26.1 C
Bhubaneswar
Friday, March 29, 2024
Homeଓଡିଶାମାନବିକ ମୂଲ୍ୟବୋଧ ବିନା ଶିକ୍ଷା ଅସଂପୂର୍ଣ୍ଣ: ସୋଆ କୁଳପତି

ମାନବିକ ମୂଲ୍ୟବୋଧ ବିନା ଶିକ୍ଷା ଅସଂପୂର୍ଣ୍ଣ: ସୋଆ କୁଳପତି

ଭୁବନେଶ୍ୱର, : ମଣିଷର ମାନବିକ ମୂଲ୍ୟବୋଧ ନ ରହିଲେ ଶିକ୍ଷା ସଂପୂର୍ଣ୍ଣ ହୋଇପାରିବ ନାହିଁ । ସୋମବାର ଶିକ୍ଷା ଓ
ଅନୁସନ୍ଧାନ (ସୋଆ) ପକ୍ଷରୁ ସାର୍ବଭୌମିକ ମାନବିକ ମୂଲ୍ୟବୋଧ କୁ ନେଇ ଆରମ୍ଭ ହୋଇଥିବା ୫ ଦିନିଆ ଅଫ୍‌ଲାଇନ୍ ଫ୍ୟାକଲ୍ଟି
ଡେଭେଲପ୍‌ମେଂଟ ପ୍ରୋଗ୍ରାମ ଅବସରରେ ଏଭଳି ତଥ୍ୟ ରଖିଛନ୍ତି ଉପସ୍ଥିତ ବକ୍ତାମାନେ ।
ଗୋଟିଏ କିମ୍ବା ଦୁଇଟି ବକ୍ତୃତା ଦ୍ୱାରା ମାନବିକ ମୂଲ୍ୟବୋଧକୁ ବ୍ୟାଖ୍ୟା କରିହେବ ନାହିଁ । ଏହା ଏକ ଜୀବନବ୍ୟାପୀ ଯାତ୍ରା ଯାହାକି
ଜୀବନର ପ୍ରତ୍ୟେକ କ୍ଷେତ୍ରରେ ଉପଲବ୍ଧ ବୋଲି କାର୍ଯ୍ୟକ୍ରମର ଉଦ୍‌ଘାଟନୀ କାର୍ଯ୍ୟକ୍ରମରେ ବକ୍ତବ୍ୟ ରଖିଛନ୍ତି ସୋଆର କୁଳପତି ପ୍ରଫେସର
(ଡାକ୍ତର) ଅଶୋକ କୁମାର ମହାପାତ୍ର ।
ସୋଆ ପରିଚାଳିତ ଇନ୍‌ଷ୍ଟିଚ୍ୟୁଟ୍ ଅଫ୍ ଟେକ୍ନିକାଲ୍ ଏଜୁକେସନ୍ ଆଣ୍ଡ ରିସର୍ଚ୍ଚ (ଆଇଟିଇଆର୍‌)ର ଇଲେକ୍ଟ୍ରିକାଲ୍ ଇଞ୍ଜିନିୟରିଂ ବିଭାଗ
ପକ୍ଷରୁ ଆୟୋଜିତ ଏବଂ ଅଲ୍ ଇଣ୍ଡିଆ କାଉନ୍‌ସିଲ୍ ଫର୍ ଟେକ୍ନିକାଲ୍ ଏଜୁକେସନ୍ (ଏଆଇସିଟିଇ) ଦ୍ୱାରା ପ୍ରାୟୋଜିତ ଏହି କାର୍ଯ୍ୟକ୍ରମରେ
ଭାରତର ବିଭିନ୍ନ ପ୍ରାନ୍ତରୁ ପ୍ରାୟ ୯୦ ଜଣ ଫ୍ୟାକଲ୍ଟି ଯୋଗ ଦେଇଛନ୍ତି ।
ଏହି ଅବସରରେ ପ୍ରଫେସର ମହାପାତ୍ର କହିଥିଲେ ଯେ ଶିକ୍ଷାର ଅର୍ଥ ହେଉଛି ମାନବିକତାର ବିକାଶ । ମୋକ୍ଷ ପ୍ରାପ୍ତ ନିମନ୍ତେ ଶିକ୍ଷାର
ଆବଶ୍ୟକତା ରହିଛି । ତେବେ ବର୍ତମାନ ଅଧିକାଂଶ ଲୋକ ଭଲ ମାର୍କ, ସାର୍ଟିଫିକେଟ୍ ଏବଂ ଭଲ କ୍ୟାରିୟରକୁ ନେଇ ପ୍ରତିଯୋଗିତା
କରୁଛନ୍ତି । ଯଦି ଭାରତକୁ ଅତୀତରେ ବିଶ୍ୱଗୁରୁ ବୋଲି କୁହାଯାଉଥିଲା ତେବେ ଏହାର ମୁଖ୍ୟ କାରଣ ମାନବିକ ମୂଲ୍ୟବୋଧକୁ ମଣିଷ ଗୁରୁତ୍ୱ
ଦେଉଥିଲା ବୋଲି ସେ କହିଥିଲେ ।
ମଣିଷର ଶରୀର ହେଉଛି ଈଶ୍ୱରଙ୍କ ମନ୍ଦିର । ନିଜକୁ ଅନୁଧ୍ୟାନ କଲେ ଏହା ମନୁଷ୍ୟ ଅନୁଭବ କରିପାରିବ । ତେବେ ଆମେ
ବର୍ତମାନ ପଶୁ ଭଳି ଜୀବନଯାପନ କରିବା ସହ ଅନ୍ୟର ଆବଶ୍ୟକତା ବିଷୟରେ ଚିନ୍ତା କରୁନାହୁଁ କିମ୍ବା ଏଥିପ୍ରତି ସଚେତନ ନୋହୁଁ ବୋଲି
ସେ କହିଛନ୍ତି ।
ଏହି ଅବସରରେ ସୋଆର ଉପ-କୁଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦ ଏବଂ ସ୍କୁଲ୍ ଅଫ୍ ହୋଟେଲ୍ ମ୍ୟାନେଜମେଂଟର ଡିନ୍
ତଥା ଉପଦେଷ୍ଟା ପ୍ରଫେସର (ଡକ୍ଟର) ଶିତିକଣ୍ଠ ମିଶ୍ର ମଧ୍ୟ ବକ୍ତବ୍ୟ ରଖିଥିଲେ ।
ପ୍ରଫେସର ନନ୍ଦ କହିଥିଲେ ଯେ ମାନବିକ ମୂଲ୍ୟବୋଧ ଏକ ଜୀବନବ୍ୟାପୀ ଯାତ୍ରାଏବଂ ପ୍ରତ୍ୟେକ ମଣିଷ ପାଇଁ ଏହା ଜରୁରୀ ।
ପ୍ରଫେସର ମିଶ୍ର କହିଥିଲେ ଯେ ଧାର୍ମିକ ଶାସ୍ତ୍ରରେ ଅନେକ ଜ୍ଞାନ ଏବଂ ବୌଦ୍ଧିକ ତଥ୍ୟ ରହିଛି । ତେବେ କେବଳ ଜ୍ଞାନ ଆହରଣ
ନୁହେଁ ବ୍ୟବହାର କରିବା ଆବଶ୍ୟକ ବୋଲି ସେ କହିଛନ୍ତି ।
ଇଲେକ୍ଟ୍ରିକାଲ୍ ଇଞ୍ଜିନିୟରିଂ ବିଭାଗର ମୁଖ୍ୟ ପ୍ରଫେସର ରେଣୁ ଶର୍ମା କାର୍ଯ୍ୟକ୍ରମରେ ଅତିଥିମାନଙ୍କ ପରିଚୟ ପ୍ରଦାନ କରିଥିବା
ବେଳେ ଏଆଇସିଟିଇର ପୂର୍ବାଂଚଳ କୋର୍ଡିନେଟର୍ ଡକ୍ଟର ଦିଲ୍ଲୀପ୍ ଦେବନାଥ ଏବଂ ଏନ୍‌ସିସିଆଇପିର ରିସୋର୍ସ ପର୍ସନ୍ ଶ୍ରୀ ଉମେଶ ଯାଦବ ପ୍ରମୁଖ ଉଦ୍‌ଘାଟନୀ କାର୍ଯ୍ୟକ୍ରମରେ ଉପସ୍ଥିତ ଥିଲେ ।

LEAVE A REPLY

Please enter your comment!
Please enter your name here

5,005FansLike
2,475FollowersFollow
12,700SubscribersSubscribe

Most Popular

HOT NEWS

Breaking