ନୂଆଦିଲ୍ଲୀ : ମହିଳା ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍) ମାର୍ଚ୍ଚ ୨୦୨୩ ରେ ୱିଣ୍ଡୋରେ ଲଞ୍ଚ ହେବ ଏବଂ ଏଥିରେ ପାଞ୍ଚଟି ଦଳ ହେବାର ସମ୍ଭାବନା ରହିଛି ବୋଲି ବିସିସିଆଇର ଜଣେ ବରିଷ୍ଠ ଅଧିକାରୀ ଶୁକ୍ରବାର ଦିନ ନିଶ୍ଚିତ କରିଛନ୍ତି। ମହିଳା ଆଇପିଏଲ୍ ଆରମ୍ଭ ହେତୁ ପ୍ରଶଂସକଙ୍କ ମଧ୍ୟରେ ଖୁସିର ଲହରୀ ଖେଳିଯାଇଛି।
ବିସିସିଆଇର ବରିଷ୍ଠ ଅଧିକାରୀମାନେ ଏହି ପ୍ରସଙ୍ଗରେ ଆଲୋଚନା କରିଥିଲେ ଏବଂ ଦକ୍ଷିଣ ଆଫ୍ରିକାରେ ମହିଳା ଟି -୨୦ ବିଶ୍ୱକପ ଅନୁସରଣ କରୁଥିବା ଟୁର୍ନାମେଣ୍ଟ ପାଇଁ ମାର୍ଚ୍ଚ ୱିଣ୍ଡୋ ଉପଯୁକ୍ତ ବୋଲି ବିବେଚନା କରାଯାଇଥିଲା। ବିସିସିଆଇର ଜଣେ ବରିଷ୍ଠ ଅଧିକାରୀ ନାମ ଗୋପନ ରଖିବା ସର୍ତ୍ତରେ ପିଟିଆଇକୁ କହିଛନ୍ତି ଯେ ହଁ, ମହିଳା ଆଇପିଏଲ୍ ମାର୍ଚ୍ଚ ପ୍ରଥମ ସପ୍ତାହରେ ଆରମ୍ଭ ହେବ ଏବଂ ଆମେ ପ୍ରଥମ ବର୍ଷ ପାଇଁ ଚାରି ସପ୍ତାହର ୱିଣ୍ଡୋ ସ୍ଥିର କରିଛୁ। ଦକ୍ଷିଣ ଆଫ୍ରିକାରେ ଟି -୨୦ ବିଶ୍ୱକପ୍ ଫେବୃଆରୀ ୯ ରୁ ୨୦ ପର୍ଯ୍ୟନ୍ତ ଅନୁଷ୍ଠିତ ହେବ ଏବଂ ଆମେ ଏହା ପରେ ମହିଳା ଆଇପିଏଲ୍ କରିବାକୁ ଯୋଜନା କରୁଛୁ।
ସେ କହିଛନ୍ତି, “ବର୍ତ୍ତମାନ ଆମେ ପାଞ୍ଚଟି ଦଳ ସହିତ ଟୁର୍ନାମେଣ୍ଟ ଆୟୋଜନ କରିବୁ, କିନ୍ତୁ ଏହା ୬ ଟି ଦଳ ହୋଇପାରେ କାରଣ ସମ୍ଭାବ୍ୟ ନିବେଶକଙ୍କ ମଧ୍ୟରେ ବହୁତ ଆଗ୍ରହ ରହିଛି।” ଆଗକୁ ଦଳଗୁଡିକର ନିଲାମ ପ୍ରକ୍ରିୟା ଘୋଷଣା କରାଯିବ । ବିସିସିଆଇ ସଭାପତି ସୈାରଭ ଗାଙ୍ଗୁଲି ଏବଂ ସଚିବ ଜୟ ଶାହା ପୂର୍ବରୁ ପିଟିଆଇକୁ ପୃଥକ ସାକ୍ଷାତକାରରେ ନିଶ୍ଚିତ କରିଥିଲେ ଯେ ମହିଳା ଆଇପିଏଲ୍ ୨୦୨୩ ରେ ଆରମ୍ଭ ହେବ।
ମୁମ୍ବାଇ ଇଣ୍ଡିଆନ୍ସ, ରାଜସ୍ଥାନ ରୟାଲ୍ସ, ଚେନ୍ନାଇ ସୁପର କିଙ୍ଗ୍ସ ସମସ୍ତେ ମହିଳା ଦଳ କିଣିବାକୁ ଆଗ୍ରହ ଦେଖାଇଥିଲେ। ଏପରିକି ୟୁଟିଭି ସିଇଓ ରୋନି ସ୍କ୍ରୁଭାଲା ଟ୍ୱିଟ୍ କରି କହିଛନ୍ତି ଯେ ସେ ମହିଳା ଆଇପିଏଲ୍ ଫ୍ରାଞ୍ଚାଇଜ୍ କିଣିବାକୁ ଆଗ୍ରହୀ।