ଢେଙ୍କାନାଳ: ହିନ୍ଦୋଳ ଉପଖଣ୍ଡ ବାଲିମି ଥାନା ଅନ୍ତର୍ଗତ ଦୁଦୁରକୋଟ ବାଘୁଆ ସାହିରେ ଏକ ଅଭାବନୀୟ ଘଟଣା ଘଟିଯାଇଛି । ନୃଶଂସ ସ୍ୱାମୀ ନିଜ ପତ୍ନୀଙ୍କୁ ହତ୍ୟାକରିଛି । ଦୁଦୁରକୋଟ ବାଘୁଆ ସାହିର ପ୍ରତାପ ସାମଲ (୩୫) ସବୁବେଳେ ମଦ ନିଶାରେ ସ୍ତ୍ରୀ ମୀନତି(ମୀନା)ଙ୍କୁ ପିଟାପିଟି କରନ୍ତି । ଫଳରେ ମୀନତି ବାପଘରକୁ ଚାଲି ଯାଇଥିଲେ । ଶୁକ୍ରବାର ପ୍ରତାପ ସ୍ତ୍ରୀକୁ ଘରକୁ ଡାକି ଆଣିଥିଲା ।
ଆଉ ରାତିରେ ଖାଇସାରି ୨ପୁଅ ଶୋଇବା ପରେ ଅର୍ଦ୍ଧରାତିରେ ସ୍ତ୍ରୀକୁ ପ୍ରତାପ କୌଶଳକ୍ରମେ ଘରୁ ବାହାରକୁ ଡାକିଆଣି ତାଙ୍କ ମୁଣ୍ଡକୁ ଶକ୍ତପ୍ରହାର ଦେଇ ସେଠାରୁ ଚମ୍ପଟ୍ ମାରିଥିଲା । ମୀନତି ଚିତ୍କାର କରିବାରୁ ସାନପୁଅ ଉଠି ପଡ଼ୋଶୀଙ୍କ ସହାୟତାରେ ଗୁରୁତର ଅବସ୍ଥାରେ ଆମ୍ବୁଲାନ୍ସ ଯୋଗେ ହିନ୍ଦୋଳ ଡାକ୍ତରଖାନାକୁ ନେଇଥିଲେ ହେଁ ଡାକ୍ତର ସେଠାରେ ମୃତ ଘୋଷଣା କରିଥିଲେ । ମୀନତିଙ୍କ ବାପା ଶିବରାମ ସାମଲ ତାଙ୍କ ଝିଅକୁ ହତ୍ୟା କରାଯାଇଥିବା ନେଇ ବାଲିମି ଥାନାରେ ପରିବାର ଲୋକଙ୍କ ନାମରେ ଲିଖିତ ଅଭିଯୋଗ କରିଛନ୍ତି । ବାଲିମି ଥାନା ଅଧିକାରୀ ଅମିତ କୁମାର ବିଶ୍ୱାଳ ଶବକୁ ଜବତ କରିବା ସହ ଶାଶୂ-ଶ୍ୱଶୁରଙ୍କୁ ଅଟକ ରଖି ପଚରାଉଚୁରା ଜାରି ରଖିଛନ୍ତି ।
