ମୁରିବାହାଲ: ମୁରିବାହାଲ ଥାନା ଗୋଇମୁଣ୍ଡ ପଞ୍ଚାୟତ ଅଞ୍ଚଳରେ ଜଣେ ୧୭ ବର୍ଷୀୟା ନାବାଳିକାକୁ ଅପହରଣ କରାଯାଇଥିବା ଅଭିଯୋଗ ହୋଇଛି । ଅଭିଯୋଗ କରିଛନ୍ତି ଯୁବତୀଙ୍କ ମା’ । ଏହି ଘଟଣାରେ ଟୁର୍ଚ୍ଛାକାନୀ ଗାଁର ଦୀପକ ସରାଫ ଓ ଚନ୍ଦନ ସରାଫ ନାମକ ଦୁଇଜଣ ଯୁବକଙ୍କ ନାମରେ ଥାନାରେ ମାମଲା ରୁଜୁ କରିଛନ୍ତି ଯୁବତୀଙ୍କ ମା’ । ତାଙ୍କ କହିବା ଅନୁଯାୟୀ ଯୁବତୀଙ୍କୁ ବାଇକ୍ ଯୋଗେ ଦୀପକ ଓ ଚନ୍ଦନ ଶୁକ୍ରବାର ରାତି ୮ଟାରେ ଅପହରଣ କରିନେଇଥିଲେ । ଖୋଜାଖୋଜି କରି ନିରାଶ ହେବାରୁ ଶନିବାର ମୁରିବାହାଲ ଥାନାରେ ଏତଲା ଦେଇଥିଲେ ।
ପୁଲିସ୍ କେସ୍ ନଂ-୩୯/୨୩ରେ ରୁଜୁ କରି ଅଧିକ ତଦନ୍ତ କରୁଛି ବୋଲି ଆଇଆଇସି କମଳ ଲୋଚନ ବେହେରା ପ୍ରକାଶ କରିଛନ୍ତି । କିନ୍ତୁ ଏ ନେଇ ଚନ୍ଦନଙ୍କ ବାପା କହିଛନ୍ତି ଯେ ମୁଁ ଜଣେ ଡାକ୍ତର ହୋଇଥିବାରୁ ମୋତେ ଓ ମୋ ପୁଅ ଚନ୍ଦନ ନାମରେ ଅପପ୍ରଚାର କରି ମୋର ମାନ ସମ୍ମାନକୁ ବଦ୍ନାମ କରିବା ପାଇଁ କିଛି ଖଳ ପ୍ରକୃତିର ଲୋକ ଚେଷ୍ଟା କରୁଛନ୍ତି । ଯେଉଁଦିନ ଯୁବତୀ ଓ ତାଙ୍କ ପ୍ରେମିକ ଦୀପକ ମିଶି ଫେରାର ହେଲେ ସେଦିନ ଚନ୍ଦନ ଘରେ ଥିଲା ବୋଲି କହିଛନ୍ତି ଚନ୍ଦନଙ୍କ ବାପା । ଏପଟେ ଫେରାର ହୋଇଥିବା ଯୁବତୀ ମଧ୍ୟ ନିଜ ମୋବାଇଲରେ ସୋସିଆଲ ମିଡିଆରେ ଭିଡିଓ ସେୟାର କରି କହିଛନ୍ତି ଯେ ମୋ ନାମ ଦୀପା ମଲ୍ଲିକ । ମୋତେ ୧୭ ବର୍ଷ ହୋଇସାରିଛି ।
ମୁଁ ମୋର ଇଚ୍ଛାରେ ଦୀପକ ସହ ଘରୁ ଚାଲିଆସିଛି । ମୋତେ କେହି ଫେରାର ହେବାରେ ସହଯୋଗ କରିନାହାଁନ୍ତି । ମୁଁ ଘର ଛାଡ଼ି ଚାଲି ଆସିବାରେ ଚନ୍ଦନଙ୍କ କୌଣସି ହାତ ନାହିଁ ବୋଲି ମଧ୍ୟ ଉକ୍ତ ଯୁବତୀ ଜଣକ କହୁଥିବା ଭିଡ଼ିଓ ଏବେ ମୁରିବାହାଲ ଅଞ୍ଚଳରେ ଭାଇରାଲ ହେବାରେ ଲାଗିଛି । ତେବେ ଏଥିରୁ ସ୍ପଷ୍ଟ ହୋଇପାରେ ଯେ, କିଛି କୁଚକ୍ରୀ ମିଶି ଡାକ୍ତରଙ୍କ ମାନ ସମ୍ମାନକୁ ହାନୀ କରିବାକୁ ଚକ୍ରାନ୍ତ ଚଳାଇଛନ୍ତି । ପୁଲିସ୍ ଏହାର ସଠିକ୍ ତଦନ୍ତ କରୁ ବୋଲି ସାଧାରଣରେ ଦାବି ହେଉଛି ।
