ମୁମ୍ବାଇ: ରାଜସ୍ଥାନର ପାଲି ଜିଲ୍ଲାରେ ଏକ ବୀଭତ୍ସ ହତ୍ୟାକାଣ୍ଡ ଘଟିଛି । ସରଘନା ଅଞ୍ଚଳରେ ଥିବା ଏକ ଜଙ୍ଗଲରେ ଛେଳି ଚରାଇବା ସମୟରେ ଜଣେ ବୃଦ୍ଧ ମହିଳାଙ୍କୁ ପଥରରେ ଛେଚି ଜଣେ ଯୁବକ ମାରିଦେଇଥିଲା । ଘଟଣାସ୍ଥଳରେ ହିଁ ବୃଦ୍ଧାଙ୍କର ମୃତ୍ୟୁ ହୋଇଥିଲା । ସବୁଠାରୁ ଆଶ୍ଚର୍ଯ୍ୟର କଥା ହେଲା କି ବୃଦ୍ଧାଙ୍କୁ ମାରିବା ପରେ ନୃଶଂସ ଯୁବକ ବୃଦ୍ଧାଙ୍କର ମୁହଁର ମାଂସକୁ ନିଜ ଦାନ୍ତରେ କାମୁଡ଼ି କାମୁଡ଼ି ଖାଉଥିଲା । ତାପରେ ସେ ବୃଦ୍ଧାଙ୍କ ମୁହଁକୁ ନିଜ ଦେହରୁ ସାର୍ଟ କାଢି ଦେଇ ସେଥିରେ ଘୋଡ଼ାଇ ଦେଇଥିଲା ।
ଆଖପାଖରେ ଥିବା ଲୋକେ ଏଭଳି ଦୃଶ୍ୟ ଦେଖି ଗାଁଲୋକଙ୍କୁ ଖବର ଦେଇଥିଲେ । ଗ୍ରାମବାସୀ ଘଟଣାସ୍ଥଳରେ ପହଞ୍ଚିବା ବେଳକୁ ଯୁବକଜଣକ ଫେରାର ହୋଇଯାଇଥିଲା । ଏହାପରେ ଲୋକେ ଏନେଇ ପୁଲିସକୁ ସୂଚନା ଦେଇଥିଲେ । ପୁଲିସ ଅଭିଯୁକ୍ତ ଯୁବକକୁ ଗିରଫ କରିଥିଲା । ଉକ୍ତ ଯୁବକର ନାଆଁ ସୁରେନ୍ଦ୍ର ବୋଲି ଜଣାଯାଇଛି । ସେ ମୁମ୍ବାଇର ବାସିନ୍ଦା । ସେ ନିୟମିତ ନିଶା ସେବନ କରୁଥିବା ପୁଲିସ ଜାଣିବାକୁ ପାଇଛି । ମୃତ ବୃଦ୍ଧାଙ୍କ ନାମ ହେଲା ଶାନ୍ତ ଦେବୀ । ଏଭଳି ଘଟଣା ସ୍ଥାନୀୟ ଅଞ୍ଚଳରେ ପ୍ରଥମ ଥର ଘଟିଥିବା ଜଣାଯାଇଛି । ତେବେ ଯୁବକ କାହିଁକି ସେ ଅଞ୍ଚଳକୁ ଆସିଥିଲା, ତାର ତଦନ୍ତ କରୁଛି ପୁଲିସ ।
