ବଲାଙ୍ଗିର(ଦେବାଶିଷ ମିଶ୍ର) ବଲାଙ୍ଗିର ନିକଟସ୍ଥ ସଦାଇପାଲି ପଲ୍ଲିଶ୍ରୀ ଷ୍ଟାଡିୟମଠାରେ ସାଇଟ ସ୍ପୋର୍ଟ୍ସ ସୋସାଇଟି ଆନୁକୁଲ୍ୟରେ ଅନୁଷ୍ଠିତ ୫୩ ତମ ଫୁଟବଲ ଟୁର୍ଣ୍ଣାମେଣ୍ଟର ଆଜି ଉଦ୍ଯାପିତ ହୋଇଯାଇଛି । ଇଲେଭେନଷ୍ଟାର ବଲାଙ୍ଗିର ୫-୦ ଗୋଲରେ ଭବାନିପାଟଣା ସ୍ପୋଟ୍ସ ହଷ୍ଟେଲକୁ ହରାଇ ଚାମ୍ପିଆନ ହୋଇଛି । ଅତ୍ୟନ୍ତ ଚିତାକର୍ଷକ ଖେଳରେ ଭବାନିପାଟଣାଦଳର ରକ୍ଷଣଭାଗ ଖେଳାଳିଙ୍କ ଦୁର୍ବଳତାର ଫାଇଦା ଉଠାଇ ବଲାଙ୍ଗିର ଦଳ ଗୋଲଦେଇଥିଲେ । ମୁଖ୍ୟ ଅତିଥିଭାବେ ଫୁଟବଲ ଏସୋସିଏସନ ଅଫ ଓଡିଶା ତଥା ବଲାଙ୍ଗିର ଜିଲ୍ଲା କ୍ରୀଡାସଂସଦର କାର୍ଯ୍ୟକାରୀ ସଭାପତି ଡ. ଶ୍ରୀକର ମିଶ୍ର ଯୋଗଦେଇ ବିଜେତା ଦଳଙ୍କୁ ଟ୍ରଫି ସହ ନଗଦ ୨୦ହଜାର ଟଙ୍କା ଓ ଉପବିଜେତା ଦଳକୁ ଟ୍ରଫି ସହ ନଗଦ ୧୫ ହଜାର ଟଙ୍କା ଅର୍ଥରାଶି ଦେଇ ପୁରସ୍କୃତ କରିଥିଲେ । ସମ୍ମାନିତ ଅତିଥିଭାବେ ବଲାଙ୍ଗିର ବ୍ଳକ ଚେୟାରମ୍ୟାନ ଗୋଲାପ ବାଗ ଯୋଗଦେଇଥିଲେ । ଆୟୋଜନ କମିଟି ସମ୍ପାଦକ ଇଂ ନାରାୟଣ ପ୍ରସାଦ ମିଶ୍ରଙ୍କ ତତ୍ୱାବଧାନରେ ଅନୁଷ୍ଠିତ ଖେଳରେ ସାଙ୍ଗଠନିକ ସମ୍ପାଦକ ଡ. ସିଦ୍ଧେଶ୍ୱର ମିଶ୍ର କାର୍ଯ୍ୟକ୍ରମକୁ ସଂଯୋଜନା କରିଥିଲେ । କ୍ରୀଡାବିତ ସୁନିଲ ଚନ୍ଦ୍ର ବିଶ୍ୱାଳ, ଜିଲ୍ଲା ଫୁଟବଲ ସମ୍ପାଦକ ନିସାରକାନ୍ତ ନାଗ, କୋଷାଧ୍ୟକ୍ଷ ଆଦିତ୍ୟ ପଟ୍ଟନାୟକ,ପୁର୍ବତନ କ୍ରୀଡାବିତ ଗରୁଡ ଧ୍ୱଜ ସାଏ ମଂଚାସିନ ଥିଲେ । ଖେଳକୁ ସୁବ୍ରତ ପୁରୋହିତ, ନରର୍ସିଂ ସ୍ୱାମୀ ନାଇଡୁ, ଦେବରାଜ ନାହାକ ଓ ଶରତ ନନ୍ଦ ପରିଚାଲନା କରିଥିଲେ । ଡ. ପ୍ରମୋଦ କୁମାର ମିଶ୍ର, ଇଶ୍ୱର ମଚ୍ଛଖଣ୍ଡ, ଦେବାଶିଷ ପଟ୍ଟନାୟକ ତଥା ସାଇଟ ସ୍ପୋଟ୍ସ ସୋସାଇଟିର ସଭ୍ୟମାନେ ସହଯୋଗ କରିଥିଲେ । ପରିଶେଷରେ ପଲ୍ଲିଶ୍ରୀ ହାଇସ୍କୁଲ ପ୍ରଧାନ ଶିକ୍ଷକ ବୃନ୍ଦାବନ ମହାକୁର ଧନ୍ୟବାଦ ଅର୍ପଣ କରିଥିଲେ ।