ନୂଆଦିଲ୍ଲୀ : କରୋନା ଭୂତାଣୁ ଯୋଗୁ ଗତବର୍ଷ ସାରା ଦେଶରେ ଲକଡାଉନ ଲାଗୁ ହେବା ସାଙ୍ଗକୁ ସତର୍କତା ଦୃଷ୍ଟିରୁ ଦେଶବ୍ୟାପୀ ସିନେମା ହଲ୍ଗୁଡ଼ିକ ବନ୍ଦ ରଖିବାକୁ ନିର୍ଦେଶାବଳୀ ଜାରି କରାଯାଇଥିଲା। କରୋନା ସ୍ଥିତିରେ ସୁଧାର ଆସିବା ପରେ କିଛି ରାଜ୍ୟର ସରକାର ସିନେମା ହଲ୍ ଖୋଲିବା ଉପରେ ଥିବା କଟକଣାକୁ କୋହଳ କରିଥିଲେ। କିନ୍ତୁ ଆସନ୍ତା ଫେବୃୟାରୀ ୧ ତାରିଖରୁ ସାରା ଦେଶରେ ସମ୍ପୂର୍ଣ୍ଣ ଭାବେ ସିନେମା ହଲ୍ ଖୋଲିବାକୁ କେନ୍ଦ୍ର ସରକାର ନିଷ୍ପତ୍ତି ନେଇଛନ୍ତି।
କେନ୍ଦ୍ର ସୂଚନା ଏବଂ ପ୍ରସାରଣ ମନ୍ତ୍ରୀ ପ୍ରକାଶ ଜାଭଡେକର ସୂଚନା ଦେଇ କହିଛନ୍ତି ଯେ, ଫେବୃୟାରୀ ୧ ତାରିଖରୁ ଦେଶରେ ପ୍ରେକ୍ଷାଳୟଗୁଡ଼ିକ ଖୋଲିବାକୁ ଅନୁମତି ଦିଆଯାଉଛି। କୋଭିଡ୍ ୧୯ ସହିତ ଜଡିତ ସମସ୍ତ ନିର୍ଦ୍ଦେଶାବଳୀ ସିନେମା ହଲରେ ପାଳନ କରାଯିବ। ଯଥାସମ୍ଭବ ଅନଲାଇନରେ ଟିକେଟ ବୁକିଂ କରିବାକୁ ଅନୁରୋଧ କରୁଛୁ। ସ୍ୱଚ୍ଛତା ଓ କୋଭିଡ ୧୯ ନିୟମକୁ କଡ଼ାକଡ଼ି ଭାବେ ପାଳନ କରିବା ନିତ୍ୟାନ୍ତ ଜରୁରୀ। ଦୁଇଟି ଶୋ ମଧ୍ୟରେ କିଛି ସମୟର ବ୍ୟବଧାନ ରଖାଯିବ, ଫଳରେ ଭିଡ଼କୁ ନିୟନ୍ତ୍ରଣ କରାଯାଇପାରିବ।
ନିକଟରେ ଗୃହ ମନ୍ତ୍ରଣାଳୟ ସାମାଜିକ ଦୂରତା ସହିତ ସିନେମା ହଲ୍ ଖୋଲିବାକୁ ଅନୁମତି ଦେଇଥିଲା। ଯାହା ଅଧୀନରେ ଦୁଇ ଦର୍ଶକଙ୍କ ମଧ୍ୟରେ ଏକ ଚେୟାର ଖାଲି ରଖିବାକୁ ନିର୍ଦେଶ ରହିଥିଲା। ସିନେମା ହଲ୍ ପୂର୍ଣ୍ଣ ଭାବରେ ଖୋଲି ନ ଥିବାରୁ ଚଳଚ୍ଚିତ୍ର ନିର୍ମାତାମାନେ ଫିଲ୍ମ ରିଲିଜ୍ କରିବାକୁ ଆଗ୍ରହୀ ନ ଥିଲେ। ଯେଉଁଥିପାଇଁ ସିନେମା ଅପରେଟରମାନେ କ୍ଷତି ସହୁଥିଲେ।