ଯାଜପୁର : ଯାଜପୁର ଜିଲ୍ଲାର କୋରାଇ ଥାନା ୨୦ନଂ ଜାତୀୟ ରାଜପଥର ନଗୁଆଁ ଗ୍ରାମ ନିକଟରେ ଥିବା ତାରିଣୀ ମନ୍ଦିର ପାଖରେ ଏକ ସଡ଼କ ଦୁର୍ଘଟଣାରେ ଜଣେ ଯୁବକଙ୍କ ଘଟଣାସ୍ଥଳରେ ମୃତ୍ୟୁ ଘଟିଛି । ସୂଚନା ଅନୁଯାୟୀ ନଗୁଆଁ ଗାଁ ନିକଟରୁ ପ୍ରଦୀପ ନାଟିଆ (୩୨) ତାଙ୍କ ସ୍କୁଟି ଯୋଗେ ବାହାରି କୌଣସି କାମରେ ବାହାରକୁ ଯାଉଥିଲେ । ସେହି ସମୟରେ କଳିଙ୍ଗନଗରରେ ଥିବା ଏକ ସିମେଣ୍ଟ କାରଖାନାରୁ ଏକ ସିମେଣ୍ଟ ବୋଝେଇ ବାରଚକିଆ ଟ୍ରକ କେନ୍ଦୁଝର ଅଭିମୂଖେ ଯାଉଥିବା ବେଳେ ପ୍ରଦୀପକଙ୍କୁ ପଛପଟୁ ଧକ୍କା ଦେଇଥିଲା। ଘଟଣାସ୍ଥଳରେ ପ୍ରଦୀପଙ୍କର ମୃତ୍ୟୁ ଘଟିଥିଲା ।
ଟ୍ରକକୁ ଗ୍ରାମବାସୀ ଅଟକ ରଖିଥିବାବେଳେ ଡ୍ରାଇଭର ଫେରାର ହୋଇଯାଇଥିବା ଜଣାପଡିଛି । ସୂଚନାପାଇଁ କୋରାଇ ଥାନା ପୋଲିସ ଓ ଯାଜପୁରରୋଡ଼ ଥାନା ଅଧିକାରୀ ଉପେନ୍ଦ୍ର କୁମାର ପ୍ରଧାନ ଘଟଣାସ୍ଥଳରେ ପହଞ୍ଚିଥିଲେ । ଶବକୁ ଜବଦ୍ କରି ବ୍ୟବଛେଦ ନିମନ୍ତେ ସ୍ଥାନୀୟ ଦାନଗଦି ଗୋଷ୍ଟି ସ୍ୱାସ୍ଥ୍ୟକେନ୍ଦ୍ରକୁ ପଠାଇଛନ୍ତି। କୋରାଇ ପୋଲିସ ଟ୍ରକଟିକୁ ଜବଦ କରିଛନ୍ତି । ମୃତ ପ୍ରଦୀପ, ଦିଲୀପ ନାଟିଆଙ୍କର ଏକ ମାତ୍ର ପୁଅ ଥିଲେ ତାଙ୍କ ଘର ସୋବରା ଅଞ୍ଚଳରେ ହୋଇଥିବାବେଳେ ସେ ଘରେ ଝଗଡା କରୀ ଦୀର୍ଘ ୧୫ ଦିନ ଧରି ନଗୁଆଁ ଗ୍ରାମରେ ରହୁଥିଲେ । ପରିବାରରେ ସ୍ତ୍ରୀ ଏବଂ ୨ ବର୍ଷର ଏକ ଶିଶୁ ପୁତ୍ର ଥିବା ସୂଚନା ମିଳିଛି । ଦୁର୍ଘଟଣା ସ୍ଥଳରେ ଦୀର୍ଘଦିନରୁ କିଛି ଡଷ୍ଟଗୁଣ୍ଡ ପଡ଼ିରହିଛି ଫଳରେ ଉକ୍ତ ଅଞ୍ଚଳଟି ଧୂଳି ଉଡି ପ୍ରଦ୍ୟୁଷଣ ହେଉଛି ଏବଂ ଡଷ୍ଟ ଯୋଗୁ ଅନେକ ପଥିକ ଓ ବାଇକ ଆରୋହୀ ମାନେ ଦୁର୍ଘଟଣାରେ ଶିକାର ହେଉଛନ୍ତି ବୋଲି ଗ୍ରାମବାସୀମାନେ ଅଭିଯୋଗ ଆଣିଛନ୍ତି ।
