ମୁମ୍ବାଇ: କ୍ରିକେଟର୍ ପୃଥ୍ୱୀ ଶ’ଙ୍କ ସହ ହାତାହାତି ଘଟଣାରେ ମୁମ୍ବାଇ ପୁଲିସ୍ ଆଉ ଦୁଇଜଣଙ୍କୁ ଗିରଫ କରିଛି । ଏହାକୁ ମିଶାଇ ମାମଲାରେ ମୋଟ ଗିରଫ ସଂଖ୍ୟା ୩ ହୋଇଥିବା ବେଳେ ଅନ୍ୟ ୫ ଜଣ ଏବେ ବି ଫେରାର୍ ଥିବା ମୁମ୍ବାଇ ପୁଲିସ କହିଛି । ସେହିପରି ମାମଲାର ଅଭିଯୁକ୍ତ ସପ୍ନା ଗିଲ୍ଙ୍କୁ ପୁଲିସ ଶୁକ୍ରବାର ଅନ୍ଧେରୀ କୋର୍ଟରେ ହାଜର କରାଇଥିବା ବେଳେ କୋର୍ଟ ତାଙ୍କୁ ଫେବୃଆରୀ ୨୦ ପର୍ଯ୍ୟନ୍ତ ପୁଲିସ ହାଜତକୁ ପଠାଇ ଦେଇଛନ୍ତି । ଅନ୍ୟପକ୍ଷରେ ଓଶିୱାରା ପୁଲିସ ଶ’ଙ୍କ ବନ୍ଧୁ ଆଶିଷ ଯାଦବଙ୍କ ପୁଣିଥରେ ବୟାନ ରେକର୍ଡ କରିଛି ।
ଆଶିଷଙ୍କ ଅନୁସାରେ ଅଭିଯୁକ୍ତ ଯୁବତୀ ସପ୍ନା ଗିଲ୍ ତାଙ୍କୁ ଜୀବନରେ ମାରିଦେବାକୁ ଧମକ ଦେଇଥିଲେ । ମୁମ୍ବାଇ ପୁଲିସ ସପନାଙ୍କ ବିରୋଧରେ ରୁଜୁ ଏଫ୍ଆଇଆର୍ରେ ଆଇପିସିର ଧାରା ୩୮୭ ଯୋଡ଼ିଛି । ଏହି ମାମଲାରେ ସେଲ୍ଫିକୁ ନେଇ ହୋଇଥିଲା । ଏହାର ଏକ ଭିଡିଓ ମଧ୍ୟ ଭାଇରାଲ୍ ହେବାରେ ଲାଗିଛି । ଏଥିରେ ପୃଥ୍ୱୀ ଜଣେ ଯୁବତୀଙ୍କ ଠାରୁ ବେସ୍ବଲ୍ ବ୍ୟାଟ୍ ଛଡ଼ାଉଥିବା ଦେଖିବାକୁ ମିଳିଥିବା ବେଳେ ଯୁବତୀଙ୍କ ବନ୍ଧୁ ମଧ୍ୟ ଭିଡିଓ କରୁଥିବା ନଜର ଆସିଛି । ପୃଥ୍ୱୀ ଏବଂ ତାଙ୍କ ବନ୍ଧୁ ଡ୍ୟାନ୍ସ କ୍ଲବ୍ରେ ସେମାନଙ୍କ ସହିତ ମାରପିଟ କରିବା ସହିତ ବାହାରେ ବେସ୍ବଲ୍ରେ ଆକ୍ରମଣ କରିଥିବା ଯୁବତୀ ଏବଂ ତାଙ୍କ ବନ୍ଧୁ ଅଭିଯୋଗ କରିଛନ୍ତି ।
