ସ୍କୁଲରେ ଗୁଳିଚଳାଇଲା ୧୪ ବର୍ଷୀୟ ବାଳକ, ୯ ମୃତ

ବେଲଗ୍ରେଡ୍‌: ପୂର୍ବରୁ ଆମେରିକାର ସ୍କୁଲଗୁଡ଼ିକରେ ଗୁଳିକାଣ୍ଡର ଖବର ଆସୁଥିଲା । କିନ୍ତୁ ଏବେ ୟୁରୋପୀୟ ଦେଶ ସର୍ବିଆର ଏକ ସ୍କୁଲରେ ଗୁଳିକାଣ୍ଡ ହୋଇଛି । ଘଟଣାଟି ଘଟିଛି ସର୍ବିଆର ରାଜଧାନୀ ବେଲଗ୍ରେଡର ଏକ ସ୍କୁଲରେ । ରିପୋର୍ଟ ଅନୁଯାୟୀ, ଏହି ଘଟଣା ଭ୍ଲାଦିସ୍ଲାଭ ରିବନିକର ପ୍ରାଥମିକ ବିଦ୍ୟାଳୟରେ ଘଟିଛି । ସ୍କୁଲର ଜଣେ ୧୪ ବର୍ଷୀୟ ଛାତ୍ର ସ୍କୁଲପିଲା ଏବଂ ସୁରକ୍ଷା କର୍ମୀଙ୍କ ଉପରକୁ ଗୁଳି ଚଳାଇଛି । ସ୍ଥାନୀୟ ନ୍ୟୁଜ୍ ଏଜେନ୍ସି ତଞ୍ଜୁଗର ରିପୋର୍ଟକୁ ଉଦାହରଣ ଦେଇ ବିବିସି କହିଛି ଯେ ଏହି ଗୁଳିକାଣ୍ଡରେ ଅତି କମରେ ୯ ଜଣଙ୍କ ମୃତ୍ୟୁ ଘଟିଛି । ମୃତକଙ୍କ ମଧ୍ୟରେ ୮ ଜଣ ଶିଶୁ ଅଛନ୍ତି । ଏହି ଆଖିମୁଜା ଗୁଳି ଚଳାଇବା ପୂର୍ବରୁ ଛାତ୍ର ଜଣକ ନିଜ ଶିକ୍ଷୟିତ୍ରୀଙ୍କୁ ବି ଗୁଳିକରି ହତ୍ୟା କରିଥିଲା । ଏହା ପୂର୍ବରୁ ଏହି ଗୁଳିକାଣ୍ଡରେ ଜଣେ ସିକ୍ୟୁରିଟି ଗାର୍ଡଙ୍କ ମୃତ୍ୟୁ ଘଟିଥିବା ବେଳେ ୫ ଜଣ ଶିଶୁ ଆହତ ହୋଇଥିବା ନେଇ ଗଣମାଧ୍ୟମରେ ଖବର ପ୍ରକାଶ ପାଇଥିଲା । ପରବର୍ତ୍ତୀ ସମୟରେ ମୃତ୍ୟୁ ସଂଖ୍ୟା ୯ ଥିବା ଜଣାପଡ଼ିଥିଲା । ଏହି ଗୁଳିକାଣ୍ଡ କରିଥିବା ଜଣେ ସପ୍ତମ ଶ୍ରେଣୀ ଛାତ୍ରଙ୍କୁ ପୁଲିସ ଗିରଫ କରିଛି । ଏହି ଗୁଳିକାଣ୍ଡ ପରେ ସ୍କୁଲକୁ ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ କରିଦିଆଯାଇଛି । ଏହା ସହ ପୁଲିସ ପକ୍ଷରୁ ସ୍କୁଲକୁ ସିଲ୍ କରିଦିଆଯାଇଛି ।