ଲସଏଞ୍ଜଲସ/ ଲଣ୍ଡନ/ ସିଙ୍ଗାପୁର/ ଦୁବାଇ/ମସ୍କୋ/ କାନବେରା/ ପୁରୀ/ ନୂଆଦିଲ୍ଲୀ /ଭୁବନେଶ୍ୱର : ବିଶ୍ଵ ଓଡ଼ିଶା ସମାଜ(ବିଓସ)ର ଆଜି ପ୍ରଥମ ପ୍ରତିଷ୍ଠା ଦିବସ ପାଳନ କରାଯାଇଛି। କରୋନା ସଂକ୍ରମଣ ତୀବ୍ର ହୋଇଥିବା ଯୋଗୁଁ କୌଣସି ଉତ୍ସବ ପାଳନ ନ କରାଯିବା ପାଇଁ ସମାଜ ତରଫରୁ ନିଷ୍ପତ୍ତି କରାଯାଇଥିଲା। ପ୍ରଥମ ସ୍ଵନକ୍ଷତ୍ର ଦିବସକୁ ଅତ୍ୟନ୍ତ ନିରାଡମ୍ବର ଓ ସାଙ୍କେତିକ ଢଙ୍ଗରେ ମନାଯାଇଥିଲା।
ବିଶ୍ଵ ଓଡ଼ିଶା ସମାଜ ବିଶ୍ଵବ୍ୟାପି ଓଡ଼ିଆଙ୍କର ସର୍ବୋଚ୍ଚ ସଂଗଠନ ଅଟେ। ସାରା ପୃଥିବୀରେ ଓଡ଼ିଆ ସମ୍ପ୍ରଦାୟର ହିତ, ସାଧନ ଓ ସ୍ୱାର୍ଥ ସୁରକ୍ଷା ପାଇଁ ଏହା କାର୍ଯ୍ୟ କରି ଆସୁଛି। ବିଭିନ୍ନ ରାଷ୍ଟ୍ରର ଓଡ଼ିଆ ସମାଜ, ପ୍ରବାସୀ ଓଡିଆ ନେତୃବୃଦ ଏବଂ ଓଡ଼ିଶାର ଶୁଭେଚ୍ଛୁ ଏହାର ସଦସ୍ୟ ଅଛନ୍ତି। ପୃଥିବୀ ବ୍ୟାପି ଓଡ଼ିଆଙ୍କର ଏହି ଶୃଙ୍ଗ ସଂଗଠନ ୨୦୨୧ ମସିହା ଜାନୁଆରୀ ୧୪ ତାରିଖ ମକର ସଂକ୍ରାନ୍ତିର ପବିତ୍ର ଅବସରରେ ଗଠନ କରାଯାଇଥିଲା। ଏବେ ଏହି ସଂସ୍ଥାରେ ସାରା ବିଶ୍ଵର ୫୬ ଟି ଦେଶର ଓଡ଼ିଆ ପ୍ରତିନିଧି ମାନେ ସାମିଲ ହୋଇଛନ୍ତି। ବରିଷ୍ଠ ସାମ୍ବାଦିକ କିଶୋର ଦ୍ବିବେଦୀ ଏହାର ଅଧକ୍ଷ ଅଛନ୍ତି। ଓଡ଼ିଶା ବିଧାନସଭାର ବାଚସ୍ପତି ସୂର୍ଯ୍ୟ ନାରାୟଣ ପାତ୍ର, କେନିୟା ର ଓଡ଼ିଆ ସାଂସଦ ଡ଼ଃ ସ୍ୱରୂପ ମିଶ୍ର, ଶୋଭାନୀୟ ଆନ୍ଦୋଳନର ନିର୍ଦ୍ଦେଶିକା ଡଃ ଅରୁନ୍ଧତୀ ଦେବୀ ଯଥାକ୍ରମେ ଏହାର ମୁଖ୍ୟ ପୃଷ୍ଠପୋଷକ, ମୁଖ୍ୟ ଉପଦେଷ୍ଟା ଓ ପ୍ରତିଷ୍ଠାତ୍ରୀ ଅଟନ୍ତି। ଆଜି ବିଶ୍ୱ ଓଡ଼ିଶା ସମାଜ ତରଫରୁ ବରିଷ୍ଠ ସଦସ୍ୟ ବଦ୍ରିନାଥ ମିଶ୍ର, ମଧୁସୂଦନ ମିଶ୍ର ଏବଂ ବିଶିଷ୍ଠ ବାଲୁକା ଶିଳ୍ପୀ ମାନସ ସାହୁ ପ୍ରମୁଖ ପୁରୀ ଶ୍ରୀ ମନ୍ଦିରର ସିଂହଦ୍ୱାର ସମ୍ମୁଖରେ ବିଓସ୍ ର ସ୍ଥାପନା ଦିବସ ଉପଲକ୍ଷେ ପ୍ରଦୀପ ପ୍ରଜ୍ବଳନ କରି ପ୍ରଭୁ ଶ୍ରୀ ଜଗନ୍ନାଥଙ୍କର ଆଶୀର୍ବାଦ କାମନା କରିବା ସାଙ୍ଗକୁ କରୋନା ମହାମାରୀର ଦୂରୀକରଣ ପାଇଁ ପ୍ରାର୍ଥନା କରିଥଲେ। ଜାତୀୟ ରାଜଧାନୀ ନୂଆଦିଲ୍ଲୀର ହାଉସଖାସ ସ୍ଥିତ ଜଗନ୍ନାଥ ମନ୍ଦିର ଠାରେ ବିଓସ ର ଅଡିଟର ସୁଧୀର ଦାଶ, ମହିଳା ଶାଖାର ଉପସଭାପତି ରିତା ପାତ୍ର ଏବଂ ଅନ୍ୟାନ୍ୟ ସଦସ୍ୟ ମାନେ ସଂସ୍ଥାର ଉତ୍ତରୋତ୍ତର ଉନ୍ନତି ଓ ମାନବ ସମାଜର କଲ୍ୟାଣ ପାଇଁ ଦୀପ ଦାନ କରିବା ସହିତ ସମୂହ ପ୍ରାର୍ଥନା କରିଥିଲେ। ପ୍ରଥମ ପ୍ରତିଷ୍ଠା ଦିବସ ଉପଲକ୍ଷେ ବିଓସ ର ସଦସ୍ୟ ଓ ଶୁଭେଚ୍ଛୁ ମାନେ ସାରା ବିଶ୍ଵର ବିଭିନ୍ନ ଜଗନ୍ନାଥ ମନ୍ଦିର, ହିନ୍ଦୁ ମନ୍ଦିର, ଐତିହାସିକ ସ୍ଥଳ ମାନଙ୍କରେ ଦୀପ ଦାନ, ମହମବତୀ ପ୍ରଜ୍ଵଳନ ଏବଂ ବିଓସ ର ପ୍ରାଚୀର ପତ୍ର ପ୍ରଦର୍ଶନ କରି ଏହି ଶୁଭ ଦିବସକୁ ପାଳନ କରିଥିବା ଜଣା ଯାଇଛି।
ବିଶ୍ବ ଓଡ଼ିଶା ସମାଜର ପ୍ରଥମ ପ୍ରତିଷ୍ଠା ଦିବସ ପାଳିତ
