ବାକି ନଦେବାରୁ ଆକ୍ରମଣ ଜଣେ ଗିରଫ

ଭୁବନେଶ୍ୱର: ବାକି ନଦେବାରୁ ଦୋକାନୀକୁ ଆକ୍ରମଣ ଅଭିଯୋଗରେ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି ଚନ୍ଦ୍ରଶେଖରପୁର ଥାନା ପୁଲିସ । ଗିରଫ ଜଣଙ୍କ ହେଲେ ଉକ୍ତ ଥାନା ଅନ୍ତର୍ଗତ ମହାବିର ବସ୍ତିର ଚନ୍ଦନ ନାୟକ(୧୯) । ସୂଚନାଯୋଗ୍ୟ ଯେ, ଅଭିଯୋଗକାରିଣୀଙ୍କର ପୁଅ ଆହତ ସୂର୍ଯ୍ୟକାନ୍ତ ମହାନ୍ତିଙ୍କର ମହାବିର ବସ୍ତିରେ ଗୋଟିଏ ତେଜରାତି ଦୋକାନ ଅଛି । ଗତ ୧୧ ତାରିଖ ଅପରାହ୍ନ ସମୟରେ ଅଭିଯୁକ୍ତ ଚନ୍ଦନ ଓ ତାଙ୍କର ସହଯୋଗୀ ତେଜରାତି ଦୋକାନ ନିକଟକୁ ଆସିଥିଲେ । ସେଠାରେ ସୂର୍ଯ୍ୟକାନ୍ତଙ୍କୁ କିଛି ସାମଗ୍ରୀ ବାକିରେ ମାଗିଥିଲେ । ସୂର୍ଯ୍ୟକାନ୍ତ ବାକିରେ ସାମଗ୍ରୀ ଦେବା ପାଇଁ ମନା କରିଦେବାରୁ ଅଭିଯୁକ୍ତ ଦୁହେଁ ରାଗିଯାଇ ତାଙ୍କୁ ଗାଲୁ ଗୁଲଜ କରିବା ସହ ତାଙ୍କୁ ଦୋକାନରୁ ଟାଣି ଆଣି ଗୋଟିଏ କାଚ ବୋତଲରେ ଆକ୍ରମଣ କରିଥିଲେ । ଏହା ପରେ ଅଭିଯୁକ୍ତମାନେ ଉକ୍ତ ଦୋକାନରୁ କିଛି ସାମଗ୍ରୀକୁ ଭଙ୍ଗାରୁଜା କରି ଦେଇଥିଲେ । ଏହା ଦେଖି ଅଜିତ ନାୟକ ଓ ସୁଜିତ ନାୟକ ନାମକ ସ୍ଥାନୀୟ ବ୍ୟକ୍ତି ସୂର୍ଯ୍ୟକାନ୍ତଙ୍କୁ ଉଦ୍ଧାର କରିବା ପାଇଁ ଘଟଣା ସ୍ଥଳକୁ ଚାଲି ଆସିବାରୁ ଅଭିଯୁକ୍ତମାନେ ମଧ୍ୟ ତାଙ୍କୁ ଗାଳି ଗୁଲଜ କରି ଧମକ ଦେଇଥିଲେ । ଏନେଇ ସୂର୍ଯ୍ୟକାନ୍ତଙ୍କ ମାଆ ଚନ୍ଦ୍ରଶେଖରପୁର ଥାନାରେ ଅଭିଯୋଗ କରିବା ପରେ ପୁଲିସ ତଦନ୍ତ କରିବା ସହ ଆଜି ଅଭିଯୁକ୍ତଙ୍କୁ ଗିରଫ କରି ଥାନାକୁ ଆଣିଥିଲେ । ପଚରାଉଚରା ବେଳେ ଅଭିଯୁକ୍ତ ନିଜର ଅପରାଧ ସ୍ୱୀକାର କରିଥିଲେ ।