OnaKhabar

ପୁଣି ନବକଳେବର ରୋଡରେ ଏନକାଉଣ୍ଟର

130

ପୁରୀ: କିଛି ଦିନର ବ୍ୟବଧାନ ପରେ ପୁଣି ଶନିବାର ବିଳମ୍ବିତ ରାତ୍ରୀରେ କୁମ୍ଭାରପଡ଼ା ଥାନା ଅଞ୍ଚଳ ନବକଳେବର ରୋଡ୍‌ରେ ପୁଲିସ ସହ ଗୁଳି ବିନିମୟ କରି ଜଣେ ବ୍ୟକ୍ତି ଆହତ ହୋଇଛନ୍ତି । ସଂପୃକ୍ତ ବ୍ୟକ୍ତିର ନାମ ଦିବାନା ବେହେରା ଓ ତା’ ଡାହାଣ ଗୋଡ଼ରେ ଗୁଳି ବାଜିଛି । ତାକୁ ଗୁରୁତର ଅବସ୍ଥାରେ କଟକ ବଡ଼ ଡାକ୍ତରଖାନାରେ ଭର୍ତ୍ତି କରାଯାଇଥିବା ବେଳେ ତା’ଠାରୁ ଗୋଟିଏ ପିସ୍ତଲ, ଗୁଳି ଓ ଏକ ବାଇକ୍ ଜବତ କରାଯାଇଛି ।

ପୁରୀ ଏସ୍‌ପିଙ୍କଠାରୁ ମିଳିଥିବା ସୂଚନା ଅନୁଯାୟୀ, ଦିବାନାର ଘର ଗୋଖା ସାହିରେ । ସେ ପୂର୍ବରୁ ହୋମ୍‌ଗାର୍ଡ ଚାକିରି କରୁଥିଲା। ବେଆଇନ୍ କାମ କରି ସେ କୋଟିପତି ହୋମ୍‌ଗାର୍ଡ ପାଲଟି ଯାଇଥିଲା । ତା’ପରେ ଅପରାଧ ଦୁନିଆରେ ସାମିଲ ହୋଇଯାଇଥିଲା ଦିବାନା | ତା’ ନାଁରେ ବିଭିନ୍ନ ଥାନାରେ ୨୬ଟି ମାମଲା ରହିଛି । ତାକୁ ପୁଲସ୍ ବହୁ ଦିନ ହେଲା ଖୋଜୁଥିଲା । ତେବେ ଗତକାଲି ରାତି ପ୍ରାୟ ଦେଢ଼ଟାରେ ପୁଲିସ୍ କୌଣସି ସୁତ୍ରରୁ ଜାଣିବାକୁ ପାଇଲା ଯେ, ସେ ନବକଳେବର ରୋଡ୍ ଆଶ୍ରମ ଛକରେ ଅଛି। ପୁଲିସ୍ ପାଖରେ ଏହା ବି ସୂଚନା ଥିଲା ଯେ, ସେ ସୁପାରି ନେଇ କାହାକୁ ହତ୍ୟା କରିବାକୁ ପ୍ରସ୍ତୁତ ହେଉଛି। ଏହି ସୂଚନା ମିଳିବା ପରେ ପୁଲିସ୍‌ର ଏକ ଟିମ୍ ସେଠାରେ ଚଢ଼ାଉ କରିଥିଲା। ଚଢ଼ାଉ ବେଳେ ଦିବାନା ପୁଲିସ୍ ଟିମ୍ ଉପରକୁ ଗୁଳି ଚଳାଇଥିଲା। ତା’ଗୁଳିରେ ବାସେଳିସାହି ଥାନା ଆଇଆଇସି ସାମାନ୍ୟ ଆହତ ହୋଇଛନ୍ତି। ଗୁଳିଟି ତାଙ୍କ ହାତକୁ ଛୁଇଁ ଚାଲି ଯାଇଥିଲା। ତେବେ ଏହା ପରେ ପୁଲିସ୍‌ର ପାଲଟା ଗୁଳିମାଡ଼ରେ ଦିବାନା ଆହତ ହୋଇଥିଲା। ତା’ ଡାହାଣ ଗୋଡ଼ରେ ଆଣ୍ଠୁ ତଳକୁ ଗୁଳି ବାଜିଛି । ଦିବାନାକୁ ଆହତ ଅବସ୍ଥାରେ ପ୍ରଥମେ ପୁରୀ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ତେବେ ଅବସ୍ଥା ଗୁରୁତର ହେବାରୁ ତାକୁ କଟକ ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା ।