କେନ୍ଦ୍ରାପଡ଼ା : ଡେରାବିଶ ଥାନା ନରସିଂହପୁର ପଞ୍ଚାୟତ ମୁଣ୍ଡିଲୋ ଗ୍ରାମରେ ଆଜି ଏକ ଯୌତୁକ ଜନିତ ହତ୍ୟାକାଣ୍ଡ ଘଟିଛି । ଶାଶୂଘର ଲୋକ ବୋହୂକୁ ତଣ୍ଟିଚିପି ମାରି ଦଉଡ଼ିରେ ଝୁଲାଇ ଦେଇଥିବା ଡେରାବିଶ ଥାନାରେ ମୃତକଙ୍କ ପରିବାର ପକ୍ଷରୁ ଅଭିଯୋଗ ହବା ପରେ ଡେରାବିଶ ପୁଲିସ ସ୍ୱାମୀକୁ ଧରିଆଣି ପଚରାଉଚୁରା କରୁଛି । ଅଭିଯୋଗ ଅନୁଯାୟୀ ମୁଣ୍ଡିଲୋ ଗ୍ରାମର ପ୍ରକାଶ ଅକ୍ଷୟ ସେଠୀଙ୍କ ପୁଅ ଜିତେନ୍ଦ୍ର ସେଠୀ ନିକିରାଇ ଥାନା ଅଧୀନ ଇନ୍ଦୁପୁର ଗ୍ରାମର ଚଣ୍ଡୀ ସେଠୀଙ୍କ ଝିଅ ମାନସୀ ସେଠୀଙ୍କୁ ଗତ ଜୁଲାଇ ୧୪ ତାରିଖରେ ବୈଦିକମତେ ବିବାହ କରିଥିଲେ । ବିବାହ ସମୟରେ ବରପକ୍ଷଙ୍କ ଦାବି ମୁତାବକ ୩୫ ହଜାର ଟଙ୍କା, ଜ୍ୱାଇଁଙ୍କୁ ସୁନାମୁଦି ଓ ଚେନ୍, ଝିଅକୁ ସୁନାହାର ଏବଂ ମଙ୍ଗଳସୁତ୍ର, କାନଫୁଲ, ମୁଦି, ଖଟ, ଆଲାଣା, ଷ୍ଟିଲ ଆଲମିରା ସହିତ ସମସ୍ତ ଘରକରଣା ଆସବାବପତ୍ର ଦେଇଥିଲେ । ବିବାହର ୮ ଦିନ ପରେ ଝିଅଜ୍ୱାଇଁ ଅଷ୍ଟମଙ୍ଗଳାରେ ଶ୍ୱଶୁର ଘରକୁ ବୁଲିବାକୁ ଯାଇଥିଲେ ।
ସେହିଦିନଠାରୁ ଆରମ୍ଭ ହୋଇଥିଲା ଅଧିକ ଯୌତୁକ ପାଇଁ ଝିଅ ଉପରେ ଚାପ ପ୍ରୟୋଗ । ଝିଅଜ୍ୱାଇଁ ଶ୍ୱଶୁର ଘରେ ଥିବା ବେଳେ ପୁଅ ଘର ତରଫରୁ ରଙ୍ଗିନ ଏଲ୍ଇଡି ଟିଭି ଓ ଫ୍ରିଜ୍ ସହିତ ୧ଲକ୍ଷ ଟଙ୍କା ଭାର ସହିତ ଦେବା ପାଇଁ ଦାବି କରିଥିଲେ । ମାତ୍ର ଝିଅର ବାପା ଦେବା ପାଇଁ ଅକ୍ଷମ ଥିବାରୁ ଏସବୁ ଜିନିଷ ନଦେଇ ଝିଅ ଘରକୁ ଯାଇ ତାଙ୍କର ଶାଶୂଶ୍ୱଶୁରଙ୍କ ହାତଗୋଡ଼ ଧରି ପରେ ସୁବିଧା ଦେଖି ଦେବେ ବୋଲି କହିଆସିଥିଲେ । ହେଲେ ପୁଅଘର ତରଫରୁ ଝିଅକୁ ଅତ୍ୟଧିକ ଯୌତୁକ ଆଣିବା ଚାପ ପ୍ରୟୋଗ କରି ମାଡ଼ମାରିବା ଓ ଖାଇବାକୁ ନଦେବା ଭଳି ହଇରାଣ ହରକତ କରୁଥିଲେ । ଝିଅର ବାପା ତିନିଚାରିଥର ଭଦ୍ରଲୋକ ଡାକି ଝିଅ ଶାଶୂଘରେ ବୁଝାଶୁଝା କରି ଆସିଥିଲେ । ଏହା ପରେ ମଧ୍ୟ ଶାଶୂଘର ଲୋକଙ୍କର କିଛି ପରିବର୍ତ୍ତନ ହୋଇନଥିଲା ।
ବରଂ ଝିଅ ପ୍ରତି ଅତ୍ୟାଚର ବଢ଼ିଚାଲିଥିଲା । ଆଜି ଦିନ ୧୧ଟାରେ ଝିଅର ବାପାଙ୍କୁ ଖବର ଦିଆଗଲା ଯେ ତୁମ ଝିଅ ଦଉଡ଼ିଦେଇ ଦେଇଛି ଓ କେନ୍ଦ୍ରାପଡ଼ା ଡାକ୍ତରଖାନାରେ ଚିକିତ୍ସିତ ହେଉଛି । ତେଣୁ ଶୀଘ୍ର ଆସି ପହଞ୍ଚ । ଝିଅର ବାପା ଯାଇ ଦେଖିଲା ବେଳକୁ ମାନସୀଙ୍କ ମୃତଦେହ ପଡ଼ିଥିବା ଦେଖିବାକୁ ପାଇଥିଲେ । କେବଳ ଯୌତୁକ ଲୋଭରେ ଜ୍ୱାଇଁ, ଶ୍ୱଶୁର, ଶାଶୂ, ନଣନ୍ଦ, ମଉସା ମିଳିମିଶି ତଣ୍ଟି ଚିପି ମାରିଦେଇ ପରେ ରଶିରେ ଟଙ୍ଗାଇ ଆତ୍ମହତ୍ୟାର ରୂପ ଦେଇଥିବା ଅଭିଯୋଗରେ ଦର୍ଶାଇଛନ୍ତି । ଏ ସମ୍ପର୍କରେ ଡେରାବିଶ ଥାନାରେ ଏକ ମାମଲା ରୁଜୁ କରାଯିବା ସହି ସ୍ୱାମୀ ଜିତେନ୍ଦ୍ରକୁ ପୁଲିସ୍ ଅଟକ ରଖି ପଚରା ଉଚୁରା କରୁଛି । ମୃତା ମାନସୀଙ୍କର ଶବକୁ ଜବତ କରି ପୁଲିସ ତଦନ୍ତ ଚଳାଇଛି ।
