ଭିଭୋକୁ ଝଟକା: ଆଇପିଏଲ-୧୩ର ହେବ ନାହିଁ ଟାଇଟଲ୍ ସ୍ପନସର

ନୂଆଦିଲ୍ଲୀ, ୦୪|୦୮: ଚୀନ୍ ମୋବାଇଲ କମ୍ପାନୀ ଭିଭୋ ଚଳିତ ବର୍ଷ ଆଇପିଏଲର ଟାଇଟଲ୍ ସ୍ପନସରସିପରୁ ବ୍ରେକ୍ ନେବ । ତେବେ ଭିଭୋର କଣ୍ଟ୍ରାକ୍ଟରେ ୩ ବର୍ଷର ସମୟ ବାକି ଅଛି । ତେଣୁ ଏହି କମ୍ପାନୀ ୨୦୨୧,୨୦୨୨ ଓ ୨୦୨୩ ଆଇପିଏଲରେ ଜଡିତ ରହିବ । ଆଇପିଏଲର ଚଳିତ ସିଜିନରେ ଏକ ନୂଆ ଷ୍ଟାଣ୍ଡଏଲୋନ୍ ସ୍ପନସର୍ ରହିବ । ଅତିଶୀଘ୍ର ନୂଆ ସ୍ପନସର୍ ବାବଦରେ ନିଷ୍ପତ୍ତି ନିଆଯିବ ।
ଭାରତ ଓ ଚୀନ ମଧ୍ୟରେ ଦେଖାଦେଇଥିବା ସୀମା ବିବାଦର ପ୍ରଭାବ ଆଇପିଏଲରେ ମଧ୍ୟ ପଡିଛି । ଭାରତରେ ଚୀନ୍ ସାମଗ୍ରୀକୁ କଡା ବିରୋଧ କରାଯାଉଛି । ଭିଭୋ ମଧ୍ୟ ଏକ ଚୀନ କମ୍ପାନୀ ।
ଗଲଓ୍ୱାନ ଘାଟିରେ ଭାରତ ଓ ଚୀନ ସୈନ୍ୟଙ୍କ ମଧ୍ୟରେ ସଙ୍ଘର୍ଷ ପରେ ଭାରତୀୟଙ୍କ ଭାବନାକୁ ନଜରରେ ରଖି ବିସିସିଆଇକୁ ଏହି ନିଷ୍ପତ୍ତି ନେବାକୁ ପଡିଛି । ଭିଭୋ ୨୦୧୮ରେ ୨୧୯୯ ଟଙ୍କା ଖର୍ଚ୍ଚ କରି ୫ ବର୍ଷ ପାଇଁ ଆଇପିଏଲର କଣ୍ଟ୍ରାକ୍ଟ ହାସଲ କରିଥିଲା । ୨୦୨୩ ଯାଏଁ ଭିଭୋ ଆଇପିଏଲ ସହ ରହିବ ।
ଚଳିତ ବର୍ଷ କରୋନା ମହାମାରୀ ଯୋଗୁ ମାର୍ଚ୍ଚ ୨୯ରେ ଭାରତରେ ଆରମ୍ଭ ହେବାକୁ ଥିବା ଆଇପିଏଲ ସ୍ଥଗିତ ରହିଥିଲା। ଶେଷରେ ଟି-୨୦ ବିଶ୍ୱକପ ସ୍ଥଗିତ ରହିବାରୁ ବିସିସିଆଇ ୟୁଏଇରେ ଏହାକୁ ଆୟୋଜନ କରିବାକୁ ନିଷ୍ପତ୍ତି ନେଇଛି। ଭାରତ ସରକାର ମଧ୍ୟ ଏଥିପାଇଁ ଗ୍ରୀନ ସିଗ୍ନାଲ ଦେଇ ସାରିଛନ୍ତି। ସେପ୍ଟେମ୍ବର ୧୯ରୁ ଆରମ୍ଭ ହୋଇ ଆଇପିଏଲ ନଭେମ୍ବର ୧୦ ଯାଏ ଚାଲିବ।