(ଡାକ୍ତର ମନୋଜ ଅଗ୍ରୱାଲ ଏବଂ ଡିଏସ୍ପି ବିରୁଦ୍ଧରେ କାର୍ଯ୍ୟାନୁଷ୍ଠାନ ଦାବି)
ବଲାଙ୍ଗିର, -ସ୍ନେହଲତା ଛତ୍ରିଆ ଦୁଷ୍କର୍ମ ହତ୍ୟା ଘଟଣାକୁ ପାଞ୍ଚ ବର୍ଷ ପୁରି ଯାଇଥିଲେ ମଧ୍ୟ ନ୍ୟାୟ ମିଳିପାରି ନ ଥିବାରୁ ପଶ୍ଚିମ ଓଡିଶା ସାବିତ୍ରିବାଇ ଫୁଲେ ମହିଳା ସଂଗଠନ ଏକ ଦୁଇ ଦଫା ସମ୍ମଳିତ ଦାବିପତ୍ର ଗୋଷ୍ଠି ଉନ୍ନୟନ ଅଧିକାରୀ ଖପ୍ରାଖୋଲଙ୍କ ଜରିଆରେ ରାଜ୍ୟପାଳଙ୍କୁ ପ୍ରଦାନ କରିଅଛି । ପ୍ରକାଶଥାଉ କି ଦଳିତ, ମେଧାବୀ, ନାବାଳିକା, ସ୍ନେହଲତା ଛତ୍ରିଆଙ୍କୁ ୨୦୧୫ ମେ ୨୨ ତାରିଖ ଦିନ ଗଣ ଧର୍ଷଣ ପରେ ବିଭତ୍ସ ଭାବରେ ହତ୍ୟା କରାଗଲା । ଲୋକଙ୍କ ସ୍ୱରକୁ ଦବାଇ ଦେବା ପାଇଁ ରାଜ୍ୟ ସରକାର ସଙ୍ଗେ ସଙ୍ଗେ କ୍ରାଇମ ବ୍ରାଞ୍ଚ ତଦନ୍ତର ଘୋଷଣା କଲେ । କ୍ରାଇମବ୍ରାଞ୍ଚ ତଦନ୍ତ ଅଧିକାରୀ ଭାବରେ ଡିଏସ୍ପି ପି.କେ. ମିଶ୍ର ଦୁଇ ତିନି ଥର ଘଟଣା ସ୍ଥଳକୁ ଆସି ଆଜି ପର୍ଯ୍ୟନ୍ତ କୈଣସି ରିପୋର୍ଟ ଦାଖଲ କଲେ ନାହିଁ । ଅନ୍ୟ ପକ୍ଷରେ ଉପରଠାଉରିଆ ଭାବରେ ପୋଲିସ ଦୁଇ ଜଣଙ୍କୁ ଗିରଫ କଲା ସେମାନେ ଜେଲରୁ ଜାମିନରେ ମୁକୁଲି ଆରାମରେ ରହୁଛନ୍ତି । ଡାକ୍ତର ମନୋଜ ଅଗ୍ରୱାଲ ଶବକୁ ବ୍ୟବଚ୍ଛେଦ ମଧ୍ୟ କଲେ ନାହିଁ । ଦିଲ୍ଲୀର ନିର୍ଭୟା ଘଟଣାରୁ ଏହି ଘଟଣା କୌଣସି ହିସାବରେ କମ୍ ନୁହେଁ । ସ୍ନେହଲତା ଏକ ଦଳିତ ନାବାଳିକା ହୋଇଥିବାରୁ ପୋଲିସ, ଡାକ୍ତର ଆନ୍ତରିକତା ଦେଖାଇଲେ ନାହିଁ ଯାହା ଫଳରେ ଆଜି ପର୍ଯ୍ୟନ୍ତ ସ୍ନେହଲତାକୁ ନ୍ୟାୟ ମିଳିପାରି ନାହିଁ ବୋଲି ନିସ୍ପେଷିତ ଦଳିତ ସମାଜରେ ଆଲୋଚନା ହେଉଛି । ଆଗାମୀ ଦିନରେ ସ୍ନେହଲତା ଘଟଣାର ସିବିଆଇ ତଦନ୍ତ ନ ହେଲେ ଏବଂ ସ୍ନେହଲତାକୁ ନ୍ୟାୟ ମିଳିବା ପର୍ଯ୍ୟନ୍ତ ପଶ୍ଚିମ ଓଡିଶା ସାବିତ୍ରୀବାଇ ଫୁଲେ ମହିଳା ସଂଗଠନ ତାର ସଂଗ୍ରାମ ଜାରି ରଖିବ ବୋଲି ଦୃଢୋକ୍ତ ପ୍ରକାଶ କରିଛନ୍ତି । ଦାବିପତ୍ର ପ୍ରଦାନ ସମୟରେ ସଭାପତି ଚମ୍ପା ନାଗ, ଉପ-ସଭାପତି ସୁଭଦ୍ରା ସୁନା, ସାଧାରଣ ସଂପାଦିକା ଅରୁଣା ନାଗ, କାର୍ଯ୍ୟକାରୀ ସଦସ୍ୟା ଗୀତାଞ୍ଜଳି ବାଗ ଉପସ୍ଥିତ ଥିଲେ ।