ଭୁବନେଶ୍ୱର : କରୋନାର ଭୟାବହତା ଓ ବିଧାନସଭାର କର୍ମଚାରୀଙ୍କ କ୍ବାରେଣ୍ଟାଇନ୍ ପାଇଁ ସୋମବାର ଲୋକସେବା ଭବନର କନଭେସନ୍ ହଲରେ ବିଧାନସଭା ଅଧିବେଶନ ଅନୁଷ୍ଠିତ ହେବ। ସଂଯୋଗବଶତଃ ହେଉ, କି ଜରୁରୀ ପରିସ୍ଥିତି ଯୋଗୁ, ଓଡ଼ିଶା ଇତିହାସରେ ଏହା ପ୍ରଥମ ଘଟଣା। ପୂର୍ବାହ୍ନ ସାଢ଼େ ୧୦ଟାରେ ଅନୁଷ୍ଠିତ ହେବାକୁ ଥିବା ଏହି ଐତିହାସିକ ବଜେଟ ଅଧିବେଶନରେ ଏକ ତୃତୀୟାଂଶ ସଭ୍ୟ ହିଁ ଉପସ୍ଥିତ ରହିବେ ବୋଲି ବାଚସ୍ପତି ଡ. ସୂର୍ଯ୍ୟନାରାୟଣ ପାତ୍ର କହିଛନ୍ତି।
ବାଚସ୍ପତି ଡ. ପାତ୍ରଙ୍କ ସୂଚନା ଅନୁଯାୟୀ, ଆଜି ବଜେଟ ଅଧିବେଶନର ବ୍ୟୟମଞ୍ଜୁରି ବିଲ୍ ଆଗତ କରାଯିବ। କରୋନା ପରିସ୍ଥିତିକୁ ଦୃଷ୍ଟିରେ ରଖି ସବୁ ବିଭାଗର ଖର୍ଚ୍ଚ ଦାବି ଗିଲୋଟିନ ଜରିଆରେ ପାରିତ କରାଯିବ। ଏମିତିକି ବିଧାନସଭାକୁ ମୁଲତବି କରିବାପାଇଁ ପ୍ରସ୍ତାବ ପାରିତ କରାଯିବାକୁ ପ୍ରସ୍ତାବ ରହିଛି। ଯଦି ଏହାକୁ କୌଣସି ବିରୋଧୀ ଦଳ ସଦସ୍ୟ ବିରୋଧ କରନ୍ତି ତେବେ ଯାଇ ନିଷ୍ପତ୍ତିରେ ପରିବର୍ତ୍ତନ ହୋଇପାରେ ବୋଲି ଡ. ପାତ୍ର କହିଛନ୍ତି। ଗୃହର ସଦସ୍ୟମାନେ କିଭଳି ନିଜ ନିଜ ଅଞ୍ଚଳରୁ ସୁରକ୍ଷିତ ଭାବେ ବିଧାନସଭାକୁ ଆସିବେ ସେନେଇ ସଂପୃକ୍ତ ଜିଲ୍ଲାପାଳ ଓ ଏସପିଙ୍କୁ ଦାୟିତ୍ବ ଦିଆଯାଇଛି। ଲୋକସେବା ଭବନର କନଭେନସନ ହଲରେ ନିର୍ଦିଷ୍ଟ ଦୂରତା ଛାଡି ସଦସ୍ୟମାନେ ବସିବାପାଇଁ ବ୍ୟବସ୍ଥା କରାଯାଇଛି। ତେବେ ଗଣମାଧ୍ୟମର ପ୍ରତିନିଧିଙ୍କୁ ଅଧିବେଶନ ବେଳେ ଭିତରକୁ ଯିବାକୁ ଦିଆଯିବ ନାହିଁ ବୋଲି ଡ. ପାତ୍ର ସୂଚନା ଦେଇଛନ୍ତି। ତେବେ ଏହି ସମୟରେ ଯାହାକିଛି ଆଲୋଚନା ହେଲା ସେସବୁ ସୂଚନା ଓ ଲୋକସମ୍ପର୍କ ବିଭାଗ ଜରିଆରେ ସାମାଜିକ ଗଣମାଧ୍ୟମରେ ଅବଗତ କରାଯିବ। ଆଜି ଅଧିବେଶନ ବେଳେ ବିଧାନସଭା ସଚିବଙ୍କ ସହିତ କେତେକ ନିରାପତ୍ତାରକ୍ଷୀ, କ୍ଷୀପ୍ରଲେଖକ, ଅଗ୍ନିଶମ ବିଭାଗ କର୍ମଚାରୀ ଏବଂ ନିର୍ମାଣ ଓ ସଂସଦୀୟ ବ୍ୟାପାର ବିଭାଗର କର୍ମଚାରୀ ଉପସ୍ଥିତ ରହିବେ ବୋଲି ଜଣାଯାଇଛି।