ଗଞ୍ଜାମ: ହିଞ୍ଜିଳି ଥାନା ଅନ୍ତର୍ଗତ ଦୁର୍ବନ୍ଧ ପଞ୍ଚାୟତ ଗୋଦରାପଲ୍ଲୀ ଗାଁର କେ. ରାମମୂର୍ତ୍ତିଙ୍କ ୨ପୁଅ କେ.ବସନ୍ତ ଓ କେ.ସୁଶାନ୍ତଙ୍କ ବିବାହ ଉତ୍ସବ ଅନୁଷ୍ଠିତ ହୋଇଥିଲା । ଗ୍ରାମରେ ଡିଜେ ରୋଷଣୀ ସହ ଏକ ସୁସଜ୍ଜିତ ଘୋଡ଼ାରେ ବସି ୨ଭାଇ ବରବେଶରେ ପଟୁଆର କରି ଗ୍ରାମ ପରିକ୍ରମା କରୁଥଲେ । ଏହି ଦୃଶ୍ୟର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା । ଶନିବାର ଭୋରରେ ଗୋଦରାପଲ୍ଲୀ ଗ୍ରାମରେ ତହସିଲଦାର ପ୍ରଭାତ କୁମାର ପରିଡ଼ା, ଗୋଷ୍ଠୀ ଉନ୍ନୟନ ଅଧିକାରୀ ସୁବ୍ରତ କୁମାର ଜେନା ଓ ଥାନା ଅଧିକାରୀ ଅଭିମନ୍ୟୁ ଦାସ ସଦଳବଳେ ଘଟଣାସ୍ଥଳରେ ପହଞ୍ଚିଥିଲେ । ବାପା ଓ ୨ପୁଅଙ୍କୁ ଆଣି ଥାନାରେ ଅଟକ ରଖିଛନ୍ତି । ତହସିଲଦାରଙ୍କ ଅଭିଯୋଗ ଅନୁଯାୟୀ ହିଞ୍ଜିଳି ଥାନାରେ ମାମଲା ରୁଜୁହୋଇଛି ।
ଅନ୍ୟପକ୍ଷରେ ବଡ଼ଖଣ୍ଡି ଗ୍ରାମ ବାଲିସାହିରେ ଶତାଧିକ ଲୋକଙ୍କ ପାଇଁ ଆୟୋଜିତ ଏକ ଭୋଜି ପ୍ରସ୍ତୁତିସ୍ଥଳରେ ଚଢ଼ଉକରି ଖାଦ୍ୟସାମଗ୍ରୀକୁ ଜବତ କରାଯାଇଛି । ଜବତ ଖାଦ୍ୟ ସାମଗ୍ରୀକୁ ପୌର କାର୍ଯ୍ୟନିର୍ବାହୀ ଅଧିକାରୀ ଡ. ମନୋରଞ୍ଜନ ସାହୁଙ୍କ ତତ୍ତ୍ୱାବଧାନରେ ପୌରାଞ୍ଚଳର ଗରିବ, ଅସହାୟ ବ୍ୟକ୍ତିଙ୍କ ମଧ୍ୟରେ ବଣ୍ଟନ କରାଯାଇଥିଲା । ଆୟୋଜକ ବାଇରୀ ଗଣପତି ଓ ତାଙ୍କ ପୁଅଙ୍କୁ ଅଟକ ରଖାଯାଇ ତହସିଲଦାରଙ୍କ ଅଭିଯୋଗ ପ୍ରକାରେ ପୁଲିସ କୋଭିଡ ଆଇନ ଉଲ୍ଲଙ୍ଘନ ଅନୁସାରେ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି । ଥାନାରେ ଅଟକ ବ୍ୟକ୍ତିଙ୍କ କୋଭିଡ୍ ପରୀକ୍ଷା କରାଯାଇଛି ।
ଦୁଇ ବାହାଘର ଭୋଜି ଚଢ଼ଉରେ ଏସ୍ଆଇ ବାସୁଦେବ ଭୋଇ, ପ୍ରୋବେସନାରୀ ଏସ୍ଆଇ ହେମନ୍ତ କୁମାର ପାତ୍ର, ହାବିଲଦାର ପ୍ରମୋଦ ଗନ୍ତାୟତ, ପିଇଓ ପ୍ରତାପ ସାହୁ, ରାଜସ୍ୱ ନିରୀକ୍ଷକ ଓ ପୁଲିସ କର୍ମଚାରୀ ଉପସ୍ଥିତ ଥିଲେ । ଉଭୟ ଆୟୋଜକ ଏବଂ ପରିବାର ସଦସ୍ୟଙ୍କ ଆଣ୍ଟିଜେନ ପରୀକ୍ଷା କରିବା ପରେ ଆବଶ୍ୟକ ପଦକ୍ଷେପ ଗ୍ରହଣ କରାଯିବ ବୋଲି ବିଡିଓ ଶ୍ରୀ ଜେନା ସୂଚନା ଦେଇଛନ୍ତି ।
