍ୟକାରିଣୀରେ ସ୍ଥାୟୀ ନିମନ୍ତ୍ରୀତ ସଭ୍ୟ କରାଯାଇଛି । ପ୍ରସାଦଙ୍କୁ ସାଧାରଣ ସମ୍ପାଦକ ମଧ୍ୟ ନିଯୁକ୍ତ କରାଯାଇଛି ଏବଂ ପଶ୍ଚିମବଙ୍ଗ ଦାୟିତ୍ୱ ଦିଆଯାଇଛି । ପ୍ରିୟଙ୍କାଙ୍କୁ ସାଧାରଣ ସଂପାଦକ ନିଯୁକ୍ତ କରାଯିବା ସହିତ ଉତ୍ତରପ୍ରଦେଶର ଦାୟିତ୍ୱ ଦିଆଯାଇଛି ।
ଅନ୍ୟତମ ଅସନ୍ତୁଷ୍ଟ ନେତା ମୁକୁଲ ୱାସିନଙ୍କୁ ସାଧାରଣ ସଂପାଦକ କରାଯାଇ ମଧ୍ୟପ୍ରଦେଶ ଦାୟିତ୍ୱ ଦିଆଯାଇଛି । ସୋନିଆଙ୍କୁ ସହାୟତା କରିବା ଲାଗି ଗଠିତ ୬ଜଣିଆ କମିଟିରେ ମଧ୍ୟ ସେ ସ୍ଥାନ ପାଇଛନ୍ତି । କମିଟିରେ ଥିବା ଅନ୍ୟ ସଭ୍ୟମାନେ ହେଲେ ଏକ ଆଣ୍ଟୋନୀ, ଅହମ୍ମଦ ପଟେଲ, ଅମ୍ବିକା ସୋନି, କେସି ବେଣୁ ଗୋପାଳ ଏବଂ ରଣଦୀପ ସିଂହ ସୂର୍ଯେୱାଲା । ସବୁଠୁ ବେଶୀ ଲାଭବାନ ହୋଇଛନ୍ତି ସୂଯେୱାଲା । ତାଙ୍କୁ ସାଧାରଣ ସଂପାଦକ କରାଯିବା ସହିତ ସ୍ୱତନ୍ତ୍ର କମିଟିର ସଭ୍ୟପଦ ମଧ୍ୟ ମିଳିଛି । ସେ ଦଳର ମୁଖ୍ୟ ମୁଖପାତ୍ର ହୋଇ ରହିେବେ ।
